يۋليا چەرنوبورودوۆا: ءشارىپوۆانى جەڭۋ ءۇشىن بارىمدى سالامىن

رەسەيلىك بوكسشى يۋليا چەرنوبورودوۆا allfight.ru باسىلىمىنا بەرگەن سۇحباتىندا الداعى قارسىلاسى قازاقستاندىق فيرۋزا ءشارىپوۆا جايلى وي ءبولىستى. قوس بوكسشى 23 اقپان كۇنى «بوكس اكادەمياسىندا» كوزقاراستار دۋەلىن وتكىزگەن. «فيرۋزا وتە سابىرلى قىز. تەرىس مىنەزىن بايقاپ ۇلگەرمەدىم. تەز ءتىل تابىسىپ كەتكەندى جاقسى كورەدى ەكەن. ەكەۋىمىز ازداپ اڭگىمەلەسىپ تە ۇلگەردىك. بۇعان دەيىنگى جەكپە-جەكتەرىنىڭ ءبارىن كوردىم. ءبىرىنشى بولىپ شابۋىلعا شىعىپ, قارسىلاستارىن قىسىمعا العاندى ۇناتادى. مىنە, وسىنى نەگىزگە الا وتىرىپ, ايلا-تاسىلدەر ويلايتىن بولامىز», – دەدى ءشارىپوۆانىڭ قارسىلاسى. فيرۋزا شارشى الاڭدا ءتورتىنشى كەزدەسۋىن وتكىزبەك بولىپ وتىر, ال رەسەيلىك بىلعارى قولعاپ شەبەرى كاسىپقوي رينگكە العاش رەت شىقپاق. «ارينە, ماعان قاراعاندا تاجىريبەسى كوبىرەك, ءارى ءبىراز ۋاقىتتان بەرى «بوكس اكادەمياسىندا» دايىندالىپ ءجۇر. بىراق وسالدىق تانىتپاي, وعان لايىقتى قارسىلاس بولۋعا دايىنمىن. فيرۋزانىڭ بويىنداعى ەرىك-جىگەر مەندە دە بار. وعان ەشقانداي مۇمكىندىك بەرمەۋگە تىرىسامىن. جەڭىسكە جەتۋ ءۇشىن بارىمدى سالامىن», – دەدى يۋليا چەرنوبورودوۆا. ايتا كەتەيىك, قوس بوكسشىنىڭ اراسىنداعى كەزدەسۋ 4 ناۋرىزدا بالاشيحا قالاسىندا وتەدى.