بيلايننىڭ اتاۋى وزگەرتىلمەك

«بيلاين» برەندىنىڭ قوجايىنى بولىپ تابىلاتىن رەسەيلىك Vimpelcom تەلەكوممۋنيكاتسيالىق كومپانياسى ونىڭ اتاۋىن VEON دەپ وزگەرتۋدى ويعا الىپ وتىر, دەپ جازادى abctv.kz. كومپانيانىڭ رەسمي اقپاراتىندا ايتىلعانداي, وسى جىلدىڭ  30 ناۋرىزىندا وتۋگە ءتيىس كەزەكتەن تىس جيىندا  اكتسيونەرلەر ماقۇلدايتىن بولسا, وندا اتاۋىن وزگەرتپەكشى. «قازىرگى كومپانيا  24 اي بۇرىن بولعان كومپانيا ەمەس, قازىر ول ەسكىرگەن تەلەكوممۋنيكاتسيالىق بيزنەستەن VEON تەحنولوگيالىق كومپانيا رەتىندە  ترانسفورماتسيالانىپ جاتىر», – دەلىنگەن حابارلامادا. Vimpelcom بۇل شەشىمىن  وسى جىلدىڭ سوڭىندا بىرقاتار ەلدە VEON ينتەرنەت-پلاتفورمالاردى ىسكە قوساتىندىعىمەن تۇسىندىرەدى. ايتۋلارىنشا, ءدال وسىنداي پلاتفورما وتكەن جىلدىڭ سوڭىندا يتاليادا ءساتتى جۇزەگە اسقان. بىلتىرعى قاراشادا «رەيتەر» اگەنتتىگى Vimpelcom-عا تيەسىلى يتاليالىق Wind وپەراتورى مەن  گونكونگتىق Hutchison بىرلەسىپ ءوزىنىڭ كليەنتتەرى ءۇشىن VEON  دەپ اتالاتىن تەگىن مەسسەندجەردى ىسكە قوسقانىن حابارلاعان بولاتىن.  ول وزگە دە تانىمال مەسسەندجەرلەر سەكىلدى جۇمىس ىستەيدى, بىراق قولدانۋشىلار وپەراتورعا ترافيك ءۇشىن اقى تولەمەيدى. كومپانيا وكىلدەرى امستەردامداعى Euronext بيرجاسىندا قايتالاما ليستينگ جۇرگىزۋدى كوزدەپ وتىرعانىن حابارلادى. كومپانيانىڭ شتاب-پاتەرى دە وسى قالادا ورنالاسقانىن ايتا كەتكەن ءجون. كومپانيا, ەگەر اكتسيونەرلەر بەكىتەتىن بولسا, وندا VEON تيكەرىمەن ساۋدا جاسايتىن بولادى. كومپانيانىڭ رەسمي حابارلاماسىندا وزگەرىستى ونىڭ قۇرىلىمىمەن دە بايلانىستىرعان. «كومپانيا ايتارلىقتاي قايتا قۇرىلىپ, بىرنەشە جىلدىق قۇلدىراۋدان كەيىن ءوسىم كورسەتە باستادى», – دەلىنگەن حابارلامادا. 2016 جىلدىڭ قورىتىندىسى بويىنشا كومپانيا ءبىر اكتسيا ءۇشىن  23 تسەنت دەڭگەيىندە ديۆيدەنت تولەيدى.  بۇل كومپانيانىڭ جوبالار قورجىنىنداعى وزگەرىستەرمەن بايلانىستى. ءتورتىنشى توقساندا Vimpelcom-نىڭ ءتۇسىمى 2,5%-عا, 2,3 ملرد دوللارعا دەيىن ءوستى.  نەگىزگى وتكىزۋ نارىعى رەسەي بولىپ وتىر, ونداعى ءتۇسىم  1,1 ملرد دوللاردى قۇرايدى. كومپانيا رەسەي, قازاقستان, يتاليا, پاكىستان, الجير, بانگلادەش, ۋكراينا جانە وزبەكستاندا جۇمىس ىستەيدى.