قۇرالبەك ورداباەۆ: بوروديۋك ۇلتتىق قۇرامانى جاتتىقتىرادى دەپ ويلامايمىن

قازاق فۋتبولىنىڭ ارداگەرى, داڭقتى قاقپاشى, «قايراتتىڭ» بۇرىنعى ويىنشىسى قۇرالبەك ورداباەۆ قازاقستان ۇلتتىق قۇراماسىنا الەكساندر بوروديۋكتىڭ باس باپكەر بولاتىندىعى جايلى ءوز ويىن ءبىلدىردى. بۇل تۋرالى vesti.kz حابارلادى. «بوروديۋك مۇنداي جاۋاپتى قىزمەتكە تاعايىندالادى دەپ ويلامايمىن. ول بىزدە جۇمىس ىستەپ كەتتى. «قايراتقا» جەتەكشىلىك ەتتى. بەرىلگەن مىندەتتى ءجوندى اتقارا الماي, ءوز ەركىمەن كەتتى. ونىڭ باستاۋىمەن كوماندا جاڭا ماۋسىمعا دايىن ەمەس ەدى. ناتيجەسىندە, ماۋسىم باسىندا-اق بىرنەشە رەت جەڭىلدى. وسىعان بايلانىستى باسشىلارىمىز ونى ۇلتتىق قۇراماعا شاقىرادى دەپ ويلامايمىن», – دەدى قۇرالبەك ورداباەۆ. «قازىرگى ۋاقىتتا باپكەر اۋىستىرۋدىڭ ەش قيسىنى كەلمەيتىن سياقتى. بيىل نەگىزگى قۇراما التى رەسمي كەزدەسۋ وتكىزەدى. سونىڭ قورىتىندىسى بويىنشا شەشىم شىعارۋعا بولادى. مەنىڭ ويىمشا, تالعات بايسۋفينوۆ دۇرىس جولدا كەلەدى ءارى الەم چەمپيوناتىنىڭ ىرىكتەۋ كەزەڭدەرىن اياقتاۋعا مۇمكىندىك بەرۋ قاجەت», – دەدى داڭقتى قاقپاشى. ايتا كەتەيىك, «سپورت-ەكسپرەسس» باسىلىمى الداعى ايدا الەكساندر بوروديۋك جاڭا قىزمەتىنە كىرىسەتىنىن حابارلاعان.