قۇرىلىس كومپانيالارى اكىمدىكتى سوتقا بەرمەكشى

قاراعاندى وبلىسىندا قۇرىلىس كومپانيالارىنىڭ باسشىلارى بۇقار جىراۋ اۋدانىنىڭ "قۇرىلىس ءبولىمى" مم-گە قارسى ۇجىمدىق تالاپ-ارىز دايىنداپ جاتىر. 2015 جىلى وسى اۋدانداعى سۋ الىپ كەتۋ وقيعاسىنان كەيىن قۇرىلىس كومپانيالارى تاسقىننان زارداپ شەككەن ۇيلەردى ءسۇرىپ تاستاپ, ونىڭ ورنىنا جاڭا ۇيلەر سالعان. وسى شىعىندى جەرگىلىكتى بيلىك تولەۋى كەرەك بولعانىمەن, اكىمدىك تەك جارتىسىن عانا, ونىڭ ءوزىن كەشىكتىرىپ بەرگەن. شەنەۋنىكتەر سول كەزدە قۇرىلىس كومپانيالارىنىڭ ءوز قارجىسىن جۇمساۋىنا كوندىرگەن. ال كەلىسىمشارت ءتۇزىپ, اقشانى قايتارىپ الۋ ءۇشىن رەسپۋبليكالىق بيۋدجەتتەن وسى ماقساتتا قارجى قاراستىرىلۋىن كۇتۋ كەرەكتىگىن العا تارتقان. بۇنى قازىر اكىمدىك اۋىل حالقىنىڭ ءۇي ماسەلەسىن دەرەۋ شەشۋ ءۇشىن ىستەگەنىن ايتادى. "اكىمدىك سمەتاعا ساي شارشى مەترىنە 150 مىڭ تەڭگەدەن تولەۋگە ۋادە ەتتى. بىراق ءبىز 90 مىڭ تەڭگەدەن عانا الدىق", - دەيدى قاراعاندى وبلىسى قۇرىلىس كومپانيالار قاۋىمداستىعىنىڭ ديرەكتورى نايليا كايربەكوۆا. قۇرىلىس كومپانياسى جەتەكشىسى الەكساندر مۇقانوۆتىڭ ايتۋىنشا, كومپانيالاردىڭ جالپى شىعىنى 15-40 ملن تەڭگە ارالىعىندا. ەستەرىڭىزگە سالا كەتەيىك, قاراعاندى وبلىسىنداعى سۋ تاسقىنىنان كەيىن 35 ەلدى مەكەندەگى 1700 ءۇي زارداپ شەككەن ەدى.