ۇزىن بويلى جىگىتتىڭ ارمانى دا اسقاق

15 جاسىنا دەيىن باسقا بالالار سەكىلدى ءوستى, مەكتەپتە وقىدى. راس, مىنەزى تۇيىق ەدى. اتا-اجەسىنىڭ تاربيەسىندە بولعان باقىتتىڭ قۇلاعىندا مۇكىسى بارىن اكە-شەشەسى دە اڭعارماعان. «ميىندا ىسىك بار» دەگەن دارىگەر ءسوزى اناسى مانشۇككە اۋىر ۇكىمدەي ەستىلدى. وتا جاسالدى. امان قالدى. بىراق, «ەكىنشى توپ مۇگەدەگى» دەگەن ءسوز تاعدىرىنا تاڭبا بولىپ باسىلدى. سوعان قاراماستان, كەشكى مەكتەپتى ءبىتىردى. ودان كەيىن حالەل دوسمۇ­حامەدوۆ اتىنداعى اتىراۋ مەملەكەتتىك ۋنيۆەرسيتەتىندە بەي­نەلەۋ ونەرى ماماندىعىن مەڭ­گەردى. قازىر كاسىبي سۋرەتشى. كىش­كەنە كەزىنەن بەرگى اق ادال دوسى بولعان قىلقالامىن ءبىر ساتكە دە قولىنان تاستاعان ەمەس. ءتۇرلى دەڭگەيدەگى سۋرەتشىلەر بايقاۋ­لارىنان جۇلدەسىز قايتقان كۇنى از. اۋىر ناۋقاسقا شالدىققاننان كەيىن باقىتتىڭ بويى شامادان تىس وسە بەرگەن. قازىر جاسى 32-دە, بويى 2 مەتر 10 سم. ول اتىراۋداعى ەڭ بويى ۇزىن ادام. 52-ءشى مولشەرلى اياق كيىم كيەدى. جەرگىلىكتى ساۋدا ورتالىقتارىنان وعان شاق كەلەتىن كيىم تابۋ مۇمكىن ەمەس, سوندىقتان تەك تاپسىرىسپەن الدىرادى. باقىت ساليەۆ تىلسىم تابي­عاتتىڭ ءۇنىن كوكىرەگىمەن تۇيسىنەدى. دۇنيەدەگى سەزىنگەنىنىڭ ءبارىن قاعازعا تۇسىرۋگە اسىعادى. سالعان سۋرەتتەرى دە سان قيلى, بىردە تىپ-تىنىش تابيعات مۇلگىسە, بىردە الاساپىران تەڭىز تولقىنى جاعانى ۇرىپ جاتادى, بىردە قىز بەن جىگىتتىڭ ماحابباتى مولدىرەيدى, بىردە ەرجۇرەك باتىردىڭ پورترەتى رۋح بەرەدى. ول ءۇشىن ءومىر دەگەن – سۋرەت. ءومىر ءسۇرۋ دەگەن – سۋرەت سالۋ. مەملەكەتتەن الاتىن جاردەماقىسىنىڭ ءبارىن دەرلىك قاعاز بەن بوياۋعا جۇمسايدى. جانىنىڭ قالاۋى سول عانا, دەگەنمەن, ول دا ارماندايدى... باقىتگۇل باباش, «ەگەمەن قازاقستان» اتىراۋ