ستويلوۆتىڭ كومانداسى نەمەسە سۋپەركۋبوك الدىنداعى ءسوز

«استانا» تۋرالى اڭگىمە باستالعاندا كوز الدىمىزدا ءستانيميردىڭ سۋرەتى تۇرادى. بۇل ءوزى ستويلوۆتىڭ كومانداسى. جەكە مەنشىگى ەمەس, ارينە. قولتۋماسى. ىشكى تىرشىلىكتەگى ءبىراز شارۋا باس باپكەردىڭ ارالاسۋىمەن بىتەتىن سەكىلدى. مىسالى, نەمانيا ماكسيموۆيچتىڭ بيىل قوسالقى ويىنشىعا اينالعانىن ايتايىق. دجوردجە دەسپوتوۆيچتىڭ «توبىلعا» تارتۋىن دا تىلگە تيەك ەتە الامىز. ول جاقسى عوي. باس جاتتىقتىرۋشىدا بيلىك بولعانى. تابىسقا كەنەلەتىندەر دە سولار: جوعارىعا ۇسىنىسى ءوتىپ, ءسوزى جۇرەتىندەر. قوجايىنعا جالتاقتاۋمەن كۇنى وتەتىن باپكەرلەردىڭ جەڭىسكە جەتۋى ەكىتالاي. مىنە, «استانا» تۋرالى جازايىق دەپ ويلاعان بەتتە ستويلوۆقا تىرە­لىپ قالدىق. مىقتى مامان. ءسوز جوق. ءوز ءىسىن بىلەدى. ءۇش جىل بويى ەش­­كىمگە دەس بەرمەدى. جەتىستىك پە؟ «اس­تانانىڭ» ويىنىن قويىپ بەر­دى. فۋت­بولشىلار الاڭدا ەركىن كو­­سىلە الاتىن دارەجەگە جەتتى. قار­سىلاستىڭ ازۋىن كورىپ تالىپ قالمايدى, قايتا «كەلسەڭ كەل­گە» سالىپ, بىلەك سىبانادى. ءشا­كىرت­تە­ر­ىن دوپپەن ءتىل تابىستىردى. تاك­تي­كانىڭ نە ەكەنىن ۇقتىردى. ويىن­شىلار دا ۇعا الدى. فۋتبول ءماد­ەنيەتىن مەڭگەردى. الگى دوپ­تى شەكەسىمەن, ارقاسىمەن, بالتى­رى­مەن توقتاتسا دا, بىتىراشا شا­شى­­راتپايدى. قايتا ماگنيتكە ما­تىر­عان­داي, بايلاپ الادى. يەلىك ەتكەن بەت­تە شەشىم ىزدەيدى. نەمەسە, دوپ كە­لە جاتقاندا نە ىستەيتىنىن ءبىلىپ تۇ­راتىن دەڭگەيگە جەتتى. راس, كەۋ­دە­گە پىسكەن «ناننان» قۇتىلا ال­ماي قالاتىن كەزدەرى بولادى, ول وزىمىزگە عانا تيەسىلى مىنەزدەن. ءتىپ­تى, ستانيمير دە سىلىپ تاستاي ال­ماي كەلەدى. ەۋروپانى ارالاتتى. چەم­پيوندار ليگاسىنىڭ نەگىزگى جا­رى­سىنا قوستى. ەۋروپا ليگاسىندا دا ويناتتى. ەڭبەك, ەرەن ەڭبەك ءسى­ڭىر­دى. ەندى ەنتىگىپ قالماسا ەكەن. ول دا وڭاي. سوڭعى وتىز جىل كولەمىندە ءبىز­دىڭ ەلدە مۇنداي باپكەر از جولىقتى. وعان دا سەبەپ كوپ. ستويلوۆتىڭ با­عىنا سايان ءبىتتى. حاميتجانوۆ. ستا­ني­ميردى باعالادى, قادىرىنە جەت­تى. ىزدەتكەنىن تاپتى, سۇراعانىن ۇسى­ن­دى. مۇنداي باسشىنى ستا­ني­مير الەمدى التى اينالسا كەزدەستىرە مە؟ «اناۋ شاقىردى, مىناۋ كۇتىپ وتىر», دەيدى عوي. بارۋى مۇمكىن. كو­مانداسىن ۇشپاققا شىعارۋى ەكى­تالاي. ءدال استاناداعىداي جاع­داي ستويلوۆقا جاسالا سالمايدى. ءتورت جىل بۇرىن كىم ەدى؟ ەندى كىم؟ قاقپاشى – ەكەۋ. تىزىمدە ودان كوپ ەكە­نىن بىلەمىز. مىسالى, ابىلايحان دۇيسەن. سالماق الەكساندر موكين مەن نەناد ەريچكە تۇسەتىنى انىق. الدىمىزداعى ناۋرىزدا الماتىدا «قايراتپەن» بولاتىن سۋپەركۋبوك جولىنداعى ماتچتا قاقپانى موكين كۇزەتەتىن شىعار. بىلتىرعى سالتقا ساي. بىزگە سولاي كورىنە مە, الدە ءبىر كىلتيپان بار ما, باس باپكەر مو­كين­دى نەگىزگى قاقپاشىعا اينالدى­رۋدى دا ويلايتىن سەكىلدى. ءوزى ءبى­لە­دى. ەكەۋى دە مىقتى. ەندى قور­­­­عانىسقا كەلەيىك. نەگىزگى تىرەگى – مارين اني­چيچ. سوڭعى جىلدارداعى ەل ءبىرىن­شى­لىگىندەگى ەڭ ۇزدىك قورعاۋشى. ءبىل­گە­نىنەن بيىل دا جاڭىلا قويماس. قا­سىن­دا يۋري لوگۆينەنكو جۇرەتىن ش­ى­عار. ەۆگەني پوستنيكوۆ تە سە­نىم­دى اقتايدى. ستارىي وسكولدا ءوس­كەن ۇل «ارسەنالعا» قارسى ويىندا وڭ قاناتتا دا ساۋاتتىلىق تانىتتى. ورتا­دا ويناي الادى. بەلورۋس يگور شيتوۆ تە ابدەن شىڭدالعان. ەرتە ەسەي­گەن دميتري شومكونىڭ ناعىز تو­لىسقان شاعى. ابزال بەيسەبەكوۆ تە «ات ەرتتەسە, توقىمدى اۋدارمايدى». قورعانىسى تاستاي, الىنباس قامال سەكىلدەنگەن «استاناعا» گول سوعۋ تالاي كومانداعا بيىل دا قول جەتپەس ارمانعا اينالار. ورتا تۇستا ەلەۋلى وزگەرىستەر ورىن الدى. اۋەلى روحەر كانياستى ايتايىق. بۇگىنگى «استاناعا» اسا قاجەت ويىنشى روحەر. كيپر اسىپ كەت­تى. ءوز بەتىمەن ەمەس. مۇمكىن, ستوي­لوۆتىڭ اقىلىمەن. الدە, ستا­ني­مير ەۋرو دوداسىنىڭ الدىندا كا­نياستى قارت قۇرلىقتا شىڭداپ الۋ­دى ءجون كورگەن؟! بۇل دا قيسىنعا كە­لەدى, دەمەك قاتتى قاجەت كەزدە كانياس ءوز جۇمىسىنا ورالادى. راس, يۆان ماەۆسكيدى شاقىردى. يۆان دا شاما-شارقى كەلگەنشە ءوز دەڭگەيىندە ونەر كورسەتەدى عوي, بىراق روحەردى الماستىرا المايدى. ماكسيموۆيچ جازدا «ۆالەنسياعا» كە­تەدى. قازىردىڭ وزىندە قيالىمەن «مەس­تاليانى» شارلاپ جۇرگەن ءجى­گىت­تى ويىنعا جۇمساۋ قيسىنسىز. اقىل­دى ستانيمير ونى انىق بىلەدى. سول سەبەپتى نەمانيانىڭ ودان ءارى قيال­­داۋىنا بوگەت بولماۋى ءتيىس. سەرىكجان مۋجيكوۆتىڭ بابىن تاپ­قان دا ستانيمير. ستويلوۆتىڭ ءتا­لىمىنەن كەيىن تۇلەپ سالا بەردى. ارينە, كەيدە تەحنيكالىق ءبىلىمنىڭ كەم­شىلىگى, كەيدە قارا كۇشتىڭ از­دى­عى تۇساۋ بولادى. بىراق, ەرىك-ءجى­گەر سەرىكجانعا قوسىمشا قۋات بە­رەتىن سە­كىلدى. ونىڭ ۇستىنە بىلىكتى ما­مان­نىڭ تاپسىرماسىن انىق ۇعىپ, سو­نى ورىنداپ شىعۋدان وڭاي نارسە بار ما. اسقات تاعىبەرگەن. تالانت. ءوز ىسىنە مىعىم. كەيدە فۋتبول­دى ونەر دەپ قابىلدايتىنى الاڭ­دا­­ع­ى قيمىل-قوزعالىسىنا قانات ءبى­تى­­رەدى. ول نە ارتىقشىلىق, نەمە­سە كەم­شىلىك. ونى ءستانيميردىڭ ءوزى جو­ر­ىسىن. پاتريك تۆۋماسي. سي­رەك ويىنشىلار ساناتىندا. تەز وي­لايدى, جىلدام قيمىلدايدى. ءمى­نەزى ۇشقالاق دەيتىندەر بار. ءبا­رىن بىلەدى. بىلگەنىن الاڭدا ءجۇ­زەگە اسىرا الادى. «استانا» سا­پىن­داعى ساپالى ويىنشىنىڭ ءبى­رى. مۇمكىن بىرەگەيى. جاس لەكتەن اباي ءجۇنىسوۆ ۇنادى. وزىنە سە­نىمدى. فۋت­بولىڭىزدى كادىمگىدەي مەڭ­گە­رە باستادى. بولاشاعىنان ءۇمىت كۇتتىرەتىن ويىنشى. ازدرەن لۋلاكۋ. بىرجاقتى ءپى­كىر ايتۋ قيىن. ءتورت-بەس ويىنىن كوردىك. بالەندەي اسەر ەت­پەدى. ءمۇم­كىن, كەيىن تۇسىنەرمىز, كىم ەكە­نىن. كەتكەندەردىڭ ورنىن تولتىرا الا ما؟ دجۋنيور كابانانگا. ادام­عا باقتىڭ قونۋى دا وڭاي عوي. قا­را قۇرلىقتاعى جارىسقا زورعا ءىلىن­دى دە, زورايىپ شىعا كەلدى. ءوز قۇ­را­ما­سى­نىڭ باس مەرگەنىنە اينالدى. وقۋ-جات­تىعۋ جيىنىنا كەلگەن بەتتە ءىس­كە كىرىسىپ, الگى بيىگىندە قالىقتاپ تۇ­رىپ قالدى. تومەن تۇسە مە, بيىككە سا­م­عاي ما؟ الداعى ماۋ­سىم جاۋابىن بەرسىن. دجۋنيور دا ءتۇ­سىندە ەۋ­روپانى كورە باستاعان سەكىلدى. «استاناعا» تاعى ءبىر شابۋىلشى كەرەك. كىمدى الادى, قاشان الا­دى؟ رومان مۇرتازاەۆ بار دەدىڭىز بە؟ مۇمكىن, ويناپ كەتەر. مۋ­جيكوۆتەر سەكىلدى. نەسى بار, ستا­ني­مير تالايدىڭ شىراعىن جاق­قان. قۇلاعىن باپكەرگە جاقىن ۇس­تا­سا بول­عانى, ۇعارىن ساناسى بىلەدى. مۇعالىم بار عوي. امانگەلدى سەيىتحانوۆ, جۋرناليست استانا