ويانۋ ءداۋىرىنىڭ ءۇش كىتابى قايتا باسىلىپ شىقتى

حح عاسىردىڭ باسىندا جارىق كورگەن مىرجاقىپ دۋلات ۇلىنىڭ «ويان, قازاق!» (ورىنبور, 1909), بايباتىر ەرجان ۇلىنىڭ «تۇر, قازاق!» (قازان, 1914) جانە ابىلقاسىم ارعىنيدىڭ «جاتپا, قازاق!» (تاشكەنت, 1917) كىتاپتارىنىڭ جۋىردا قايتا باسىلىپ شىعۋى – ەلەۋلى رۋحاني وقيعا. باسىلىمداردى قازىرگى ەملەگە ءتۇسىرىپ, باسپاعا ازىرلەگەن جانە العىسوزىن جازعان – شى­عىستانۋشى-عالىم, فيلولوگيا عىلىمدارىنىڭ كانديداتى ءتورالى قىدىر كوپ ىزدەنىس جاساعان. زەرتتەۋ جۇمىستارى قازان ۋنيۆەرسيتەتىنىڭ (تاتار­ستان) ن.ي.لوباچەۆسكي اتىنداعى عىلىمي كىتاپحاناسىنىڭ قو­رىندا, الماتىداعى ورتالىق عىلىمي كىتاپحانانىڭ قول­جازبالار جانە سيرەك كىتاپتار بولىمىندە جۇزەگە اسقان. كىتاپ­تار اراب قارپىمەن باسىلعان ليتو­گرافيالىق نۇسقالار بويىنشا دايىندالعان. بۇل وڭاي شارۋا ەمەس. «ويان, قازاق!» پەن «تۇر, قازاقتىڭ» ەكىنشى باسىلىمدارى نەگىزگە الىنسا, «جاتپا, قازاقتىڭ» العاشقى باسىلىمى كادەگە جاراتىلعان. وسىدان 100 جىل بۇرىن ۇيقىدا جاتقان قازاق رۋحىن تىرىلتۋگە تىرىسقان مىرجاقىپ دۋلات­ ۇلىنىڭ «ويان, قازاعىنىڭ» اسەرىمەن «تۇر, قازاق!», «جاتپا, قازاق!» كىتاپتارىنىڭ جازىلۋى تەگىن ەمەس ەدى. ولاردىڭ قۇرى­لىمى, كوتەرەر تاقىرىبى مەن ىشكى مازمۇنى «ويان, قازاقتىڭ» جالعاسىنداي بولىپ قابىلدانادى. كوركەمدىك دەڭگەيلەرى ءتۇرلى بولعانىمەن, بايباتىر ەرجان ۇلى مەن ابىلقاسىم ارعىنيدىڭ ءسوز ساپتاۋى, جازۋ مانەرى مەن وي ورامدارىنداعى ايشىقتاردىڭ باستى كونتسەپتى ءبىر ەدى. ول – قازاقتىڭ ساناسىن وياتۋ. كىتاپتىڭ كىرىسپەسىندە اي­تىلعانداي, پارسى ادەبيەتىنىڭ كلاسسيگى ءجالالاددين رۋمي «ۇي­قىدا جاتقان حالىقتى وياتۋ ءۇشىن ءبىر ادامنىڭ وياۋ بولۋى جەتكىلىكتى» دەگەن ەكەن. ءوز زامانىنان وزىق تۋعان ۇلاندار ەلىنىڭ قامىن جەپ, قاراڭعى زۇلماتتان جارىق نۇرعا الىپ شىعۋدى كوزدەگەن. قولدارىنا قارۋ ەمەس, قالام ۇستاپ, حالىق­تىڭ ساناسىنا ساۋلە سەبۋگە تىرىسقان. مىرجاقىپ, بايباتىر ءھام ابىلقاسىم دا ناداندىق شەڭگەلىندەگى جۇرتىن «ويان», «تۇر», «جاتپا» دەپ ۇرانداتىپ, وياتۋدى قالادى. ءۇش اقىن دا قوعامدا قوردالانىپ قالعان ەل, جەر, ءدىن, ءبىلىم ماسەلەلەرىن كوتەردى, جىر جولدارىمەن جار­قىن بولاشاققا ۇندەدى. بۇگىن­گىدەي جاھاندانۋ زامانىندا ءوزىنىڭ ۇلتتىق قاينارلارى مەن قۇن­دىلىقتارىنا تەرەڭىرەك ۇڭىلگەن بۇگىنگى ۇرپاقتىڭ وتكەنگە قايىرىلىپ كوز تاستاۋىنا بۇل ءۇش كىتاپتىڭ دا سەپتەسەتىنى انىق. ايگۇل ىسىماقوۆا, م.و.اۋەزوۆ اتىنداعى ادەبيەت جانە ونەر ينستيتۋتىنىڭ باس عىلىمي قىزمەتكەرى, فيلولوگيا عىلىمدارىنىڭ دوكتورى, پروفەسسور