«قازاق ەلى» كايردە توپ جاردى

«قازاق ەلى» انيماتسيالىق ءفيلمى كاير قالاسىندا وتكەن ونىنشى حا­لىقارالىق انيماتسيالىق فيلمدەر فورۋمىنا قاتىسىپ, ءۇش بىردەي جۇلدەگە يە بولدى. ادەتتە, ۇلكەن ىستەر الماتى مەن استانادا اتقارىلاتىنداي كورىنەدى. ال وسى تۇسىنىكتىڭ كوبەسىن شىمكەنتتىك «ساق» ستۋدياسىنىڭ جىگىتتەرى سوكتى. – ءبىزدىڭ ستۋديادا جاسالعان ءفيلمدى كايردەگى حالىقارالىق فو­رۋمعا شاقىرتۋ العان شاكەن ايمانوۆ اتىن­داعى «قازاقفيلم» اق ءوز ءونىم­­دەرىمەن بىرگە جىبەرگەن ەكەن, دەيدى «ساق» ستۋدياسىنىڭ ديرەكتورى نۋريد­دين پاتەەۆ. – كايردە ءوت­كەن فو­رۋم­نىڭ ماڭىزدىلىعى سول, وعان اقش, قىتاي, رەسەي, گەرمانيا, فرانتسيا, وڭتۇستىك كورەيا سىندى مەملەكەتتەر قاتىسقان, 90-نان استام قىسقا مەتراجدى جانە تولىق مەتراجدى فيلم­دەر ۇسىنىلعان. وسىناۋ الاماندا ءبىزدىڭ «قازاق ەلى» ءفيلمى «ەڭ ۇزدىك تولىق مەتراجدى فيلم» جۇلدەسىنە يە بولدى. كارتينانىڭ كومپوزيتورى رۋسلان شىنىقۇلوۆ جانە ءفيلمنىڭ اۋەنىن جازعان مۋزىكانت جانبولات ءادىلوۆ قۇرمەت ديپلومدارىمەن ماراپاتتالدى. – بۇل – قازاق انيماتسياسى سالا­سىن­داعى ەڭ ۇلكەن جەتىستىك, – دەيدى كارتينانىڭ رەجيسسەرى باتىرحان ءداۋ­رەنبەكوۆ. – ءبىز بۇعان دەيىن دە شەت ەلدە وسىنداي جوبالارعا ءفيلمىمىزدى ۇسىنعانبىز. سوندا انيماتسيا سالا­سىنداعى شەتەلدىك ساراپشىلار «قازاق ەلىندەگى» پاتريوتتىق تاربيەنىڭ كو­رىنىسىن جوعارى باعالاعان. بالالاردى پاتريوتيزمگە ءتار­بيەلەۋدە وتە قۇندى دۇنيە بولعان­دىقتان, بارلىق حالىققا كورسەتۋگە بولا­تىن تۋىندى» دەگەن پىكىرلەردى ەستىپ, قۋا­نىپ قالعان ەدىك. ەندى, مىنە, كاير­دەگى فەستيۆال جەڭىستەرى سول ءپى­كىرلەر­دىڭ شىنايىلىعىن دالەلدەدى. – اۋ, اعايىن, جۇلدە قولدارىڭا ءتيدى مە؟ – «قازاق ەلىن» شاكەن اي­ما­نوۆ اتىنداعى «قازاقفيلم» جىبەر­گەنىمەن, ماماندارى بارماعانعا ۇق­سايدى. ءبىزدىڭ ەستۋىمىزشە, بۇل ءجۇل­دەلەردى كايردگى قازاقستان ەلشىسى قابىلداپ العان. ءبۇ­گىندە جولدا كەلە جاتقان بولۋى كەرەك. – ۇلكەن ستۋديالار جاسايتىن جۇ­مىس­تى شاعىن ستۋديامەن-اق اتقارىپ, حالىقارالىق سىندا ۇزدىك شىعىپ جاتاسىڭدار؟ جان-دۇنيەلەرىڭدە نە بولىپ جاتقانىن تۇسىنەمىز. – راس ايتاسىز. وسى حاباردى ەستىگەلى شىمكەنتكە سىيماي ءجۇرمىز. بۇل ءبىزدىڭ ستۋديانىڭ عانا ەمەس, وسى جۇمىسقا تاپسىرىس بەرگەن مادەنيەت جانە سپورت مينيسترلىگىنىڭ, اتاپ ايتقاندا, مينيستر ارىستانبەك مۇحامەدي ۇلى مەن تاريح عالىمدارىنىڭ دوكتورى جامبىل ارتىقباي جانە قازاقتىڭ كورنەكتى جازۋشىسى دۋلات يسابەكوۆ اعالارىمىزدىڭ دە جەڭىسى. «قازاق ەلى» – ۇجىمدىق ەڭبەك. سوندىقتان, بارشا قازاقستاندىقتاردى, ءفيلمنىڭ ءتۇسىرۋ توبىن وسى جەڭىسپەن قۇتتىقتاعىمىز كەلەدى. «ساق» كينوستۋدياسىنىڭ نەگىزىن قالاعان قوس جىگىت وسىلاي دەيدى. قازاقتىڭ العاشقى حاندارى كەرەي مەن جانىبەك ارقىلى ەلىمىزدىڭ تاعدىر بايانى كورسەتىلگەن فيلم وسىلايشا ءىرى جەڭىستەردى باعىندىرا باستادى. باقتيار تايجان, «ەگەمەن قازاقستان» وڭتۇستىك قازاقستان وبلىسى