تۇرمە رەفورماسى تۇرلەنىپ كەلەدى

استانا ورتالىق ازياداعى ايماقتىق «Renal Reform International» وكىلدىگى (حالىقارالىق تۇرمە رەفورماسى) جۋرناليستەرگە ارنالعان ءباسپاسوز كونفەرەنتسياسىن وتكىزدى. «قازاقستانداعى تۇرمە رەفورماسى: ءۇمىت پەن شىندىق» تاقىرىبىندا ۇيىمداستىرىلعان شارا اياسىندا وتكەن جىلعى تۇرمە رەفورماسىنىڭ جاھاندىق ۇردىستەرى مەن ەلىمىزدەگى تۇزەۋ مەكەمەلەرىنىڭ ۇستاۋ جاعدايلارى, سوتتالعانداردىڭ ءدىني راديكالدانۋ ماسەلەلەرى مەن ولاردى قوعامعا قايتا بەيىمدەۋگە قاتىستى تۇيىندەردىڭ جاي-كۇيى تارقاتىلدى. ايماقتىق «Renal Reform International» ديرەكتورى ا.شامبيلوۆ جەتەكشىلىك ەتكەن جيىنعا مەملەكەتتىك, ۇەۇ, حالىقارالىق ۇيىمدار مەن ديپلوماتيالىق ميسسيالاردىڭ وكىلدەرى قاتىسىپ, اشىق ديالوگ الاڭىندا  پىكىر الماستى. الدىمەن ءسوز العان ايماقتىق «RRI» ديرەكتورى ا.شامبيلوۆ  قازاقستاننىڭ تۇرمە رەيتينگىنە قاتىستى كورسەتكىشتەر تۋرالى بىرقاتار دەرەكتەر مالىمدەگەن بولاتىن. ونىڭ ايتۋىنشا, سوڭعى جىلدارى ەلىمىزدىڭ ەكونوميكالىق باسەكەگە قابىلەتتىلىگى مەن ىشكى ساياسي جاعدايدىڭ تۇراقتىلىعى جانە ازاماتتىق قوعامنىڭ بەلسەندى دامۋىنىڭ ناتيجەسىندە, بۇل سالاداعى جاسالىپ جاتقان جۇمىستار الەم ەلدەرى الدىندا وتە جوعارى باعاعا يە بولعان كورىنەدى. «بۇل رەتتە الدىمەن مەملەكەتتىڭ قىلمىستىق زاڭناماداعى گۋمانيستىك ساياساتتى جۇيەلى جۇرگىزۋى مەن وسى باعىتتاعى باعدارلامالىق جوسپارلاردىڭ ءساتتى ورىندالۋىن ەرەكشە اتاپ وتكەن ءجون. اسىرەسە, قازاقستاندا ازاماتتاردى قۇقىقتىق جاۋاپكەرشىلىككە تارتۋ نەمەسە باس بوستاندىعىنان ايىرۋدا ىزگىلەندىرىلگەن جازا ءتۇرى مەن بالامالى ادىستەردىڭ كەڭىنەن قولدانىلۋى كوپتەگەن ەلدەر ءۇشىن ۇلگى الارلىقتاي دەڭگەيگە جەتۋى زور جەتىستىك رەتىندە قابىلدانۋدا», – دەدى ا.شامبيلوۆ. جالپى, كونفەرەنتسيا اياسىندا بايانداماشىلار مەن قاتىسۋشىلار تاراپىنان تۇرمەدەگىلەردىڭ دەنساۋلىق ساقتاۋ جۇيەسى مەن سوتتالعانداردىڭ قۇقىقتىق قورعالۋى جانە تۇرمە قىزمەتىندەگى وزەكتى ماسەلەلەردىڭ ىشكى ىستەر مينيسترلىگى تاراپىنان شىعارىلىپ, دەربەس اگەنتتىك رەتىندە قۇرىلۋىنا قاتىستى تۇيىندەر دە تىلگە تيەك ەتىلدى. سونىمەن قاتار, 2015-2016 جىلدارداعى ازاپتاۋلار مەن ولار بويىنشا قوزعالعان ىستەر سانىنىڭ ستاتيستيكالىق دەرەكتەرى, قازاقستانداعى تۇرمە ستاتيستيكاسى مەن ونىڭ تالداۋ ماتەريالدارى ينفوگرافيكا رەتىندە ۇسىنىلىپ, جۇرتشىلىق نازارىنا «بوستاندىق جوق مەكەندەر» تاقىرىبىندا ارنايى فوتوكورمە ۇيىمداستىرىلدى. نۇرلىبەك دوسىباي, «ەگەمەن قازاقستان»