ەكسپو-2017 اياسىندا ۇزدىك ستارتاپ جوباعا 20 مىڭ ەۋرو سىياقى بەرىلەدى

ەكسپو-2017 اياسىندا ۇزدىك ستارتاپ جوباعا 20 مىڭ ەۋرو سىياقى بەرىلەدى. بۇل تۋرالى بۇگىن ەلورداداعى تاۋەلسىزدىك سارايىندا ءوتىپ جاتقان ەكسپو-2017 كورمەسىنە قاتىسۋشىلاردىڭ ءۇشىنشى جينالىسى اياسىندا ۇيىمداستىرىلعان ءباسپاسوز ءماسليحاتىندا حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەس ءمالىم ەتتى, دەپ حابارلايدى قازاقپارات. ونىڭ  ايتۋىنشا, ەلوردادا وتەتىن حالىقارالىق كورمە اياسىندا ستارتاپتار اراسىندا ويناتىلاتىن EXPO-Cosmos  سىيلىعىن تابىستاۋ ءراسىمى ۇيىمداستىرىلادى. «بۇل حالىقارالىق كورمەلەر بيۋروسى مەن ەكسپو-90 قورى نەگىزىن قالاعان الەۋمەتتىك جوبا سانالادى. ول كورمە اياسىندا وسىمەن بەسىنشى رەت تابىس ەتىلمەك. سىياقىنىڭ كولەمى 20 مىڭ ەۋرونى قۇرايدى», - دەدى ول. لوسسەرتالەستىڭ ايتۋىنشا, جوبانى دامىتۋعا ارنالعان ستارتاپ تۇرىندەگى سىياقى ادەتتە الەۋمەتتىك سالاداعى ۇزدىك يننوۆاتسيالىق جوبالارعا بەرىلەدى. «استانادا باستى تاقىرىپ بولاشاق ەنەرگياسى بولماق. سوندىقتان  سىيلىق ەكولوگيامەن بايلانىستى باستامالاردى قولداۋعا جانە دامىتۋعا ارنالاتىن بولادى», - دەپ ناقتىلادى  حالىقارالىق كورمەلەر بيۋروسىنىڭ باس حاتشىسى. ايتا كەتەرلىگى, ەكسپو-2017 حالىقارالىق مامانداندىرىلعان كورمەسى ۇستىمىزدەگى جىلدىڭ 10 ماۋسىمىندا باستالىپ, 10 قىركۇيەكتە اياقتالادى. كورمەگە 2 ميلليوننان استام ادام كەلەدى دەپ كۇتىلۋدە. ولار كورمەنى كەمىندە ەكى مارتە ارالايدى دەپ جوسپارلانعان. جالپى كورمەنى تاماشالاۋشىلاردىڭ 85 پايىزىن قازاقستان ازاماتتارى, ال قالعان 15 پايىزىن شەتەلدىكتەر قۇرايدى. شەتەلدىكتەردىڭ باسىم بولىگىن تمد ەلدەرىنىڭ جانە قىتايدىڭ ازاماتتارى قۇرايدى دەپ كۇتىلۋدە. قازىرگى ۋاقىتتا 112 مەملەكەت پەن 18 حالىقارالىق ۇيىم ەكسپو كورمەسىنە قاتىساتىندىعىن رەسمي تۇردە راستاپ وتىر.