Discovery قازاقشا سويلەيدى

ءبىرىنشى ناۋرىزدان باستاپ ەلىمىزدە Discovery Showcase HD تەلەارناسى حابار تاراتا باستايدى, ول ۋاقىت وتە قازاق تىلىنە وتەدى. بۇل تۋرالى "قازتەلەراديو" اكتسيونەرلىك قوعامى ءباسپاسوز قىزمەتى ءمالىم ەتتى, دەپ جازادى abctv.kz. اعىمداعى جىلدىڭ 1 ناۋرىزىنان باستاپ Discovery Networks CEEMEA, سەرىكتەسى — "قازتەلەراديو" اكتسيونەرلىك قوعامىمەن بىرلەسە وتىرىپ, قازاقستاندا جاڭا — Discovery Showcase HD ارناسىن ىسكە قوسادى. ول Discovery برەندتەرى پورتفوليوسىنان ەڭ جارقىن جانە ەڭ تانىمال شوۋلارىن بىرىكتىرەدى — Discovery Channel, Animal Planet, TLC, Discovery Science جانە ID Xtra, بۇل رەتتە تانىمدىق-ويىن-ساۋىقتىق كونتەنت  HD ساپادا قولجەتىمدى بولماق. سونىمەن قاتار, كورەرمەندەرگە ەكسكليۋزيۆتى ماتەريالدار كورسەتىلەتىن بولادى, ارينە تەك Discovery Showcase HD ارناسى ارقىلى.  Discovery Showcase HD شەتەلدىك ارنالاردىڭ العاشقىسى بولىپ قازاقستان رەسپۋبليكاسى اۋديتورياسىنا سۇيىكتى شوۋ باعدارلامالارىن HD ساپادا مەملەكەتتىك تىلدە كورۋدى ۇسىنادى. ءبىرىنشى كەزەڭدە كورەرمەنگە تەلەباعدارلامالار قازاق تىلىندە پرايم-تايم ۋاقىتىندا ۇسىنىلادى (18:00-دەن ءتۇن ورتاسىنا دەيىن). جىل بويى قازاق تىلىندەگى باعدارلامالارىنىڭ ۇلەسى ۇلعاياتىن بولادى جانە 2018 جىلعى قاڭتاردان باستاپ بارلىق مازمۇنى تولىعىمەن قازاقشالانادى. سونىمەن بىرگە, كورەرمەن ءوزىنىڭ قابىلداعىشىنىڭ پارامەترلەرىنەن ارنانى ورىس تىلىندە كورۋدى تاڭداي الادى. ءبىرىنشى بولىپ قازاق تىلىنە "مورگان فريمەنمەن جاھان قۇپيالارىن تانۋ", "تاڭعالارىق مۇحيت", "الياسكا: ورمانداعى وتباسى", "كيت اۋلاۋعا قارسى سوعىس" سىندى باعدارلامالارى جانە Discovery Networks-تىڭ باسقا دا ماڭىزدى جوبالارى اۋدارىلادى. "قازاقستان — Discovery Networks ءۇشىن ادال جانە وتە ماڭىزدى اۋديتورياسى مەن ۇلكەن الەۋەتى بار ايماق. ءبىز كورەرمەندەرگە ەڭ جارقىن, تانىمال جانە قىزىقتى باعدارلامالاردى بىرىكتىرەتىن جوعارى ايقىندىق فورماتىنداعى Discovery-ءدىڭ جاڭا تەلەارناسىن ۇسىنعانىمىزعا وتە قۋانىشتىمىز", — دەيدى Discovery Networks كومپانياسىنىڭ سولتۇستىك-شىعىس ەۋروپاداعى ۆيتسە-پرەزيدەنتى, باسقارۋشى ديرەكتورى اننا پاك.