اۋا رايىنا بايلانىستى پويىزدارعا قوسىمشا 40 ۆاگون تىركەلدى

قولايسىز اۋا رايى جاعدايىنا جانە بىرقاتار اۆتوجولداردىڭ جابىلۋىنا بايلانىستى, قوسىمشا ۆاگوندار تىركەۋ جۇمىستارى جالعاسۋدا, دەپ حابارلايدى «جولاۋشىلار تاسىمالى» اق ءباسپاسوز قىزمەتى. بۇعان دەيىن «قازاقستان تەمىر جولى» ۇك» اق باسشىسى قانات الپىسباەۆ قىسقى ۋاقىتتا تەمىر جول كولىگىنىڭ ۇزدىكسىز جۇمىسىمەن قامتاماسىز ەتۋ جانە «قازاقاۆتوجولمەن», قر ءىىم تج كوميتەتىمەن بىرلەسىپ, كۇردەلى مەتەوجاعدايدا جولاۋشىلار تاسىمالىن ۇيىمداستىرۋ ماسەلەلەرى بويىنشا ارنايى جينالىس وتكىزدى. جينالىستا قوسىمشا تىركەمەلەردى جۇزەگە اسىرۋ ءۇشىن ۆاگونداردىڭ تەحنولوگيالىق رەزەرۆتەرىن بارىنشا قولدانۋ تاپسىرىلدى. سونداي-اق, توتەنشە جاعدايدا ۇزىن قۇرامدى پويىز جاساقتاۋعا, جولاۋشىلاردى بارىنشا تاسىمالداۋ ءۇشىن قوزعالىس قاۋىپسىزدىگىنە نۇقسان كەلتىرمەيتىن وزگە شارالاردى جاساۋعا رۇقسات بەرىلدى. وسىلايشا, جاقىن كۇندەرى پويىزدارعا قوسىمشا 40 ۆاگون تىركەلدى, بۇل 2,5 مىڭنان استام جولاۋشىنى تاسىمالداۋعا مۇمكىندىك بەرەدى. كۇردەلى قىسقى كەزەڭدە تەمىر جولشىلار كۇشەيتىلگەن رەجيمدە جۇمىس ىستەپ جاتىر.