جانات جاقيانوۆ: «قارسىلاسىم وسال بولعان جوق»

ورتالىق كوممۋنيكا­تسيالار قىزمەتىندە كاسىپ­قوي بوكسشى جانات جاقيانوۆپەن بريفينگ ءوتتى. بىلعارى قولعاپ شەبەرى 10 اقپاندا اقش-تىڭ تولەدو قالا­سىندا امەريكالىق روشي ۋوررەنمەن جۇ­دىرىق ءتۇيىستىرىپ, اسا جەڭىل سالماقتا WBA (Super) جانە IBO تۇ­جىرىمى بويىنشا چەمپيون اتاعىن جەڭىپ العان ەدى. كەزدەسۋ بارىسىندا بوكسشى ءباسپاسوز ءماسليحاتىن وتكىزىپ, قۇ­­راما شتاتتاردا ءوت­كەن جەكپە-جەك تۋرالى اڭگى­مەلەپ بەردى. كەزدەسۋدە جاقيانوۆ روشي ۋوررەنمەن ايقاستىڭ وڭاي بولماعانىن, جەكپە-جەكتىڭ بارلىق راۋندتارىندا جاتتىقتىرۋشىسى ريككي حاتتوننىڭ اقىل-كەڭەستەرىن تىڭداپ, قارسىلاسىنا ەشقان­داي مۇمكىندىكتى بەرمەۋگە تىرىسقانىن ايتتى. – مەنىڭ قارسىلاسىم وسال بولعان جوق. ول كە­زىندە WBA (Super) جانە IBO تۇجىرىمى بويىنشا الەم چەمپيونى اتاعىن يەلەنگەن. وسى جەكپە-جەكتە ۋوررەننىڭ اتاعىن جەڭىپ الدىم. ءبىرىنشى راۋندتا ۋوررەننىڭ سوققىلارىنىڭ جوي­قىن بولاتىنىن بىلگەن­مىن. رينگكە سوعان دايىندالىپ شىقتىم. جەكپە-جەكتىڭ باسىندا ەكى رەت نوكداۋن الىپ قالدىم. بىراق, كەزدەسۋ تىزگىنىن ءوزىمنىڭ قولى­ما الىپ, جەكپە-جەكتى جە­ڭىسپەن اياقتادىم. ەل نامىسى سىنعا ءتۇسىپ جاتقاندا جەڭىلۋ دەگەندى بىلمەيمىن, بىلگىم دە كەلمەيدى. سودان بولار, جەكپە-جەكتە ارقام قىزىپ, ۋوررەندى قۋالاپ ءجۇرىپ سوققىلاعىم كەلدى. ول «بەسىنشى بۇرىشتى» ىزدەپ كەتكەندە بوساڭسىماي, ىشىمنەن شارۋانى سول جەردە تىندىرۋ كەرەك دەپ شەشتىم. شارشى الاڭدا ايقىن با­سىم­دىقپەن جەڭگەنىمدى سەزدىم. قا­زىلار القاسى دا ماعان باسىم داۋىسپەن باعا بەردى, – دەدى ول. بريفينگتە جاقيانوۆ وسى ايقاسقا WBA جانە IBO تۇجىرىمى بويىنشا ءبىرىنشى ورتا سالماقتاعى الەم چەمپيونى ريككي حاتتوننىڭ جەتەكشىلىگىمەن داي­ىن­دال­عانىن, جاتتىعۋ­لار­دىڭ ءبارى ۇلى­بري­تانيادا ءوت­كەنىن ايتتى. – ريككي حاتتون تاماشا جاتتىقتىرۋشى. مەن ونىڭ كومانداسىمەن بىرنەشە جىلدان بەرى جۇمىس ىستەپ كەلەمىن. ول 2007 جىلى كاسىپقوي بوكسقا كەلگەنىمدە مەنى بايقاپ, وزىنە شاقىردى. سودان بەرى بۇگىنگە دەيىن 28 جەكپە-جەك وتكىزىپ, 27 رەت جەڭىسكە جەتتىم. ءبىزدىڭ جاتتىعۋلار ۇلىبريتانيادا وتەدى. ول جاقتا ءبارى جاقسى ۇيىمداستىرىلعان. مىسالى, سوڭعى جەكپە-جەككە 10 اپتا دايىندالدىم, – دەدى جانات جاقيانوۆ. سونىمەن بىرگە, ول شەت ەلدەن شاقىرتۋلار كەلىپ جاتسا ەشقايدا كەتپەيتىنىن مالىمدەدى. وزىنە قولداۋ كورسەتىپ, دەمەۋشىلىك جاساپ جاتقان سولتۇستىك قازاق­ستان وبلىسىنىڭ اكىمدىگى مەن جەر­گىلىكتى سپورت باسقارماسىنا العىسىن بىلدىرەتىنىن ايتتى. – مەن ەشقايدا كەتپەيمىن. كەتكىم دە كەلمەيدى. مەنىڭ وتانىم – قازاقستان. قازاق ەلىنىڭ نامىسىن قاي جەردە بولسا دا قورعاپ, اسپان ءتۇستى تۋىمىزدى بيىكتە جەلبىرەتىپ جۇرەمىن. قازىر پەتروپاۆل قالاسىندا وبلىستىق بالالار جانە جاسوسپىرىمدەرگە ارنالعان مەكتەپ-ينتەرناتتا جاتتىقتىرۋشى بولىپ قىزمەت ەتەمىن. بيىل ءبىزدىڭ مەكتەپتىڭ ءۇش تاربيەلەنۋشىسى «سپورت شەبەرى» اتاندى. الداعى كەزدە دە سپورت ورداسىنان تالاي جاس تالانتتى بوكسشىلاردىڭ تۇلەپ شىعاتىنىنا سەنىمدىمىن. قازىر وبلىستا بوكسقا قىزى­عاتىن بالالار كوپ. مۇ­نىڭ ءبارى وبلىس اكىمى مەن سپورت باسقارماسىنىڭ سپورت مەك­تەپتەرىنە كورسەتىپ جاتقان قولداۋىنىڭ ارقاسى, – دەيدى بوكسشى. كەزدەسۋ سوڭىندا جاقيا­نوۆ كەلەسى قارسىلاسى دجەيمس ماك­دونالدستىڭ بولۋى ءمۇم­كىن ەكەنىن ايتتى. داستان كەنجالين, «ەگەمەن قازاقستان» استانا