بەس ميلليونعا تارتا ادامدى قامتيتىن, الەمدىك ماڭىزى بار, عىلىمنىڭ ناعىز سونى جاڭالىقتارىنىڭ الاڭىنا اينالاتىن ەكسپو حالىقارالىق مامانداندىرىلعان كورمەسى قازاقتىڭ استاناسىنا ۇلكەن جاۋاپكەرشىلىك جۇكتەيدى. بايراقتى شاراعا ازىرلىك جۇمىستارى الدەقاشان باستالىپ كەتكەن. قوعامدىق ءتارتىپتى قاداعالاپ, ادامداردىڭ قاۋىپسىزدىگىن كۇزەتەتىن ءتارتىپ ساقشىلارىنىڭ دا دايىندىعى كوڭىل كونشىتەدى.
تاۋلىك بويى تىك تۇرعان
كورمە وتەتىن ءۇش اي بويى ىشكى ىستەر مينيسترلىگىنىڭ قىزمەتكەرلەرى, وقۋ ورىندارىنىڭ كۋرسانتتارى, قورعانىس مينيسترلىگىنىڭ اسكەريلەرى جانە مەملەكەتتىك ەمەس كۇزەت قۇرىلىمدارىنىڭ ماماندارى – بارلىعى 9 000-عا جۋىق ادام قوعامدىق ءتارتىپتى قاداعالاۋعا جانە قاۋىپسىزدىكتى ساقتاۋعا جۇمىلدىرىلادى. قازىرگى ۋاقىتتا, كورمە كەشەنىنىڭ اۋماعىندا نىسانداردىڭ قۇرىلىسى جانە پايدالانۋعا تاپسىرۋ كەزەڭىندە ەلوردالىق ىشكى ىستەر دەپارتامەنتىنىڭ جۇزدەن اسا قىزمەتكەرى, ۇلتتىق ۇلاننىڭ جاۋىنگەرلەرى قاۋىپسىزدىكتى تاۋلىك بويعى رەجىمدە قامتاماسىز ەتۋدە. ولارعا باقىلاۋ-وتكىزۋ بەكەتتەرىن ۇيىمداستىرۋ جانە جاياۋ پاترۋلدەۋ قىزمەتتەرى جۇكتەلگەن. ەكسپو قالاشىعىندا ۋچاسكەلىك پوليتسيا بەكەتى جۇمىس ىستەيتىن بولادى. وندا 6 ۋچاسكەلىك پوليتسيا ينسپەكتورى قىزمەت اتقارادى. سونىمەن قاتار, كورمەنىڭ لوگيستيكالىق ورتالىعى دا قولدانىسقا ەنگىزىلەدى, وندا اۆتوكولىكتەردى تەكسەرۋدى ەكى ءموبيلدى ينسپەكتسيا-تەكسەرۋ كەشەنى جۇرگىزەدى. 16 پوليتسيا قىزمەتكەرى كىرەتىن كەشەندەردىڭ پەرسونالى ارنايى وقىتىلدى. سونىڭ ءىشىندە رادياتسيالىق قاۋىپسىزدىكتى قامتاماسىز ەتۋ بويىنشا دا دايىندىقتان ءوتتى.ساقشىلار اعىلشىنشا سويلەيدى
كورمە قارساڭىندا ەلوردا پوليتسياسىنىڭ جەكە قۇرامىنا كورمە قوناقتارىنىڭ قاۋىپسىزدىگىن قامتاماسىز ەتۋ, نىسانداردى كۇشەيتۋ جانە قىلمىستار مەن قۇقىق بۇزۋشىلىقتاردىڭ الدىن الۋ ءۇشىن قويىلعان مىندەتتەردى ورىنداۋ جاۋاپكەرشىلىگى ارتىلىپ وتىر. سونداي-اق, شارانىڭ جوعارى مارتەبەسى ەسكەرىلىپ, پوليتسيا قىزمەتكەرلەرىنىڭ كاسىبي جانە قىزمەتتىك دايىندىعىنا باسا نازار اۋدارىلادى. ەكسپو بارىسىندا قوعامدىق ءتارتىپتى قاداعالاۋعا تارتىلاتىن ىشكى ءىستەر ورگاندارىنىڭ الپىسقا جۋىق قىزمەتكەرى پروفايلينگ ءادىسىن مەڭگەردى. بۇل – جەكە بەلگىلەردى, سىرتقى كەلبەتىنىڭ سيپاتتامالارىن, ۆەربالدى جانە ۆەربالدى ەمەس ءتارتىبىن تالداۋدىڭ نەگىزىندە ادامنىڭ ارەكەتتەرىن بولجاۋدىڭ پسيحولوگيالىق ادىستەرى مەن ءادىستەمەلەرىنىڭ جيىنتىعى. سونىمەن قاتار, كورمەنىڭ اشىلۋىنا وراي تاعى ءبىر مىڭ پوليتسيا قىزمەتكەرى اعىلشىن ءتىلىن مەڭگەرمەك. كۋرستار اپتاسىنا ءۇش رەت لينگافوندىق قۇرال-جابدىقتارى بار ءبولمەدە وتەدى. وندا اعىلشىن ءتىلىندە قارىم-قاتىناس ەرەجەلەرى دە ءۇيرەتىلەدى. پوليتسيا قىزمەتكەرلەرىن جوعارى ءبىلىكتى پەداگوگتار وقىتادى, ولار پوليتسيانىڭ ءتىلدىك ەرەكشەلىگىنە بەيىمدەلگەن ادىستەمەلەردى قولدانادى. بۇل ءوز كەزەگىندە شەتەلدىك ازاماتتاردىڭ ءوتىنىشتەرىنە جەدەل جاۋاپ بەرۋگە مۇمكىندىك بەرىپ, پوليتسيانىڭ يميدجىنە وڭ ىقپال ەتەدى.بەينەباقىلاۋ تىنىشتىقتى بەكەمدەيدى
وتكەن جىلى جەدەل باسقارۋ ورتالىعىنىڭ قىزمەتكەرلەرى بەينەباقىلاۋ جۇيەلەرىنىڭ كومەگىمەن 444 قىلمىستىق ءىستى, 67 659 اكىمشىلىك قۇقىق بۇزۋشىلىقتى جانە جول ەرەجەلەرىن بۇزۋدىڭ 23 953 دەرەگىن انىقتاعان بولاتىن. بۇگىندە ەلوردادا 800-گە جۋىق بەينەباقىلاۋ كامەراسى بار. بۇل ءتارتىپ ساقشىلارىنىڭ قىلمىستاردىڭ الدىن الۋىن جانە ولاردى اشۋ جۇمىستارىن ەداۋىر جەڭىلدەتەتىنى راس. بيىل وتەتىن ەكسپو-2017 حالىقارالىق كورمەسىنە وراي قالا ماڭى اۋماعىن قامتي وتىرىپ, تاعى دا 2 مىڭنان استام بەينەكامەرا ورناتۋ جوسپارلانۋدا. سونىمەن بىرگە, 80 كوشە قيىلىسىندا, 50 جەلىلىك ۋچاسكەدە فوتو جانە بەينەتىركەۋ كەشەندەرىن ورناتۋ كوزدەلگەن. مامانداردىڭ ايتۋىنشا, بۇل جۇمىستار اۋقىمدى شارا بارىسىندا قوناقتار مەن قالا تۇرعىندارىنىڭ قاۋىپسىزدىگىن, تىنىشتىعىن قامتاماسىز ەتۋگە سەپتەسەدى. اسحات رايقۇل, «ەگەمەن قازاقستان»
