جاپونيانىڭ اپاتتى «فۋكۋسيما-1» اەس-ىندە جاڭا جارىلىس بولۋ قاۋپى تۋىنداپ وتىر.
جارىلىس بولۋ قاۋپىنىڭ الدىن الۋ ءۇشىن رەاكتورعا گاز تۇرىندەگى ازوت جىبەرىلگەن. جارىلىسقا اتوم ەلەكتر ستانساسىنىڭ ەنەرگوبلوكتارىندا قايتادان جيناقتالا باستاعان سۋتەگىنىڭ سەبەپكەر بولۋى مۇمكىن. ءبىرىنشى رەاكتوردا سۋتەگىنىڭ جوعارى كونتسەنتراتسياسىنىڭ بار ەكەنى انىقتالىپ وتىر. گاز جىبەرۋ پروتسەدۋراسى بىرنەشە كۇنگە سوزىلماق. گاز ايداۋ جۇمىستارىنىڭ باسىندا اۋاعا رادياتسيانىڭ تارالۋى مۇمكىن, سوندىقتان ءتورت ەنەرگوبلوكتىڭ جۇمىسشىلارى ۋاقىتشا ەۆاكۋاتسيالاناتىن بولادى.
گااگا سوتى تەرگەۋ جۇرگىزبەك
حالىقارالىق گااگا سوتىنىڭ وكىلدەرى وزدەرىنىڭ كوت-د’ يۆۋارداعى وقيعالاردى رەسمي تۇردە تەرگەۋدى باستايتىندىقتارى تۋرالى مالىمدەدى.
مۇندا باتىس قولداۋ كورسەتىپ وتىرعان الاسسان ۋاتتار مەن ەلدىڭ قازىرگى پرەزيدەنتى لوران گباگبونىڭ اراسىندا كەسكىلەسكەن كۇرەس توقتاماي وتىر. سونىمەن بىرگە, اقش وكىمەتىنىڭ مالىمەتتەرى بويىنشا, گباگبو قازىرگى كەزدە ءوزىنىڭ وتستاۆكاعا كەتەتىندىگى تۋرالى بۇۇ وكىلدەرىمەن كەلىسسوزدەر جۇرگىزۋدە. وتكەن اپتادا حالىقارالىق قىزىل كرەست قوعامىنىڭ وكىلدەرى دۋەكۋە قالاسىندا 800-دەن استام ادامنىڭ مۇردەلەرىن تاپقان بولاتىن. حالىقارالىق سوتتىڭ تەرگەۋ جۇرگىزۋىنە دە وسى ءجايت سەبەپكەر بولعان سياقتى.
بوسقىندار وتىرعان قايىق سۋعا باتىپ كەتتى
بورتىندا افريكادان شىققان 200-گە جۋىق ميگرانتتار بار قايىق يتاليانىڭ لامپەدۋزا ارالى جاعالاۋىندا شتورم كەزىندە سۋعا باتىپ كەتكەن بولاتىن.
يتاليالىق باق-تاردىڭ حابارلاۋىنشا, بوسقىندار وتىرعان قايىق ارالعا بىرنەشە ميل قالعاندا وراسان داۋىلعا تاپ بولعان. قازىرگى كەزدە 47 ادامنىڭ قۇتقارىلعانى تۋرالى بەلگىلى بولىپ وتىر. اۋا رايىنىڭ قولايسىزدىعىنا قاراماستان, جەرگىلىكتى بالىقشىلار كەمەلەرىن تارتا وتىرىپ جۇرگىزىلگەن قۇتقارۋ-ىزدەستىرۋ جۇمىستارى ودان ءارى جالعاسۋدا.
كونسۋلدىققا شابۋىل جاسالدى
ليۆيالىق ەرەۋىلشىلەر وزدەرىنىڭ قول استىنداعى بەنگازي قالاسىنداعى ءتۇركيانىڭ باس كونسۋلدىعىنا قارۋلى شابۋىل جاساعان.
يتار-تاسس اگەنتتىگىنىڭ حابارلاۋىنشا, قارۋلانعان 400-گە تارتا ادام تۇركيا پرەمەر-ءمينيسترى تايپ ەردوگاننىڭ انكارا ەرەۋىلشىلەردى قارۋلاندىرۋعا نيەتتى ەمەس دەگەن مالىمدەمەسىنە نارازىلىق رەتىندە كونسۋلدىقتى باسىپ الۋعا تالپىنعان. تارتىپسىزدىكتەردى توقتاتۋ ءۇشىن كونسۋلدىققا ليۆيانىڭ وتپەلى ۇلتتىق كەڭەسىنىڭ قاۋىپسىزدىك كۇشتەرى تارتىلعان كورىنەدى. قازىرگى كەزدە ديپلوماتيالىق ميسسيانى كۇزەتۋ بارىنشا كۇشەيتىلگەن.
وباما الداعى سايلاۋعا تۇسپەك
ءوزىنىڭ 2012 جىلى اقش-تا وتەتىن پرەزيدەنتتىك سايلاۋعا رەسمي تۇردە تۇسەتىنى تۋرالى حابارلاي وتىرىپ, باراك وباما ەندىگى جەردە قول جەتكىزىلگەن پروگرەستى ساقتاپ, دامىتۋ ءۇشىن كۇرەسۋ قاجەتتىگىن اتاپ كورسەتكەن.
ءبىر قىزىعى, ءوزىنىڭ سايلاۋعا ەكىنشى رەت تۇسەتىنى جونىندە حابارلاعان كۇنى وبامانىڭ ءوزى حالىق الدىندا كوزگە تۇسپەگەن ەكەن. جاڭالىق تاڭعى ساعات 5-تە امەريكا باسشىسىنىڭ قازىرگى زامانعى اقپاراتتىق تەحنولوگيالارعا اۋەستىگىمەن ءمالىم جاقتاستارىنا ەلەكتروندى پوشتا ارقىلى تاراپ كەتكەن كورىنەدى. ءتىپتى «ءبارى بىزدەن باستالادى» دەپ اتالاتىن بەينەروليكتەگى ءماتىننىڭ ءوزى وبامانىڭ قولىمەن ەمەس, وعان قولداۋ كورسەتەتىن سايلاۋشىلاردىڭ قولىمەن جازىلعانعا ۇقسايدى.
سوت وتىرىسى كەيىنگە قالدىرىلدى
يتاليا پرەمەر-ءمينيسترى سيلۆيو بەرلۋسكوني ونىڭ كامەلەتكە تولماعان بيشىمەن زاڭسىز قارىم-قاتىناسقا بارعانى تۋرالى ءىس قاراعان سوتتىڭ ءبىرىنشى وتىرىسىنا كەلمەي قالعان.
ەڭ باستى كۇدىكتىنىڭ بولماۋىنا بايلانىستى سوتتاعى بولاتىن تىڭداۋ 31 مامىرعا قالدىرىلىپ وتىر. تەرگەۋدىڭ پايىمداۋىنشا, يتاليا ۇكىمەتىنىڭ باسشىسى ءوزىنىڭ ۆيللاسىندا وسى ماقساتتار ءۇشىن ارنايى جالدانعان جەزوكشەلەردىڭ قاتىسۋىمەن ادەپسىز ارەكەتتەرگە بارعان. پروتسەستە كەم دەگەندە سول كەشكە قاتىسقان 33 ايەل, سول سياقتى امەريكالىق كينواكتەر دجوردج كلۋني, پورتۋگاليالىق فۋتبولشى كريشتيانۋ رونالدو جانە يتاليا سىرتقى ىستەر ءمينيسترى فرانكو فراتتيني كۋاگەر بولادى دەپ كۇتىلۋدە.
يزرايل ارەكەتى الاڭداۋشىلىق تۋدىرۋدا
امەريكا قۇراما شتاتتارى يەرۋساليم قالاسىنىڭ گيلو كۆارتالىندا 900 تۇرعىن ءۇي سالۋ تۋرالى ءيزرايلدىڭ ارەكەتىنە ۇلكەن الاڭداۋشىلىق بىلدىرۋدە.
مەملەكەتتىك دەپارتامەنت يزرايل مەن پالەستينا اۆتونومياسىنىڭ ەكى حالىقتىڭ بەيبىتشىلىككە دەگەن ۇمتىلىسىن جۇزەگە اسىرۋ ءۇشىن قامقورلىق تانىتۋى قاجەتتىگىن اتاپ كورسەتكەن. بۇۇ-نىڭ تاياۋ شىعىستاعى ارنايى وكىلى روبەرت سەري امەريكانىڭ گيلودا تۇرعىن ءۇي قۇرىلىسىن جۇرگىزۋ جونىندەگى يزرايل شەشىمىن سىناۋىنا قولداۋ كورسەتىپ وتىر. ونىڭ ايتۋىنشا, بۇل ارەكەت حالىقارالىق قۇقىق نورمالارىنا قايشى كەلەدى.
امەريكالىقتاردى قۇتقارعانى ءۇشىن العىس ايتتى
بۇرناعى كۇنى كەشكىلىك ۋكراينا اسكەري-تەڭىز كۇشتەرىنىڭ دەسانتتىق ءىرى كەمەسى 13 ەلدىڭ 79 ازاماتىن تريپوليدەن مالتانىڭ ۆالەتتا پورتىنا جەتكىزگەن.
قازىر «كونستانتين ولشانسكي» دەپ اتالاتىن كەمەدە جۇزدەن استام ادام قالىپ وتىر. ولاردىڭ دەنى ۋكراينا ازاماتتارى. تاياۋ كۇندەرى اتالمىش كەمە ولاردى سەۆاستوپول پورتىنا جەتكىزەتىن بولادى. ءوز كەزەگىندە اقش-تىڭ ۋكريناداعى ەلشىسى دجون تەففت ليۆيادان امەريكالىق ازاماتتاردى الىپ شىققانى ءۇشىن ۋكراينا ۇكىمەتىنە العىسىن بىلدىرگەن.
ينتەرنەت ماتەريالدارى نەگىزىندە ازىرلەندى.
