ابىلاي مىرزاحمەتوۆ كاسىپكەرلىكتىڭ دامۋىنا كەدەرگىلەردى اتادى

يندۋستريالىق ايماقتاردىڭ جۇمىسى كاسىپكەرلەردىڭ كوڭىلىنەن شىقپايدى. بۇل تۋرالى بۇگىن باق وكىلدەرىنە ءباسپاسوز ءماسليحاتىن وتكىزگەن «اتامەكەن» ۇلتتىق كاسىپكەرلەر پالاتاسى باسقارماسىنىڭ توراعاسى ابىلاي مىرزاحمەتوۆ ايتتى, دەپ حابارلايدى قازاقپارات. «راسىن ايتساق, كاسىپكەرلەردىڭ بارلىعى دا جەرگىلىكتى جەردە, ناقتى ءبىر ايماقتا قىزمەتىن جاسايدى. سوندىقتان جەرگىلىكتى اتقارۋشى ورگانداردىڭ كاسىپكەرلىكتى دامىتۋداعى مىندەتى, جاۋاپكەرشىلىگى جولداۋدا ناقتى ايتىلعان. وسى ۋاقىتقا دەيىن كاسىپكەرلىكتى دامىتۋعا جەرگىلىكتى بيلىك تە قاتىسىپ ءجۇردى. بىراق, بايقاساڭىزدار جەرگىلىكتى بيلىك كوبىنەسە الەۋمەتتىك سالاعا ءمان بەرەدى», - دەدى ول. باسقارما توراعاسى وسى رەتتە جەرگىلىكتى كاسىپكەرلىكتىڭ دامۋىنا كەدەرگى بولاتىن جايتتاردى دا اشىپ ايتتى. «ءبىزدىڭ ءار اۋدانعا دەيىن فيليالىمىز بار. سوندىقتان جەرگىلىكتى جەرلەردەگى كاسىپكەرلىك جايىنان حاباردارمىز. تاياۋدا ەلباسىنىڭ قابىلداۋىندا بولعانىمىزدا دا بايان ەتكەنبىز. جەرگىلىكتى جەرلەردەگى كاسىپكەرلەردىڭ تولعاندىراتىن ماسەلەنىڭ ءبىرى - جەر. جەرگىلىكتى جەرلەردە جەر تەلىمدەرىنىڭ كاسىپكەرلەرگە ەش كەدەرگىسىز, قاعازباستىلىقسىز, اشىق, جاريا تۇردە بەرىلۋى ءالسىز جۇرۋدە. وكىنىشكە قاراي ونلاين الاڭدار دۇرىس جۇمىس ىستەمەۋدە. ەكىنشى ماسەلە قۇرىلىس سالۋعا قاجەت قۇجاتتاردى الۋداعى قيىندىقتار بولىپ وتىر. مۇنان بولەك كەيبىر سالىقتار دا بار. قازىر بىزدە 60-قا جۋىق يندۋستريالدىق ايماق جۇمىس ىستەۋدە. بىراق ولاردىڭ جۇمىستارى كاسىپكەرلەردىڭ كوڭىلىنەن شىقپايدى. الەۋمەتتىك-كاسىپكەرلىك كورپوراتسيالارى بار. ولاردىڭ جۇمىستارى دا كاسىپكەرلەر ءۇشىن كومەسكى», - دەدى مىرزاحمەتوۆ. ياعني, ونىڭ پايىمىنشا, جەرگىلىكتى اكىمدىكتەردىڭ قولىندا كاسىپكەرلەرگە سانالۋان اۋقىمدى قۇرالدار بولعانىمەن ءتيىمسىز بولىپ وتىر. «وتكەن جىلى ءبىز 6 وبلىستا ىلكى جوبانى جۇزەگە اسىردىق. وسى رەتتە قىزىلوردا, ماڭعىستاۋ وبلىستارى اكىمدىكتەرىنە ريزاشىلىعىمدى بىلدىرگىم كەلەدى. ولار كاسكەرلىكتى دامىتۋعا بولىنگەن قارجىعا تالاسپاي, ونى كاسىپكەرلەر پالاتاسىنا بەردى. ول اقشالار 100 پايىزعا دەيىن قايتارىلۋدا. ماسەلەن, ماڭعىستاۋ وبلىسىندا جەرگىلىكتى بيۋدجەتتەن دە قارجى ءبولىنىپ جاتىر. مۇنان شىعارى ءار اكىمنىڭ رەيتينگى بولۋى كەرەك. ءبىز ەكىنشى جىل ونداي رەيتينگ دايىنداپ, ءساۋىر ايىندا جاريالايمىز. وندا 5 سالا بويىنشا اكىمنىڭ اتقارىپ وتىرعان جۇمىسى باعالانادى», - دەدى مىرزاحمەتوۆ.