وتكەن جىلى تافگايلىعىمەن اتى شىعىپ, تامىز ايىنان بەرى ديسكۆاليفيكاتسياعا ۇشىراعان «بارىس» حوككەيشىسى دامير رىسپاەۆ Russia-Hockey.ru سايتىنا سۇحبات بەردى.
«جازامدى وتەپ ءجۇرمىن. ءبىر قيىندىعى تەك قۇرلىقتىق حوككەي ليگاسىنا عانا ەمەس جوعارعى حوككەي ليگاسىنا دا قاتىسا المايمىن. سول سەبەپتى, ماسەلەن, «سارىارقا» مەن وسكەمەننىڭ «تورپەدو» كوماندالارىندا ويناي المايمىن. قازىر قازاقستان چەمپيوناتىندا «نوماد» نامىسىن قورعاپ ءجۇرمىن. وسىنداي قيىن كەزەڭدە باپكەرلەرىم مەن ارىپتەستەرىم بارىنشا قولداۋ كورسەتىپ جاتىر», – دەدى 21 جاستاعى حوككەيشى.
جاس سپورتشى وسىنىڭ سالدارىنان قىركۇيەك ايىندا قازاقستان قۇراماسىنىڭ وليمپيادالىق ىرىكتەۋ تۋرنيرىنە دە قاتىسا الماعان.
«قحل اۋقىمدى ءارى بەدەلدى ليگالاردىڭ ءبىرى. قازاقستان قۇراماسىمەن جاتتىقسام دا, قۇراما تىزىمىنە ىلىگە المادىم», – دەيدى «نوماد» ويىنشىسى.
«نومادتا» تەك قورعانىستا ونەر كورسەتەمىن. وسىعان دەيىن 25 ماتچقا قاتىسىپ, ءبىر گولدىڭ جانە ەكى ناتيجەلى پاستىڭ اۆتورى اتاندىم. بارىنشا اباي بولىپ, تارتىپكە ساي ويناۋعا تىرىسىپ ءجۇرمىن. وسى ۋاقىت ارالىعىندا تەك 37 مينۋت ايىپ ۋاقىت الدىم», – دەيدى ول.
سالىستىرمالى تۇردە قارار بولساق, «بارىس» ساپىندا 23 ماتچ وتكىزىپ, بارلىعى 194 مينۋتقا ايدىننان قۋىلعان ەكەن.
«باق بەتتەرىندەگى مالىمەتتەرىندە «بارىس» قحل-عا ديسكۆاليفيكاتسيامدى قايتا قاراۋ جونىندە ءوتىنىش جىبەرگەن كورىنەدى. اقپان ايىندا ماسكەۋدە وسى ماسەلە قايتا قارالۋى مۇمكىن. جاقسى جاڭالىقتان ۇمىتتەنىپ ءجۇرمىن. «كۋنلۋن رەد ستارمەن» كەزدەسكەنىمىزگە دە جارتى جىل بولدى. وسىعان دەيىن ءىستىڭ انىق-قانىعىن انىقتاپ, ناقتى شەشىم شىعاراتىن ۋاقىت كەلگەن سياقتى. بارىس» ساپىندا تەزىرەك ايدىنعا شىقسام ەكەن دەيمىن. قحل باسشىلارىنىڭ كاسىبيلىگىنە سەنىم ارتامىن», – دەدى دامير.
«اقپارات قۇرالدارىندا جاريالانعان ماقالالار ىلعي دا جولىما بوگەت بولىپ كەلدى. بىراق قانشا جەردەن اتىشۋلى حوككەيشىلەردىڭ ءبىرى بولسام دا, قارسىلاستارىمنىڭ ءبىر دە بىرەۋىن جاراقاتتاماپپىن. دەگەنمەن, حوككەي ەڭ قاۋىپتى سپورتتىڭ ءبىرى سانالاتىنى و باستان بەلگىلى. ماسەلەن, بىرنەشە كۇن بۇرىن «تورپەدو» – سكا اراسىنداعى ماتچتا ايدىن يەلەرىنىڭ شابۋىلشىسى الدىمەن, قاقپاشى كوسكينەندى اياعىنان شالىپ قۇلاتسا, ارتىنشا پروحوركيندى قاڭباقشا ۇشىرىپ ءتۇسىردى. وسىنىڭ سالدارىنان ەكەۋى دە ۇزاق مەرزىمدى جاراقات الۋى مۇمكىن ەدى», – دەدى رىسپاەۆ.
