اقتوبە جولدارىن جوندەۋگە 7,8 ملرد تەڭگە ءبولىندى

بيىل اقتوبەدەگى وبلىستىق جانە اۋداندىق ماڭىزى بار جولداردى جوندەۋگە 7,8 ميلليارد تەڭگە ءبولىندى. جوسپار بويىنشا 298 شاقىرىمدىق جولدارعا كۇردەلى جانە ورتاشا كۇردەلى جوندەۋ جۇمىستارى جۇرگىزىلەدى, دەپ حابارلايدى قازاقپارات. اقتوبەدەگى 5 مىڭ شاقىرىم تاسجولدىڭ 75 پايىزى جۇرۋگە جارامسىز. اسىرەسە, وبلىس ورتالىعى مەن اۋداندار اراسىنداعى بايلانىس ناشار. ءتىپتى, شالقار اۋدانىنا مۇلدە كولىك جۇرمەيدى. بۇل اۋداننىڭ حالقى قاتىناس ءۇشىن تەك تەمىر جولدى پايدالانادى. سوندىقتان قاتىناستى قايتا جانداندىرۋ ءۇشىن جىل وتكەن سايىن جول سالۋعا بولىنەتىن قارجى كولەمى ءوسىپ كەلەدى. 2016 جىلى 8,9 ميلليارد تەڭگە ءبولىنىپ, 74 جوبا ىسكە اسىرىلدى. «بيىل وبلىستىق, اۋداندىق جولداردى جوندەۋگە 7,8 ميلليارد تەڭگە ءبولىندى. بارلىعى 298 شاقىرىمنان استام جولدى جوندەۋ جوسپاردا بار. ماسەلەن, «ءدوڭ-بادامشا-اقتوبە-ورسك (رەسەي) باعىتىنداعى جولدىڭ 15 شاقىرىمىنا كۇردەلى, 30 شاقىرىمعا جۋىعىنا ورتاشا جوندەۋ جۇرگىزىلەدى. سونىمەن قاتار, وڭتۇستىك اينالما جول قۇرىلىسى باستالادى. جوبا قۇنى 4 ميلليارد تەڭگەدەن استى», - دەدى وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ايازباي وسمانعاليەۆ.