كيىز ءۇيدى عارىش كەمەسىنە تەڭەگەن

وتكەن عاسىردىڭ دۇنيە توڭكەرىلىپ تۇسكەن كە­زىندە, ياعني كسرو تا­را­عان كەزدەگى ەڭ اتاقتى سۋرەتشىلەرىنىڭ ءبىرى ماس­لوۆ بولدى. ءوز ەلىمىزدە دە, شەت ەلدەردە دە تانىمال سۋرەتشىنىڭ  سوڭىنان شىندىققا بەرگىسىز ءاڭ­گى­مەلەر  جەلدەي ەسىپ جاتاتىن. 2002 جى­لى قايتىس بولعان كەزىندە ءتىپتى امەريكالىق اتاقتى ءانشى ۋيتني حيۋستوننىڭ ءومىر جاسى ۇزاق بولۋى ءۇشىن «ءوز ەركىمەن جان تاپسىرعان» دەگەن سىقىلدى اڭىز تاراپ, جۇرتشىلىق ونىڭ شى­عار­ماشىلىعىنا ەمەس, اڭىزعا اينالعان ءومى­رىنە قى­زىعۋشىلىق تانىتقانى بار. سەرگەي ماسلوۆ رەسەيدىڭ ساما­را قالاسىندا دۇنيەگە كەلگەنى­مەن, الماتىدا تۇرعان, وسى اسەم قالادا ونەرمەن اينالىسىپ, تورتكۇل دۇنيەگە تانىمال بولدى. ول تەك سۋرەتتىڭ عانا ەمەس, جازۋدىڭ دا ادامى ەدى. دالەل – «مەرتۆىە يدۋت» اتتى اتاقتى ەسسەسى جانە ءوز زامانداستارىنا ارناپ جازعان, بىراق اياقتالماي قالعان رومانى «زۆەزدنىە كوچەۆنيكي». ال, سۋرەت ونەرىمەن وتىزدان اسىپ بارىپ شىنداپ اينالىسقان سەرگەي كوركەمسۋرەت, گرافيكا, ينستاللياتسيالار جاساعان. ول سول كەزدەردە شىعىستىق ميستيتسيزم مەن ستيلدىك ەكلەكتيك باعىتىن دامىت­قان «تۇنگى ترامۆاي» كور­كەمونەر توبىنىڭ جەتەكشىسى بولاتىن. ال, ءوزىنىڭ باستى شىعارما­شىلىق قاعيداسى رەتىندە ميفتىك شىعارماشىلىقتى تاڭداپ الادى. وتكەن عاسىردىڭ توقسا­نىنشى جىلدارىنداعى قو­عامدىق ومىردەگى وزگەرىستەر ونەردىڭ قاي سالاسىندا دا ەر­كىندىككە جول اشقانى ءمالىم. قاپتاعان «يزمدەردىڭ» دەندەي ەنىپ كەتكەنى دە وسى تۇس. بىراق, ونەر ادامىنىڭ ءوزىن ىزدەۋ, شتامپ­تان, قاتىپ قالعان قالىپتاردان شىعۋىنا دا بۇل ەر­كىندىكتىڭ اسەرى بولدى. ماس­لوۆتىڭ ادام بالا­سىنا ءتان سەزىم اتاۋلى­نى شىعارماشىلىعىنا وزەك ەتۋى دە ونىڭ ونەردەگى د­ا­را­لى­عىن كورسەتە العانداي. «مەديتاتسيا», «سيقىرشى», «ۋيتني», «دالاداعى اق ءتۇن­دەر» اتتى تانىمال شىعار­مالارى شىنايىلىعىمەن, ءتىرى, قوزعالىستاعى بەينەلەر سىندى قابىلداناتىندىعىمەن قۇندى. سۋرەتشى كوك تۇستەرگە باسىمدىق بەرەدى. بىراق, ول ءوزىنىڭ ءبىر جاز­باسىندا تۇستەرگە اسا ءمان بەرمەيتىنىن, ونى دە­كوراتيۆتىك جۇمىس دەپ سانايتىنىن, ءتىپتى, تۇستەردىڭ ميدى اناشا سىندى تۇمانداندىرىپ جىبەرەتىنىن جازادى. سوندىقتان ونىڭ نەگىزگى باسىمدىق بەرەتىن نارسەسى – يدەيا. يدەيا دەمەكشى, ونىڭ قازاقتىڭ كيىز ءۇيىن عا­رىش كەمەسىنە تەڭەپ, پورترەت ارناعانى نازار اۋدارتادى. ونەر ادامدارىن ۆامپيرلەر, زومبيلەر, كادۋىلگى جاندار دەپ ءۇش توپقا بولەتىن سۋرەتشىنىڭ ءۆامپيردى بەينەلەگەن پورترەتى ءتىپتى قىزىق. ادامدا تاڭ قالۋ, ۇرەي, قورقۋ, قىزىعۋ سىندى قات-قابات سەزىمدەر تۋعىزادى. ءيا, سويتكەن سەرگەيدىڭ دە ومىردەن وتكەنىنە ون بەس جىل­دىڭ ءجۇزى بولعان ەكەن. ومىردەن ەرتە كەتكەن تالانتتى سۋرەتشىگە قۇرمەت ءۇشىن ۇلت­تىق مۋزەي نەۆزوروۆتار وتباسى اتىنداعى شىعىس قا­زاق­ستان وبلىستىق بەينەلەۋ ونەرى مۋزەيىمەن بىرلەسىپ «سەرگەي ماس­لوۆ. جۇلدىزدى كوشپەندى» اتتى جەكە كورمە اشتى. بۇل كورمەنىڭ اشىلۋىنا سەرگەيدىڭ ونەردەگى دوس-جاراندارىنىڭ دا قوس­قان ۇلەسى بارشىلىق. قازاق­ستاندىق سۋرەتشىلەردىڭ شى­عارماشىلىعىن حالىققا تانىتۋ ماقساتىندا اشىل­عان بۇل كورمە ناۋرىزدىڭ سوڭىنا دەيىن جۇمىس ىستەمەك. ايگۇل سەيىلوۆا, «ەگەمەن قازاقستان» سۋرەتتى تۇسىرگەن ورىنباي بالمۇرات, «ەگەمەن قازاقستان»