وقو-دا يمامداردى مەدرەسە-كوللەدجدەر دايىندايدى

وڭتۇستىك قازاقستان وبلىسىنىڭ اكىمى جانسەيىت تۇيمەباەۆ قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلىمەن كەزدەستى. جۇزدەسۋ بارىسىندا وڭىردەگى ءدىني احۋال مەن تاتۋلىق پەن كەلىسىم, رۋحاني-ونەگەلى تاربيە بەرۋدىڭ ماڭىزدى ماسەلەلەرى تالقىلاندى, دەپ حابارلادى وقو اكىمدىگىنىڭ ءباسپاسوز قىزمەتى. سونىمەن قاتار كەزدەسۋدە وبلىستاعى ءدىني ءبىلىم بەرۋدىڭ جايى قوزعالدى. ءوڭىر باسشىسى يمامدىق كورپۋستىڭ جوعارى بىلىكتى كادرلارىن دايارلاۋ جانە وڭىردەگى تەولوگيالىق ءبىلىم بەرۋ جۇيەسىن جەتىلدىرۋدە مەدرەسە-كوللەدجدەردىڭ ماڭىزدىلىعىنا توقتالدى. «بۇگىندە وبلىسىمىزدا 800-گە جۋىق مەشىت بار. ولاردا قىزمەت ەتىپ جاتقان  يمامداردىڭ ءبىلىمى مەن بىلىكتىلىگىنە اسا ءمان بەرگەن ءجون. يمام تەك مەشىتتىڭ ىشىندە عانا جاۋاپتى ەمەس. ول تۇتاس ءبىر ۇلتتىڭ, مادەنيەتتىڭ, رۋحانياتتىڭ الدىندا جاۋاپتى تۇلعا. سوندىقتان اۋىلدى جەرلەردەگى مەشىتتەردى بىلىكتى ءدىني قىزمەتكەرلەرمەن قامتاماسىز ەتۋ قاجەت.  ەڭ باستىسى - بۇل سالاعا مەيلىنشە مۇقيات تالداۋ جۇرگىزىپ, اسا ۇقىپتىلىقپەن جۇمىس ىستەگەن ابزال»,- دەدى جانسەيىت قانسەيىت ۇلى. قازىرگى تاڭدا يمامدار دايارلاۋ ىسىمەن شىمكەنت پەن سارىاعاشتاعى مەدرەسە-كوللەدجدەر اينالىسادى. اتالعان وقۋ ورىندارى يمامداردىڭ ءدىني تانىمىن ارتتىرىپ, ساياسي جانە مورالدىق تۇرعىدان بارىنشا جەتىلۋىنە كۇش سالىپ كەلەدى. بۇل ماقساتقا 2016 جىلى وبلىس بيۋدجەتى ەسەبىنەن قارجى باعىتتالىپ, 175 گرانت بولىنگەن. «بۇگىندە وڭتۇستىك قازاقستان وبلىسى اكىمدىگى ءدىني سالاعا اسا قامقورلىقپەن قولداۋ ءبىلدىرىپ وتىر. وسىنىڭ ارقاسىندا ەكى مەدرەسەمىز مەملەكەتتىك ليتسەنزياعا قول جەتكىزىپ, كوللەدج رەتىندە تىركەلدى. وسى جانە وزگە دە باعىتتاعى بىرلەسكەن جۇمىستارىمىز جەمىستى بولارىنا سەنىمدىمىن»,- دەدى ەلىمىزدىڭ باس ءمۇفتيى ەرجان قاجى مالعاجى ۇلى. سونداي-اق كەزدەسۋدە  وزگە دە جات اعىمداردىڭ  جۇمىسىنا تالداۋ جاساپ, ۇگىت-ناسيحات شارالارىنىڭ الدىن الىپ,  نازاردا ۇستاپ وتىرۋ ماسەلەسى دە ءسوز بولدى.