«استانا» تاعى ءبىر ۇزدىك ويىنشىسىنان ايىرىلدى

«استانا» فۋتبول كلۋبىنىڭ جارتىلاي قورعاۋشىسى روحەر كانياس رەسمي تۇردە كيپردىڭ اپوەل كومانداسىنا اۋىستى. بۇل تۋرالى vesti.kz حابارلادى. كولۋمبيالىق فۋتبولشى بۇگىن مەديتسينالىق تەكسەرۋدەن ءوتىپ, جاڭا كومانداسىمەن 2017 جىلدىڭ سوڭىنا دەيىن كەلىسىمشارت جاساستى. ترانسفەر قۇنى ازىرگە بەلگىسىز. اپوەل ساپىندا ول 80-نومىرمەن وينايدى. بۇعان دەيىن كانياستىڭ جاڭا كومانداعا جارتى جىلعا جالعا بەرىلەتىنى حابارلانعان. ايتا كەتەيىك, روحەر كانياس «استانادا» 2014 جىلدان بەرى ويناپ كەلەدى. ەلوردالىق ۇجىممەن ول ءۇش رەت قازاقستان چەمپيونى اتانىپ, ءبىر مارتە ەل كۋبوگىن جەڭىپ العان. سونىمەن قاتار, ءوز كومانداسىن چەمپيوندار ليگاسى مەن ەۋروپا ليگاسىنىڭ توپتىق كەزەڭىنە جولداما الۋىنا سەپتىگىن تيگىزگەن. «استاناعا» دەيىن ول ەكى جىل قاراعاندىنىڭ «شاحتەرىندە» ويناعان. مۇندا 2012 جىلى چەمپيون اتانىپ, قازاقستان كۋبوگى مەن سۋپەركۋبوگىندا جەڭىسكە جەتتى. جالپى, 26 جاستاعى جارتىلاي قورعاۋشى قازاقستان پرەمەر-ليگاسىندا 143 كەزدەسۋگە قاتىسىپ, 19 گولدىڭ جانە 14 ناتيجەلى پاستىڭ اۆتورى اتانعان.