ادام قۇقىقتارى جونىندەگى ۇلتتىق ورتالىق باسشىسى تاعايىندالدى

بۇگىن قازاقستان رەسپۋبليكاسىنداعى ادام قۇقىقتارى جونىندەگى ۋاكىل اسقار شاكىروۆ ادام قۇقىقتارى جونىندەگى ۇلتتىق ورتالىقتىڭ ۇجىمىن ونىڭ جاڭا باسشىسى سەرىك جامەك ۇلى وسپانوۆپەن تانىستىردى. س.ج. وسپانوۆ 1964 جىلدىڭ 1 شىلدەسىندە گۋرەۆ قالاسىندا دۇنيەگە كەلدى. 1986 جىلى ۆ.ي. لەنين اتىنداعى قازاق پوليتەحنيكالىق ينستيتۋتىن, 2000 جىلى اباي اتىنداعى الماتى مەملەكەتتىك ۋنيۆەرسيتەتىن ءتامامدادى. ەڭبەك جولىنداعى قىزمەتى 1986 جىلى «مانگىشلاكنەفت» بىرلەستىگىندە باستالدى. 1992-2004 جىلدار ارالىعىندا ماڭعىستاۋ وبلىسىنىڭ باسشى قىزمەتتەرىن اتقاردى. 1996 جىلدان باستاپ 2004 جىلعا دەيىن اقتاۋ قالاسىنىڭ اكىمى, ماڭعىستاۋ وبلىسى اكىمىنىڭ ورىنباسارى بولدى. 2004 جىلدان باستاپ 2016 جىلعا دەيىن ءۇش شاقىرىلىمدا قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولىپ سايلانعان ەدى. جاڭا باسشىنى تانىستىرا وتىرىپ, قر ومبۋدسمەنى ەلدىڭ پارلامەنتى مەن مەملەكەتتىك باسقارۋ ورگاندارىندا جۇمىس اتقارۋ كەزىندە العان ءبىلىمى مەن ايتارلىقتاي تاجىريبەسى وعان ۇلتتىق قۇقىق قورعاۋ مەكەمەسىندەگى قىزمەتكە بەلسەندى كىرىسۋگە مۇمكىندىك بەرەتىنىنە سەنىمىن ءبىلدىردى. بۇدان بۇرىن 2002-2016 جىلدار ارالىعىندا ادام قۇقىقتارى جونىندەگى ۇلتتىق ورتالىقتى كاليۋجنىي ۆياچەسلاۆ افاناسەۆيچ باسقارعان ەدى.