كۆەبەك مەشىتىندەگى اتىستا بەس ادام قازا تاپتى

كانادانىڭ كۆەبەك قالاسىنداعى مەشىتتە 29 قاڭتار كۇنى كەشكە قۇلشىلىققا كەلگەندەرگە قارۋلى ادامدار وق اتىپ, بەس كىسى قازا تاپتى, دەپ حابارلايدى BBC. قاندى وقيعاعا كۋا بولعانداردىڭ ءبىرىنىڭ اگەنتتىككە ايتۋىنا قاراعاندا, قارۋلى ءۇش ادام كۆەبەك يسلام مادەني ورتالىعىندا 40 شاقتى ادامعا وق جاۋدىرعان. پوليتسيا ورتالىق اۋماعىن قورشاۋعا العان, جۋرناليستەرگە وقيعا تۋرالى كوممەنتاري بەرۋدەن باس تارتادى. جەرگىلىكتى بيلىك باسشىسى موحامەد يانگۋي شابۋىلدى "تاعىلىق ارەكەت" دەپ اتادى. 2016 جىلى ماۋسىمدا الدەكىمدەر ورتالىق الدىنا شوشقانىڭ كەسىلگەن باسىن تاستاپ كەتكەن ەدى. موحامەد يانگۋي شابۋىل جاسالعان كەزدە ءوزى ورتالىقتا بولماعانىن, بىراق ونداعى ادامدار قوڭىراۋ شالعانىن ايتتى. ول شابۋىلدان قانشا ادام جارالانعانىن بىلمەيتىنىن, جارالىلاردى قالاداعى بىرنەشە اۋرۋحاناعا الىپ كەتكەنىن حابارلادى. كۆەبەكتە سوڭعى جىلدارى مۇسىلمانداردىڭ بەت-الپەتىن جاۋىپ تۇراتىن كيىمى - نيقابقا تىيىم سالۋعا بايلانىستى ساياسي دەباتقا بايلانىستى يسلاموفوبيا كۇشەيە باستاعان. 2013 جىلى پوليتسيا كۆەبەكتىڭ ساگەنەي ايماعىنداعى مەشىتكە الدەكىمدەر بەلگىسىز جانۋاردىڭ قانىن شاشىپ جاعىپ كەتكەن سوڭ تەرگەۋ جۇرگىزگەن. 2015 جىلى قاراشادا پاريجدە شابۋىل بولعان كۇننىڭ ەرتەڭىندە ونتاريودا بەلگىسىز ادامدار مەشىتكە وت قويىپ كەتكەن.