وبلىس وڭىرىندەگى وقۋ ورىندارى 25 قاڭتارداعى ەلباسى نۇرسۇلتان نازارباەۆتىڭ قازاقستان حالقىنا ۇندەۋىن تالقىلاۋدى باستادى. سونىڭ ءبىرى قوستاناي مەملەكەتتىك پەداگوگيكالىق ينستيتۋتىنىڭ پروفەسسورلىق ۇجىمى مەن ستۋدەنتتەرى قازاقستان رەسپۋبليكاسى پرەزيدەنتىنىڭ بيلىك تارماقتارى اراسىندا وكىلەتتىكتەردى قايتا ءبولۋ ماسەلەلەرى جونىندەگى ۇندەۋىنە وراي دوڭگەلەك ۇستەل ءماجىلىسىن وتكىزدى. وعان وبلىستىق جاستار ساياساتى باسقارماسىنىڭ باسشىسى كەنەش ءالىمجانوۆ قاتىسىپ, ول ەلباسىنىڭ قازاقستان حالقىنا ۇندەۋىندە ايتىلعان ماسەلەلەر ەلىمىزدەگى دەموكراتيالىق ۇردىستەر دامۋىنىڭ ايعاعى ەكەنىن ايتتى. بۇل پرەزيدەنت وكىلەتتىكتەرىنىڭ ۇكىمەت پەن پارلامەنتكە ءبولىنۋى ازاماتتىق قوعامنىڭ دا بەلسەندىلىگىن قاجەت ەتەدى, ال ودان جاستار تىس قالماۋى كەرەكتىگىن تىلگە تيەك ەتتى.
«دوڭگەلەك ۇستەل» ماجىلىسىندە ينستيتۋت پرورەكتورى تىلەگەن احمەتوۆ, ساياساتتانۋ عىلىمدارىنىڭ كانديداتى سۆەتلانا نازاروۆا, فيلوسوفيا عىلىمدارىنىڭ كانديداتى ايگۇل امانتاەۆا, ستۋدەنت اناستاسيا پۋشكارەۆا تاعى باسقالار شىعىپ سويلەپ, ەلباسى ۇندەۋىندە ايتىلعان ماسەلەلەردىڭ دەر ۋاقىتىندا جۇرگىزىلگەلى وتىرعان رەفورما ەكەنىن ايتتى.
«كونستيتۋتسياعا, سوعان وراي ەلىمىز زاڭنامالارىنا وزگەرىستەر ەنگىزەتىن ۋاقىت ءپىسىپ جەتتى. نەگىزىنەن, بيلىك تارماقتارىنا بەرىلەتىن وكىلەتتىكتەر الەۋمەتتىك-ەكونوميكالىق سيپاتتا. ولار ۇكىمەتكە, بيلىكتىڭ جەرگىلىكتى اتقارۋ ورگاندارىنا بەرىلەدى. بۇل وكىلەتتىكتەر تەك قولعا بيلىك ۇستاتۋ ەمەس, ەڭ الدىمەن جاۋاپكەرشىلىك دەگەن ءسوز. ال ساياسي سيپاتتاعى وكىلەتتىكتەر پارلامەنتكە بەرىلەدى. بۇل دەگەن مەنىڭ ويىمشا سايلاۋداعى باسەكەنى, سايلاۋشىلار بەلسەندىلىگىن ارتتىرادى. ازاماتتاردىڭ ساياسي بەلسەندىلىگىن جوعارىلاتادى, زاڭ شىعارۋشى پارلامەنت جاۋاپكەرشىلىگىن دە نىعايتا تۇسەدى. ۋاقىت تالاپ ەتىپ وتىرعان وسى ماسەلەلەردى پرەزيدەنت ءوز ۇندەۋىندە ايتىپ بەردى. مۇنى ءبىز قولدايمىز», – دەدى قوعامدىق پاندەر كافەدراسىنىڭ دوتسەنتى, ساياساتتانۋ عىلىمدارىنىڭ كانديداتى سۆەتلانا نازاروۆا.
ءنازيرا جارىمبەتوۆا, «ەگەمەن قازاقستان»
