جامبىل وبلىسىنىڭ پوليتسەيلەرى ەسەپ بەردى

جامبىل وبلىسى اكىمدىگىندە وبلىس اكىمى ك.كوكىرەكباەۆتىڭ قاتىسۋىمەن جەرگىلىكتى پوليتسيا جۇمىسىن جانداندىرۋ ماسەلەلەرى جونىندەگى كەزەكتەن تىس VIII سەسسياسى ءوتتى. سەسسيا جۇمىسىندا جامبىل وبلىستىق ءىىد جەرگىلىكتى پوليتسيا قىزمەتىنىڭ باستىعى, پوليتسيا پولكوۆنيگى ب.بەيسەەۆتىڭ «2016 جىلدىڭ 12 ايلىق قورىتىندىسىمەن پروفيلاكتيكالىق جۇمىستاردى ۇيىمداستىرىپ جۇرگىزۋدەگى» جۇمىس ەسەبى تىڭدالدى. قۇقىق قورعاۋ سالاسىن مودەرنيزاتسيالاۋعا بايلانىستى ەلباسى ماڭىزدى باعىتتاردىڭ ءبىرى ەكەنىن اتاپ, وتكەن جىلدىڭ 1 قاڭتارىنان باستاپ جەرگىلىكتى پوليتسيا قىزمەتىن قۇرعانى بەلگىلى. ءوز سوزىندە ب.حاليل ۇلى جامبىل وبلىسىنىڭ جەرگىلىكتى پوليتسيا قىزمەتى وتكەن جىلدىڭ 12 ايىندا وبلىس اۋماعىندا قىلمىستار مەن قۇقىق بۇزۋشىلىقتاردى الدىن الۋدا كەشەندى شارالار قابىلداپ جاتقانىن جەتكىزدى. 12 ايلىق ەسەپ مەرزىمىندە وبلىس اۋماعىندا تىركەلگەن قىلمىستار سانى 8,8 پايىزعا تومەندەگەن. سونداي-اق, كوشەلەردە ورىن العان قىلمىستار تەك تاراز قالاسى اۋماعىندا 4,3 پايىزعا, سارىسۋ اۋدانى اۋماعىندا 24,4 پايىزعا وسكەن. جالپى العاندا ب.بەيسەەۆ كوشەلەردە جاسالعان قىلمىستار سانى 6,5 پايىزعا دەيىن تومەندەگەنىن ايتتى. سودان كەيىن ب.حاليل ۇلى قوعامدىق قاۋىپسىزدىك, جول قاۋىپسىزدىگى ماسەلەلەرىنە دە توقتالدى. سونىمەن قاتار, جەرگىلىكتى پوليتسيا قىزمەتى ازاماتتاردىڭ جەكە قاۋىپسىزدىگىن قامتاماسىز ەتۋدە قىلمىستاردى بولدىرماۋدا اتقارىلىپ جاتقان شارالاردان بولەك, نەگىزگى ءتورت باعىتتا جۇمىستاردىڭ اتقارىلۋىن قاتاڭ باقىلاۋعا العان. ءبىرىنشى – مال ۇرلىعى پروفيلاكتيكاسى, ەكىنشى – جالپى بوتەننىڭ مۇلكىن ۇرلاۋ دەرەكتەرىن الدىن الۋ پروفيلاكتيكاسى, ءۇشىنشى – اكىمشىلىك اۋماقتاردا دەسترۋكتيۆتى ءدىني اعىمداردى ۇستانۋشىلارعا جۇيەلى تۇردە باقىلاۋ جۇرگىزۋ جانە ءتورتىنشى – 2016 جىلدىڭ 22 جەلتوقسانىندا قازاقستان رەسپۋبليكاسى پرەزيدەنتىمەن «كەيبىر زاڭنامالارعا ەنگىزىلگەن تولىقتىرۋلار مەن وزگەرىستەر تۋرالى» جالپى حالىققا ءتۇسىندىرۋ. ال مەركى اۋدانىنىڭ اكىمى م.ومىربەكوۆ اۋداندا جاسوقسپىرىمدەر اراسىنداعى قۇقىقبۇزۋشىلىقتى ازايتۋ, ولارعا جول بەرمەۋ ماقساتىندا بارلىق ورتا مەكتەپتەر بەينەباقىلاۋلارمەن تولىق قامتاماسىز ەتىلگەنىن, الايدا اۋداندا 2016 جىلدىڭ 12 ايىندا جالپى قىلمىستىق قۇقىق بۇزۋشىلىق 2015 جىلمەن سالىستىرعاندا 0,2 پايىزعا جوعارىلاپ وتىرعانىن ايتتى. بۇدان كەيىن وبلىستىق ءماسليحاتتىڭ دەپۋتاتى د.ەسىمبەكوۆ ءبىلىم بەرۋ وشاقتارىنىڭ جانىنان «فاست-فۋد» دۇڭگىرشەكتەرىن ورنالاستىرۋعا شەكتەۋ قويۋ كەرەكتىگىن جايلى ويىن ايتسا, وبلىستىق ونكولوگيالىق ديسپانسەردىڭ باس دارىگەرى, وبلىستىق ءماسليحاتتىڭ دەپۋتاتى ا.نۇرجانوۆ قۇقىقبۇزۋشىلىقتىڭ الدىن الۋ جانە ونى بولدىرماۋ تۋرالى پىكىرىن ءبىلدىردى. حاميت ەسامان, «ەگەمەن قازاقستان» تاراز