الەۋمەتتىك نىساندار قۇرىلىسى – باستى نازاردا

ماجىلىستەگى «نۇر وتان» پارتيا­سى فراكتسياسى الەۋمەتتىك ينفرا­قۇرىلىمدى دامىتۋدىڭ 2015-2019 جىلدارعا ارنالعان «نۇرلى جول» مەملەكەتتىك باعدارلاماسىن ىسكە اسىرۋعا بيۋدجەتتەن جانە ۇلتتىق قوردان بولىنەتىن قاراجاتتىڭ نىسانالى جانە ءتيىمدى پايدالانىلۋىن باقىلاۋ جونىندەگى كوميسسيانىڭ وتىرىسى بولدى. ونى كوميسسيا جەتەكشىسى يرينا ارونوۆا جۇرگىزىپ وتىردى. نەگىزگى باياندامانى ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا جاساپ, ءبىلىم بەرۋ نىساندارىنىڭ قۇرىلىسى بويىنشا ايتىپ بەردى. «نۇرلى جول» باعدارلاماسى بويىنشا 2015-2017 جىلدار ارالىعىندا 57,4 ملرد تەڭگەگە 110 ءبىلىم بەرۋ نىسانىنىڭ قۇرىلىسىن جۇرگىزۋ قاراستىرىلعان ەكەن. ولاردىڭ – 91-ءى مەكتەپ, 19-ى – بالاباقشا. 2016 جىلدىڭ قورىتىندىسى بويىنشا 52 ءبىلىم بەرۋ نىسانى پايدالانۋعا بەرىلگەن, سونىڭ ىشىندە 35-ءى – مەكتەپ, 17-ءسى بالاباقشا بولعان. 27 مەكتەپ ءۇش اۋىسىمدى قىسقارتۋعا, 8-ءى اپاتتى جاعدايداعىلاردىڭ ورنىنا سالىنعان. 2017 جىلعا 56 مەكتەپ پەن 2 بالاباقشا سالۋ جوسپارلانعان. 2017 جىلدىڭ 1 قاڭ­تارىنا دەيىنگى جاعداي بويىنشا باع­دار­لامانى تولىقتاي ىسكە اسىرۋ ءۇشىن جەرگىلىكتى اتقارۋشى ورگاندارعا 57 ملرد 371,8 ملن تەڭگە اۋدارىلعان. بۇل – بارلىق بولىنگەن قاراجاتتىڭ 99,9 پايىزى دەگەن ءسوز. قاراجاتتاردىڭ يگەرىلمەۋى اتىراۋ جانە شىعىس قازاقستان وبلىستارىندا ورىن العان. بايانداماشىعا قۇرىلىسى ءبىر جىلدان كەلەسى جىلعا سوزىلعان نىساندار تۋرالى سۇراقتار كوپ قويىلدى. ماسەلەن, يرينا ارونوۆا ونداي قۇرىلىستاردىڭ الماتى وبلىسىندا تىم كوپ ەكەنىنە نازار اۋداردى. بارلىق 15 مەكتەپتىڭ 5-ءۋى 31 قاڭتارعا بەرىلۋگە ءتيىستى بولعان. «الايدا, ولاردىڭ اشىلۋىنىڭ اۋىلى الىس ەكەنىن ءبىز جۋىردا ءوز كوزىمىزبەن كورىپ كەلدىك. وسىنداي نىسانداردى قالاي قاداعالايسىزدار؟» – دەپ سۇرادى دەپۋتات. «ءبىز ونى ناۋرىز ايىندا تولىقتاي قابىلداپ, سىزدەرگە فوتوسۋرەتتەرىن كورسەتەتىن بولامىز», – دەدى مينيسترلىكتىڭ وكىلى. كوميسسيا جۇمىسىنىڭ قورىتىندىسى بويىنشا ۇكىمەتكە ۇسىنىستار جاسالاتىن بولدى. جاقسىباي سامرات, «ەگەمەن قازاقستان»