تابيعاتقا ايالى الاقان قاجەت

قانداي ءبىر يندۋستريالىق جوبانى جۇزەگە اسىرعاندا دا ەڭ الدىمەن قورشاعان ورتاعا زالالىن تيگىزبەۋ ماقساتىمىز بولۋى ءتيىس دەيتىن قازاقستان رەسپۋبليكاسى پرەزيدەنتتىگىنە كانديدات, «تابيعات» ەكولوگيالىق وداعىنىڭ توراعاسى مەلس ەلەۋسىزوۆ استانادا وتكەن حالىقارالىق ونەركاسىپتىك يننوۆاتسيالىق فورۋمىندا بولىپ, وتاندىق اتوم ەنەرگەتيكاسى توڭىرەگىندەگى ويلارىمەن ءبولىستى. سونىمەن قاتار, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اسەل نۇرپەيىسوۆامەن كەزدەسىپ, مۇگەدەكتەرگە ارنالعان جۇمىس ورىندارىن قالپىنا كەلتىرۋ ماسەلەسىن كوتەردى. جاپونياداعى تابيعات اپاتىنان كەيىنگى «فۋكۋسيما» اەس-ىندەگى جاعداي اتوم ەنەرگەتيكاسىن پايدالانۋدا قانداي ساقتىق قاجەتتىگىن كورسەت­كەن­دەي. فورۋمداعى باستى تاقىرىپتىڭ ءبىرى وتاندىق اتوم ەنەرگەتيكاسىن پاي­دالانۋعا ارنالعاندىقتان, پرەزيدەنتتىكتەن ۇمىتكەر: «مەن, ارينە, بارلىق اتوم ستانسالارىن جابۋ كەرەك دەمەيمىن, الايدا, وسى ماسەلەنى جەتە زەرتتەي ءتۇسۋ قاجەتتىگىن انىق بىلەمىن. ۋران ءوندىرۋ ماسەلەسىندەگى جاعداي كۇردەلى, مەن ونى ءۇيىپ, جيناپ, ءسىلتىسىز­دەن­دىرۋ­دىڭ بارلىق ايماقتار ءۇشىن ءتيىمدى ەمەستىگىن بىلەمىن. ونى ءوندىرۋدىڭ سول ماڭايدىڭ حالقىنا قانداي اسەر ەتەتىندىگى جايىندا دا ءبىرىزدى زەرتتەۋلەر جۇرگىزۋ قاجەت. ءبىزدىڭ قولىمىزدا قازىر ەكولوگيالىق تازا ادىستەرمەن ەنەرگيا الاتىن جولدار بار. ولار – كۇن, جەر­اس­تى ىستىق سۋلارى جانە جەلدى پايدالانۋ. ءبىزدىڭ عالىمدارىمىز جوڭ­عار قاق­پاسىنان ەسكەن جەلدىڭ قۋا­تى­مەن بۇكىل قازاقستاندى ەنەرگيامەن قامتاماسىز ەتۋگە بولادى دەيدى. ارينە, وسىنداي تەحنولوگيالاردى ەنگىزۋ ءۇشىن وعان قارجىلىق قولداۋ قاجەتتىگى ءتۇسى­نىكتى, ال سوڭىنان ءبىز قاۋىپسىز ءارى ارزان ەلەكتر قۋاتىن يەلەنەمىز», – دەگەن ۇمىتكەر الداعى ۋاقىتتا الەم بويىن­شا اتوم ەنەرگەتيكاسىن پايدالانۋعا قارسى ويلار كوبەيە تۇسەتىنىن, مۇنى قازاقستاندىق قوعام دا ءتۇسىنۋى ءتيىس ەكەنىن اتاپ كورسەتتى. – ءبىز سونداي-اق جاھاندىق جىلىنۋ پروبلەماسىن دا ەستەن شىعارماۋعا ءتيىسپىز. قورشاعان ورتاعا نەمكەتتىلىكپەن قاراۋ, ونەركاسىپتىڭ اۋاعا, سۋعا تيگىزەتىن كەرى اسەرلەرى تابيعات وزگەرۋىنە الىپ كەلۋدە. مىنە, وسىلاردان كەلىپ, اۋىز سۋ, ازىق-ت ۇلىك تاپشىلىعى تۋىن­دايدى. سوندىقتان دا, قايتالاپ ايتا­مىن, ءبىزدىڭ رەسپۋبليكانىڭ قورشاعان ورتانى قورعاۋ ماسەلەلەرىندە جۇرت­شى­لىق بەلسەندىلىك تانىتۋى قاجەت, – دەدى مەلس ەلەۋسىزوۆ. پرەزيدەنتتىكتەن ۇمىتكەر حالىق­تىڭ قورعاۋدى قاجەت ەتەتىن توپتارىنا دەگەن ەرەكشە كوزقاراس جايىن ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اسەل نۇرپەيىسوۆامەن كەزدەسۋى بارىسىندا قوزعادى. ءبىر كەزدەرى زاعيپ جاندارعا ناپاقالارىن تاۋىپ, ەڭبەك ەتۋلەرىنە جاعدايلار جاسالعان جۇمىس ورىندارىن قايتادان اشۋ قا­جەت­تىگىنە توقتالىپ, ءوزىنىڭ سوقىرلار مەن ساڭىراۋلار قوعامىندا وتكەن كەزدەسۋىندە ايتىلعان تىلەكتەردى ورتاعا سالدى. – زاعيپ جاندار قازىرگى كۇنى قوعام­نان تىس قالىپ وتىر. ولاردىڭ وزدەرىن قوعامنان تىس قالعان ادام ەتىپ سەزىندىرمەۋ ءۇشىن بۇرىنعى ماماندان­دى­رىلعان كاسىپورىنداردى قايتادان اشۋ­عا كومەكتەسۋ قاجەت. ال بۇل ماسەلەنىڭ وڭتايلى شەشىلۋى ۇكىمەت, پارلامەنت, سالالىق مينيسترلىك بىرىگە جۇمىلعاندا عانا جۇزەگە اسادى. سون­دىقتان مەن ۇسىنىستارىم جازىلعان ارنايى حات ازىرلەيمىن, – دەدى ۇمىتكەر. مەلس ەلەۋسىزوۆتىڭ سايلاۋالدى ناسيحات اياسىندا تاعى دا ءبىر اتباسىن تىرەگەن ورنى – جاپونيا ەلشىلىگى بولدى. ۇمىتكەر ەلشىلىككە كەلىپ, جاپوندىق­تاردىڭ باسىنا تۇسكەن تاۋقىمەتكە, مىڭداعان ادامداردىڭ ءىز-ءتۇزسىز جو­عالىپ جانە قازا بولۋلارىنا باي­لانىستى كوڭىل ايتتى. انار تولەۋحانقىزى. استانا.