قازاقستاندا 25 ادام راقىمشىلىقپەن بوساپ شىقتى

قازاقستاندا 25 ادام راقىمشىلىقپەن بوساپ شىقتى, - دەپ حابارلادى قىلمىستىق-اتقارۋ جۇيەسى كوميتەتىنىڭ ءباسپاسوز قىزمەتى. "مەملەكەت باسشىسى تاۋەلسىزدىكتىڭ 25 جىلدىعىنا وراي راقىمشىلىق جاساۋ تۋرالى زاڭعا قول قويعاننان كەيىن قىلمىستىق-اتقارۋ جۇيەسى مەكەمەلەرى مەن پروباتسيا قىزمەتتەرىندە ماتەريالداردى سوتقا جىبەرۋ بويىنشا ۇلكەن جۇمىستار جۇرگىزىلدى. 24 قاڭتاردا سوتقا سەگىز مىڭنان اسا ماتەريال جىبەرىلدى", - دەدى قىلمىستىق-اتقارۋ جۇيەسى كوميتەتىندەگىلەر. سونداي-اق, سوتقا قاماۋدا وتىرعانداردى بوساتۋعا قاتىستى 2 مىڭنان اسا ماتەريال كەلىپ تۇسكەن جانە بوستاندىقتان ايىرۋ تۋرالى شەشىمدەر ايىپپۇلعا اۋىستىرىلعان. قالعان التى مىڭنان اسا ماتەريال پروباتسيا قىزمەتىندەگىلەردەن كەلگەن. ەسكە سالا كەتەيىك, 2016 جىلدىڭ 13 جەلتوقسانىندا نۇرسۇلتان نازارباەۆ راقىمشىلىق جاساۋ تۋرالى زاڭعا جاريا تۇردە قول قويعان بولاتىن. "راقىمشىلىق 28 مىڭعا جۋىق ازاماتقا جاسالادى دەپ جوسپارلانىپ وتىر. بۇل - ەل تاۋەلسىزدىگىنىڭ مەرەيتويى قارساڭىنداعى ماڭىزدى ادامگەرشىلىك اكتسياسى", - دەدى ەلباسى.