«بارىس» حەلسينكيدە «يوكەريت» كومانداسىن جەڭدى

قۇرلىقتىق حوككەي ليگاسىنىڭ تۇراقتى چەمپيوناتىندا استانانىڭ «بارىسى» حەلسينكيدە «يوكەريت» كومانداسىمەن كەزدەسىپ, 4:3 ەسەبىمەن جەڭىسكە جەتتى. ماتچ ايدىن يەلەرىنىڭ بەلسەندىلىگىمەن باستالدى. تورەشىنىڭ ىسقىرىعى ەستىلىسىمەن العا ۇمتىلعان فيندەر 3-مينۋتتا ەسەپ اشىپ ۇلگەردى. ناتيجەلى سوققىنىڭ اۆتورى –  براين و'نيلل. قارقىندارىنان تايماعان ولار 13-مينۋتتا پەتەر رەگيننىڭ كومەگىمەن تابلوداعى كورسەتكىشتى ەسەلەي ءتۇستى. دەگەنمەن, اراعا ەكى مينۋت سالىپ, قوناقتار ساپىنان داستين بويد ەسەپتەگى ايىرماشىلىقتى قىسقارتتى. ويىننىڭ ەكىنشى كەزەڭىندە جانكۇيەرلەر ءبىر گولدىڭ عانا كۋاسى بولدى. 34-مينۋتتا ميكا نيەميدىڭ سوققىسى كوزدەگەن جەرىنەن ءدال تابىلىپ, ءوز كومانداسىنىڭ ءۇشىنشى شايباسىن سالدى. كەزدەسۋدىڭ سوڭعى 20 مينۋتى ەلوردالىقتار ءۇشىن اسا ءساتتى ءوتتى. 42-مينۋتتا نايدجەل دوۋس مەرگەندىگىمەن تانىلسا, 56-مينۋتتا يۆان كۋچين تارازى باسىن تەڭەستىردى. وسىدان كەيىن قوس كوماندا قانشا شابۋىلداسا دا ەسەپ وزگەرىسسىز قالدى. ال وۆەر-تايم كەزىندە «بارىستىڭ» باعى جانىپ, جەڭىستى شايبانى سوقتى. بۇل جولى برەندون بوچەنسكيدىڭ مەرەيى ۇستەم بولدى. وسىلايشا, استانالىقتار قحل چەمپيوناتىندا «يوكەريت» كومانداسىن حەلسينكيدە ءبىرىنشى رەت ۇتىپ تۇر. 52 ويىننان 78 ۇپاي جيناعان ەدۋارد زانكوۆەتس شاكىرتتەرى «شىعىس» كونفەرەنتسياسىندا 6-ورىندا تۇر. كەلەسى كەزدەسۋىن ولار لاتۆيانىڭ «دينامو» ۇجىمىمەن وتكىزەدى.