سەناتورلاردىڭ ايماقتارعا ساپارلارى قورىتىندىلاندى

سەنات توراعاسى قاسىم-جومارت توقاەۆ دەپۋتاتتاردىڭ ايماقتارعا ساپارىنىڭ ناتيجەلەرىن قورىتىندىلادى. سەناتورلار ەلىمىزدىڭ شالعاي وڭىرلەرىندە 200-دەن استام كەزدەسۋ وتكىزدى, دەپ حابارلادى وسى پالاتانىڭ ءباسپاسوز قىزمەتى. سەنات بيۋروسىنىڭ وتىرىسىندا توراعا سايلاۋشىلارمەن جۇمىس بابىنداعى كەزدەسۋلەر ناتيجەلى بولعانىن, شارالار بۇقارالىق اقپارات قۇرالدارىندا كەڭىنەن جاريا ەتىلگەنىن اتاپ ءوتتى. «اۋىلدار مەن قالالاردا دەپۋتاتتار ەڭبەك ۇجىمدارىمەن كەزدەسۋلەر وتكىزىپ,  ماڭىزدى ماسەلەلەر بويىنشا جۇرتشىلىق پىكىرلەرىمەن تانىستى. الداعى جۇمىستا بىزگە جەرگىلىكتى تۇر­عىنداردى الاڭداتاتىن ماسە­لەلەردى زاڭنامالىق تۇرعىدان شەشۋ مۇمكىندىكتەرىن قاراس­تىرىپ, قاجەت بولعان جاعدايدا كوتە­رىلگەن ماسەلەلەردى ۋاقى­تىن­دا شەشۋگە ىقپال ەتۋ ءۇشىن دەپۋتاتتىق ساۋالداردى ءتيىستى مەملەكەتتىك ورگاندارعا جى­بە­رۋىمىز كەرەك», – دەپ اتاپ ءوتتى ق.توقاەۆ. 2017 جىلعى جۇمىسقا بيۋرو مۇشەلەرىنىڭ نازارىن اۋدارا وتىرىپ, سەنات باسشىسى پارلامەنت الداعى ۋاقىتتا ماڭىزدى قوعامدىق-ساياسي باستامالار مەن اۋقىمدى شارالاردى ىسكە اسىراتىنىن اتاپ ءوتتى. ولاردىڭ ىشىندە كونستيتۋتسيالىق زاڭدارعا تۇزەتۋلەر ەنگىزۋگە, سالىق جانە كەدەن, جەر قويناۋىن پايدالانۋ, جەرگىلىكتى ءوزىن ءوزى باسقارۋ سەكىلدى ماڭىزدى سالالاردى رەتتەيتىن زاڭناماعا وزگەرىستەر ەنگىزۋگە باعىتتالعان زاڭ جوبالارى بار. بيىلعى جىلعى تامىز ايىندا الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ كەزەكتى وتىرىسى مەن پاگۋوش قوزعالىسىنىڭ كونفەرەنتسياسى بولادى. بيۋرو مۇشەلەرى سەناتتىڭ 26 قاڭتاردا بولاتىن وتىرىسىنىڭ كۇن ءتارتىبىن كەلىستى. سەناتورلار «سوت-ساراپتاما قىزمەتى تۋرالى» زاڭ جوباسىن جانە وعان ىلەسپە زاڭ جوباسىن ءبىرىنشى وقىلىمدا قارايتىن بولدى. دەپۋتاتتار سونداي-اق جايىلىمدار تۋرالى جانە زاڭناماعا جايىلىمداردى پايدالانۋ ما­سە­لەلەرى بويىنشا تۇزەتۋلەردى (ەكىنشى وقىلىمدا) تالقىلايدى. الەۋمەتتىك-مادەني دامۋ جانە عىلىم كوميتەتى قازاقستان ۇكىمەتى مەن ءبىلىم, عىلىم جانە مادەنيەت ماسەلەلەرى جو­نىن­دەگى بىرىككەن ۇلتتار ۇيىمى (يۋنەسكو) اراسىنداعى قازاق­ستاندا ورتالىق ازيا وڭىرلىك گلياتسيولوگيالىق ورتالىعىن قۇرۋ تۋرالى كەلىسىمدى راتيفيكاتسيالاۋ تۋرالى زاڭ جوباسىن ودان ءارى پىسىقتاۋدا باس كوميتەت بولىپ بەلگىلەندى.