استاناداعى جوو-دا 2017-2018 وقۋ جىلى 10 قىركۇيەكتە باستالادى

استانادا EXPO-2017 كورمەسىنىڭ وتۋىنە بايلانىستى جوو ءۇشىن 2017-2018 وقۋ جىلى 10 قىركۇيەكتە باستالادى, دەپ حابارلادى Tengrinews.kz. EXPO-2017 كورمەسىن وتكىزۋ كەزىندە ەلورداداعى كولىك قوزعالىسىن جەڭىلدەتۋ ءۇشىن جوعارى وقۋ ورىندارىنداعى 2016-2017 وقۋ جىلىنىڭ سوڭى مەن 2017-2018 وقۋ جىلىنا وزگەرتۋلەر ەنگىزۋ ماسەلەسى قاراستىرىلدى. "جوعارى وقۋ ورىندارىنداعى عىلىمي كەڭەستەردىڭ شەشىمىمەن 2016-2017 وقۋ جىلى 25 مامىردا اياقتالادى. ال 2017-2018 وقۋ جىلى 10 قىركۇيەكتە باستالادى دەپ جوسپارلاندى. سونداي-اق, جوعارى وقۋ ورىندارىنداعى اكادەميالىق كۇنتىزبەلەرگە وزگەرتۋلەر ەنگىزدى", - دەلىنگەن ۆەدومستۆونىڭ حابارلاماسىندا. Cونىمەن قاتار, قر بعم وكىلدەرى قر "بىلىم تۋرالى" زاڭىنا سايكەس, 2017 جىلدىڭ 1 قاڭتارىنان باستاپ ۇبت جوعارى وقۋ ورىندارىنا ءتۇسۋ ءۇشىن تاپسىرىلاتىن ىرىكتەۋ ەمتيحاندارىنىڭ ءبىر فورماسى بولاتىنىن ايتىپ ءوتتى. وسىعان بايلانىستى 2017 جىلدىڭ تۇلەكتەرى ۇبت-نى ەكى كەزەڭ بويىنشا تاپسىرادى: قورىتىندى اتتەستاتسيا, ياعني, مەكتەپتەگى قورىتىندى ەمتيحان, ال ەكىنشى كەزەڭ - ۇبت. ۇبت جوعارى وقۋ ورنىنا ءتۇسۋ ەمتيحانى بولىپ سانالادى. ۆەدومستۆو وكىلدەرىنىڭ مالىمەتىنشە, ۇبت تاپسىرۋ تۋرالى ءوتىنىش 10 ناۋرىز بەن 10 مامىر ارالىعىندا قابىلدانادى. ايتا كەتەيىك, بيىل ۇبت 20 ماۋسىم مەن 1 شىلدە ارالىعىندا, ال كەشەندى تەستىلەۋ 17-23 شىلدە ارالىعىندا وتكىزىلەدى. ال EXPO-2017 كورمەسى استانادا 2017 جىلدىڭ 10 ماۋسىم مەن 10 قىركۇيەك ارالىعىندا وتەدى.