قوستاناي وبلىسىندا بىلتىر 232 سۋيتسيدتىك وقيعا تىركەلگەن

وتكەن جىلى 2015 جىلمەن سالىستىرعاندا وڭىردە سۋيتسيدتىك وقيعالار 27 پايىزعا ازايعان, ياعني 149 وزىنە قول جۇمساماق ارەكەت, 83 ولىممەن اياقتالعان سۋيتسيد تىركەلگەن. وبلىستىق جاستار ساياساتى باسقارماسىنىڭ باسشىسى كەنەش ءالىمجانوۆ رۋدنىي قالاسىندا وتكەن جىلى 13 وزىنە قول جۇمساۋ وقيعاسى بولعانىن, بىراق الدىڭعى ۋاقىتتارمەن سالىستىرعاندا ەكى ەسە ازايعانىن ايتتى. بۇل جاستارمەن جۇرگىزىلگەن جاقسى جۇمىستىڭ ناتيجەسى. قاي قالادا, اۋداندا سۋيتسيدكە بەيىم ادامدارمەن جۇمىس ناشار جۇرگىزىلسە, سول جەردە وزىنە قول جۇمساعاندار قاتارى دا ارتا تۇسكەن. وبلىستىق اكىمدىكتىڭ كەڭەيتىلگەن ماجىلىسىندە وبلىس اكىمى ارحيمەد مۇحامبەتوۆ وتكەن جىلى ولىممەن اياقتالعان ءسۋيتسيدتىڭ قوستاناي قالاسىندا – 30, ارقالىقتا – 32, وزىنە قول جۇمساۋ ارەكەتىنىڭ 37 پايىزعا وسكەندىگىن ايتتى. سونىمەن قاتار, وزىنە قول جۇمساۋعا ارەكەت جاساعاندار التىنسارين اۋدانىندا – 67, اۋليەكول اۋدانىندا – 50, قامىستى اۋدانىندا – 100 پايىزعا وسكەن. قارابالىق اۋدانىندا وزىنە قول جۇمساپ ولگەندەردىڭ قاتارى 33 پايىزعا, مەڭدىعارا اۋدانىندا – 50, ۇزىنكول اۋدانىندا – 22 پايىزعا وسكەن, ال وزىنە قول جۇمساۋعا ارەكەتتەنگەندەر – 23 پايىزعا كوبەيگەن. ۇزىنكول اۋدانى اكىمى قانات سارسەنباەۆتىڭ ايتۋىنشا, سۋيتسيد اۋدانعا سىرتتان كەلگەندەر اراسىندا جيىلەگەن.   ءنازيرا جارىمبەتوۆا «ەگەمەن قازاقستان»