جاستار كونگرەسىنىڭ كەڭەسىن وتكىزدى

پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ ءتورايىمى, قازاقستان جاستار كونگرەسى كەڭەسىنىڭ توراعاسى داريعا نازارباەۆانىڭ جەتەكشىلىگىمەن جاستار كونگرەسىنىڭ الداعى قىزمەتى تۋرالى كەڭەس بولدى, دەپ حابارلادى پارلامەنت سەناتىنىڭ ءباسپاسوز قىزمەتى. د.نازارباەۆا جاستار ساياساتىن ىسكە اسىرۋداعى جەتىستىكتەردى اتاپ وتە كەلىپ, اۋىل-ايماقتاعى جانە الەۋمەتتىك احۋالى تومەن جاستارعا ارنالعان جاڭا مۇمكىندىكتەر اشۋ­دىڭ قاجەتتىگىنە توقتالدى. سەناتور, سون­داي-اق, مەملەكەت جۇزەگە اسىراتىن ماڭىز­دى الەۋمەتتىك باعدارلامالار مەن جوبا­لار تۋرالى جاستاردىڭ حاباردار بولۋ دەڭ­گەيىن ارتتىرۋ جايىندا تاپسىرما بەردى. «جاس­تار­دىڭ ءوزىن ءوزى تانىتۋ ءۇشىن جاعداي تۋعىزىپ, «الەۋمەتتىك ليفتىلەر» جاساپ, ولاردى داع­دارىس جاعدايىندا ءومىر سۇرۋگە ۇيرەتۋ كەرەك», – دەدى د.نازارباەۆا. كەڭەس بارىسىندا ۇيىمنىڭ 2016 جىل­عى جۇمىسى جانە اسكەري-پاتريوتتىق قوز­عا­لىستى, مەكتەپ سپورتىن, جاستار ءتۋريزمىن دامىتۋداعى تۇجىرىمدامالىق ۇسىنىس­تار, سونداي-اق, قازاقستان جاستار كونگ­رە­سىنىڭ مەرەيتويلىق جىلىن مەرەكە­لەۋ باعدارلاماسى تالقىلاندى. د.نازارباەۆا­نىڭ پىكىرىنشە, مەملەكەتتىك بۇقارالىق اقپارات قۇرالدارىنداعى جاستار قىزمەتىن اقپاراتتىق تۇرعىدا جاريا ەتۋدى كۇشەيتۋ قاجەت. «جاستاردى مەملەكەت ىسكە اسىراتىن شارالار تۋرالى حاباردار ەتۋ دەڭگەيىن ارتتىرۋمەن قاتار, ارىپتەستەر ارەكەتىنىڭ تانىمالدىعىن ارتتىرۋ ءۇشىن اقپاراتتىق ارنالاردى پايدالانۋ كەرەك», – دەپ اتاپ ءوتتى سەناتور. كەڭەسكە پارلامەنت دەپۋتاتتارى, جاستار ساياساتى سالاسىنا جەتەكشىلىك ەتەتىن مەكە­مە­لەردىڭ باسشىلارى, دۇنيەجۇزىلىك بانك جوبا­سىنىڭ وكىلدەرى, ۇكىمەتتىك ەمەس سەكتوردى دامىتۋ ينستيتۋتتارىنىڭ باسشىلارى, اسكەري-پاتريوتتىق تاربيە مەن مەكتەپ سپورتىن دامىتۋ سالاسىنداعى قازاقستان جاستار كونگرەسىنىڭ ارىپتەستەرى, جاستار ۇيىمدارىنىڭ كوشباسشىلارى قاتىستى. دۇنيەجۇزىلىك بانكتىڭ «جاستار كورپۋ­سىن دامىتۋ» جوباسىنا ەرەكشە نازار اۋدا­رىلدى. وسىعان بايلانىستى شاراعا 2017 جىلعى قادامدار مەن تەتىكتەردى ىسكە اسىرۋدىڭ العاشقى جوبالارى ىسكە اسىرى­لاتىن الماتى, قاراعاندى, پاۆلودار, وڭتۇستىك قازاقستان وبلىستارى اكىمدەرىنىڭ ورىنباسارلارى دا قاتىستى.