سپورتتىق باسىلىمداردىڭ بولاشاعى بار ما؟

قازىر تەلەۆيزيا مەن ينتەرنەتتىڭ داۋرەنى ءجۇرىپ تۇرعان زامان. ارينە, بۇلاردىڭ قاي جاڭالىقتى بولسىن بۇقاراعا جەدەل جەتكىزۋدە الدىنا قارا سالمايتىنى بەلگىلى. دەگەنمەن, سولاي ەكەن دەپ مەرزىمدى ءباسپاسوزدىڭ ءرولىن جوققا شىعارۋعا بولمايدى. گازەت ءوز وقىرمانىن مەيلىنشە تولىق, جان-جاقتى اقپاراتپەن قامتاماسىز ەتەدى. ءبىزدىڭ بۇل جولى ايتپاعىمىز – ەلىمىزدەگى سپورت تاقىرىبىنداعى ءباسپاسوزدىڭ, اسىرەسە, قازاق ءتىلدى باسىلىمداردىڭ جايى. كەيىنگى جىلدارى نەگىزگى كوزايىمىمىز رەسپۋبليكالىق «قازاق سپورتى» مەن «Sport» گازەتتەرى ەدى. سونىڭ ءوزى كوپ كورىندى مە, قازىر ەكەۋى قوسىلىپ, ءبىر باسىلىم رەتىندە شىعىپ جاتىر. وسىنىڭ سەبەپ-سالدارىن ءبىلۋ ءۇشىن ءبىز تاياۋدا تاراعان «Sport» گازەتىنىڭ باس رەداكتورى بولعان بەلگىلى قالامگەر, تاجىريبەلى جۋرناليست ءدۇرالى دۇيسەباي مىرزانى اڭگىمەگە تارتقان ەدىك. – جالپى, سپورت باسشى­لىعى تارا­پىنان سپورتتىق باسىلىم­دار­عا دەگەن كوزقاراستىڭ تومەن بولۋى نە سەبەپتەن دەپ ويلايسىز؟ – قازىرگى تاڭدا مىناداي ساياسات بار. ول – گازەت-جۋرنالداردى مەم­لە­­كەتتىك مەكەمەلەردەن ءبولۋ. 2019 جىلى 60 جىلدىعىن تويلاعالى وتىر­عان «سپورت» (ورىسشا) جانە «Sport» (قازاقشا) گازەتتەرى وسىدان ءۇش-ءتورت جىل بۇرىن جەكەمەنشىككە ساتىلىپ كەتتى. العاشقىسىنىڭ 2015 جىلى, ال ەكىنشىسىنىڭ 2016 جىلى 5 مىڭىنشى سانى جارىق كوردى, بىراق ونى قاداعالاپ  وتىر­عان, ەلەپ-ەسكەرگەن ەشكىمدى كورمەدىك. جالپى, اتالعان گازەتتەر ەش مەكەمەگە قارامايدى. بۇرىن رەس­پۋب­ليكالىق سپورت ۆەدومست­ۆو­سىنىڭ قاراماعىندا بولعان. ارنايى قارجى بولىنگەن. تارالىمى دا ەداۋىر ەدى. ال جەكەمەنشىكتىڭ قولى­نا وتكەن سوڭ, ەشكىمگە كەرەك بولماي قالدى. مەن بۇل باسىلىمداردىڭ باس­شىلىعىنا 2014 جىلدىڭ باسىندا كەلدىم. سپورت كوميتەتىمەن باي­لا­نىس ورناتىپ, اتالعان كومي­تەت گازەتتى قال-قادەرىنشە ءوز قاراماق­تارىنداعى مەكەمەلەرگە حات جول­داۋ ارقىلى جازدىرۋعا تىرىستى. قازاققا «جازىل» دەپ ايلىق العان كەزدە قاسىندا تىقاقتاپ وتىرىپ, تۇبىرتەككە قول قويعىزىپ الماساڭ, ءوزى «مىنا گازەت مىقتى» دەپ ماقتاپ وتىرسا دا جازىلمايدى. ءتىپتى, وسى كەزدە كەرەمەت تارالىم­مەن ەل اراسىندا بەدەلگە يە بول­عان «قازاق سپورتى» دا سوڭعى جىل­دارى تيراجىن جوعالتا باس­تادى. بۇل ءبىزدىڭ قوعامنىڭ مەر­زىم­دىك با­سىلىمدارعا دەگەن كوز­قارا­سى­نىڭ وزگەرگەندىگىنەن بولار. ايتپەسە, مادەنيەت جانە سپورت مينيسترلىگىنىڭ سپورت كوميتەتى كومەكتەسكىسى كەلىپ-اق وتىر. – قازىرگى تاڭداعى قازاق ءتىلدى سپورت­تىق پورتالداردىڭ جۇمى­سى­نا قانداي باعا بەرەر ەدىڭىز؟ – قۇدايعا شۇكىر, قازىر قازاق ءتىلدى پورتالدار از ەمەس. ءتاپ-ءتاۋىر جۇمىس ىستەپ جاتىر. «الا دوپ», «الامان» دەگەن قازاقشا سايتتار بولدى. قازىر ءاربىر سپورت فەدەراتسياسىنىڭ, مەكەمەلەرىنىڭ جەكە پورتالدارى بار, بىراق سولاردىڭ قازاقشاسى اقساپ جاتىر. ءوز باسىما نۇرعازى ساساەۆ جۇرگىزەتىن استانا قالالىق فۋتبول فەدەراتسياسىنىڭ سايتى ۇنايدى. ال نۇرعازىنىڭ ءاربىر پوستىن ىزدەپ ءجۇرىپ وقيمىن. ىزدەنىس بار: تاقىرىپ تاڭداۋدا دا, ماتەريالدى جازۋ ستيلىندە دە. – تاجىريبەڭىزگە سۇيەنىپ, قازا­ق ءتىلدى سپورتتىق باسىلىمدار باسە­كەگە قابىلەتتى, ومىرشەڭ بولۋى ءۇشىن نە قاجەت دەپ ويلايسىز؟ – مەنىڭ بايقاۋىمشا, قازىر ينتەرنەت-باسىلىمدار ەرەكشە مانگە يە بولىپ كەلەدى. بۇل ءداس­تۇرلى باق-تىڭ, ياعني مەر­زىمدى باسى­لىمداردىڭ ءرولى تومەن­دە­دى دەگەندىك ەمەس. ماسەلە قازىر گازەت وقيتىن ۇرپاقتىڭ ازا­يىپ بارا جاتقاندىعىندا. ءبارى الەۋ­مەت­تىك جەلىگە بۇرىلىپ بار­ادى. سوناۋ كەڭەستىك كەزەڭدە يدەو­لو­گيا مىقتى بولدى. گازەت-جۋر­نال­­دار­دىڭ كەلەشەك ۇرپاقتى تار­­بيە­لەۋدەگى ماڭىزىن ءبىلىپ, سول تۇستا مەكتەپ وقۋشىلارىن گازەت وقۋعا باۋ­لي­تىن پيونەر جاسىن­داعىلاردى «قازاق­ستان پيو­نەرىنە», كومسومول جاسىن­­داعى­لاردى «لەنينشىل جاس­قا» جازدىراتىن. تاعى ءبىر گازەتكە جازىلۋ مىندەتتى بولا­تىن. بىراق ونى ءوزىڭ تاڭداي­سىڭ. ءبىز ول كەزدە ەڭ ارزان (ۇمىت­پاسام, 84 تيىن) «سپورت» گازەتى­نە جازىلاتىنبىز. سپورت باسىلىمى­نىڭ قازىرگى باعاسى دا سونشالىقتى قىمبات ەمەس, جارتى جىلعا – 2 مىڭ تەڭگە. گازەت وقيتىن ۇرپاق جوق دەي المايمىن, دەگەنمەن مەك­تەپتە گازەت وقىماعان بالا قالاي كىتاپقۇمار بولىپ وسەدى؟ قازاق قوعامى گازەتكە ەنجار. ايتپەسە, «Sport» تا, «قازاق سپورتى» دا وزەكتى ماسەلەلەردى كوپ جازدى. شەكەسىنەن شەرتىپ ايتپاي-اق قويايىن, كەزدەسكەندە, سىرتقا شىققاندا سول قوزعالعان ماسە­لەلەر توڭىرەگىندە ريزاشى­لىعىن ءبىلدىرىپ, پىكىرىن ايتىپ جاتاتىندار ءجيى كەزدەسەدى. «وسى ويلارىڭىزدى نەگە گازەتكە جازىپ, پىكىر بىلدىرمەيسىزدەر؟» دەسەڭ, ء«وي, قايدان, ۋاقىت جوق» دەگەن سەكىلدى سىلتاۋمەن كۇمىلجي جاۋاپ بەرەدى. ايتپەسە, قازاق تىلىن­دەگى سپورتتىق باسىلىمدار سون­شا­لىقتى كوپ تە ەمەس قوي. بال­كىم, مەنەدجمەنت جاعى دا جەتىسىڭكىرەمەيتىن بولار. ەل­مەن, جۇرت­پەن ءجيى كەزدەسۋگە, قان­شاما جەردى ارالاپ شىعۋعا مەم­لە­كەتتىڭ كومەگىنە ءزارۋ, ونسىز دا قالت-قۇلت ەتىپ ارەڭ شىعىپ وتىرعان باسىلىمنىڭ مۇمكىندىگى بار ما؟ مەملەكەتتىك تاپسىرىس ارقىلى تەندەردەن دەپ 2-3 ميلليون تەڭگە الاتىنى بار كەيدە. گازەت شىعاراتىندار بىلەدى: ول قاي جىرتىقتى جامايدى؟! سۇراق كوپ. پرەزيدەنت پەن بيلىك پار­تياسى سپورتقا ەرەكشە دەن قو­يىپ وتىرعان زاماندا, سپورتتىڭ داڭ­قى اسىپ تۇرعان تۇستا سپورتتىق باسى­لىم­دارمەن بىرلەسىپ جۇمىس ىستەۋ كەرەك-اق. ونىڭ جولىن سوناۋ بيلىك­تە وتىرعان ازاماتتار بىلەتىن شىعار... – اڭگىمەڭىزگە راحمەت! اڭگىمەلەسكەن قايرات ءابىلدينوۆ, «ەگەمەن قازاقستان»