پرەزيدەنت ستيپەندياسى تاپسىرىلدى

الماتىدا مەملەكەتتىك حاتشى گۇلشارا ابدىقالىقوۆا پرەزيدەنتتىڭ تاپسىرماسى بويىنشا بەلگىلى مادەنيەت جانە ونەر قايراتكەرلەرىنە قازاقستان رەسپۋبليكاسىنىڭ تۇڭعىش پرەزيدەنتى ەلباسىنىڭ 2016 جىلعى مادەنيەت سالاسىنداعى مەملەكەتتىك ستيپەندياسىن تابىس ەتتى. ستيپەنديالار مەملەكەتتىك قولداۋ كورسەتۋ ماقساتىندا قازاقستان رەسپۋبليكاسىنىڭ قۇرمەتتى اتاقتارى مەن ناگرادالارىن يەلەنگەن مادەنيەت جانە ونەر قايراتكەرلەرىنە, سونداي-اق, ايتۋلى شىعارماشىلىق جەتىستىگى ءۇشىن دارىندى شىعارماشىل جاستارعا قازاقستاننىڭ مادەنيەتىن جاساۋعا, ساقتاۋعا جانە دامىتۋعا قوسقان ۇلەسى ءۇشىن بەرىلەدى. بيىلعى ستيپەنديا يەگەرلەرىن قۇتتىقتاي كەلە, مەملەكەتتىك حاتشى گ.ابدىقالىقوۆا  «بۇعان دەيىن تابىستالىپ كەلە جاتقان  مادەنيەت سالاسىنداعى ستيپەنديا مەن پرەزيدەنت ستيپەنديا­سى بىرىكتىرىلىپ, بۇدان بىلاي قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ مادەنيەت سالاسىنداعى مەملە­كەت­تىك ستيپەندياسى دەپ اتالاتىن بولدى. بيىلعى جىلعى ستي­پەنديانىڭ ەرەكشەلىگى – ادە­بيەت پەن ونەردىڭ اعا بۋىن قاي­راتكەرلەرىنىڭ قۇرامى سول قالپىندا ساقتالىپ, ولاردىڭ قاتارى جەمىستى ەڭبەك ەتىپ جۇرگەن جاستارمەن تولىقتىرىلىپ وتىر. 2016 جىلعى ستيپەنديانىڭ تولىق قۇرامى  9 % – 25 پەن 35 جاس ارالىعىنداعى جاستار, 12 % – 35 پەن 60 جاس ارالىعىنداعى ورتا بۋىن, 79 % – 60-تان اسقان    اعا بۋىن وكىلدەرى بولىپ تابىلادى. جالپى, ءتىزىمنىڭ 12 پا­يىزىن ءارتۇرلى ەتنوس وكىلدەرى قۇرايدى»,– دەدى. مەملەكەتتىك حاتشى كەزدەسۋ اياسىندا زيالى قاۋىممەن بىرگە ءارتۇرلى مادەنيەت ماسەلەلەرىن تالقىلاپ, رۋحانيات الەمىندەگى ورتاق ىستەر تۋرالى پىكىر الىستى. ەلباسى مەن ەل ۇكىمەتى كور­سەتىپ وتىرعان قولداۋعا العىسىن بىلدىرگەن جازۋشى سماعۇل ەلۋباي قالامگەرلەر قاۋىمىن كوپتەن بەرى تولعاندىرىپ كەلە جاتقان قالاماقى ماسەلەسىن قامتىعان جاڭا زاڭ جوباسىنىڭ تالقىلانىپ جاتۋى ادە­بيەتكە جانە ونىڭ وكىلدەرىنە تانىتقان جاناشىرلىق ەكەنىن اتاپ ءوتتى. جيىرما بەس جىلدان بەرى كۇلبىلتەلەنىپ, شەشىمىن تابا الماي كەلە جاتقان كينو تۋرالى زاڭ جوباسىنىڭ دا كەش تە بولسا قولعا الىنىپ, پارلامەنتكە جول تارتۋى بۇل سالاداعى كوپ تۇيتكىلدى رەتتەيتىن جاڭا قادام بولماق.  جازۋشىنىڭ ويىنشا, مادەنيەتكە جاسالعان قامقورلىق – حالىققا جاسالعان قامقورلىق. ال, مۇنداي قامقورلىق ءسوزسىز جەمىسىن دە, جەڭىسىن دە بەرمەك. قالامگەر مەملەكەتتىك حاتشىعا «ۇلتتىڭ رۋحىن  كوتەرگەن «الماس قىلىش» ءفيلمى سياقتى الداعى ۋاقىتتا قازاقتىڭ ءداستۇرلى ءدىنىن بايتاق ەلگە تاراتقان  ۇلى تۇلعا قوجا احمەت ياساۋي تۋرالى تاعى ءبىر فيلم ءتۇسىرىلىپ جاتسا, حالىقتىڭ ەڭسەسى كوتەرىلىپ قالار ەدى» دەگەن ۇسىنىسىن ايتتى. بيىل ءبىرىنشى رەت ەلباسىنىڭ مەملەكەتتىك ستيپەندياسىن يەلەنىپ وتىرعان اقىن باۋىرجان جاقىپ اتىن اتاۋعا تىيىم سالعان الاش ارىستارىنىڭ ور­تا­مىزعا قايتا ورالىپ, شىعار­ما­لارىنىڭ وقىرمانمەن قاۋىش­قانىنا قۋانىش بىلدىرە كەلىپ, قازاق ادەبيەتىنىڭ ازات ويلى, ەركىن ادەبيەتكە اينال­عانى تاۋەلسىزدىكتىڭ ەڭ ۇلكەن جاڭا­لىعى ەكەنىن ايتتى. مەملەكەتتىڭ شىعار­ماشىلىق وكىلدەرىنە قولداۋ ءبىلدىرۋى ولاردى جاڭا شىعارما­لار جازۋعا جەتەلەپ, بيىك بەلەس­تەرگە تالپىندىراتىنىن قا­داي ايتقان اقىن جۇرەك­جاردى العىس ءسوزىن تاۋەلسىزدىك تۋ­رالى جىرىمەن تۇيىندەدى. دوس­تىق ۇيىندەگى جىلى – شىرايلى جۇزدەسۋدە ونەر مەن ادەبيەتتىڭ باسقا دا دارا تۇلعالارى ءسوز الىپ, ەڭبەگىن باعالاعان ەلباسى مەن مادەنيەتتىڭ جاناشىرلارىنا العىسىن ءبىلدىردى. مەملەكەتتىك حاتشى گۇل­شا­را ابدىقالىقوۆا الداعى ۋاقىت­تا مادەنيەت جانە ونەر قايرات­كەر­لەرىمەن, ادەبيەت وكىلدەرىمەن ءتۇرلى فورماتتاعى كەزدەسۋلەر جوسپارلانىپ وتىرعانىنان حاباردار ەتىپ, ستيپەنديا يەگەر­لەرىن سول كەزدەسۋلەرگە اتسا­لىسۋعا شاقىردى.  بۇل باسقو­سۋلار ەلىمىزدىڭ رۋحاني-مادەني دامۋىنىڭ وزەكتى ماسەلە­لەرى مەن مادەنيەت, ادەبيەت وكىلدەرىنىڭ كەلەشەك شىعارما­شى­لىق جوسپارلارىن ورتاعا سالىپ, پىكىر الىسىپ, ءتيىستى شەشىم­دەر قابىلداۋ ءۇشىن ۇيىمداس­تىرىلماق. كەزدەسۋ سوڭىندا گ.ابدىقالىقوۆا شىعارماشىل زيالى قاۋىم وكىلدەرى «ءماڭ­گىلىك ەل» جالپىۇلتتىق قۇندى­لى­ق­تارىن ىلگەرىلەتۋگە, قازاقستان مادەنيەتىن ودان ءارى دامىتۋعا ەلەۋلى ۇلەسىن قوساتىندارىنا سەنىم ءبىلدىردى. ايگۇل احانبايقىزى, «ەگەمەن قازاقستان» الماتى