مۇحتار اۋەزوۆتىڭ دومبىراسىن كورىپ ەدىم

كوپ جىل­داردان بەرى وقىرمانى بولىپ قۇمارتىپ وقيتىن «ەگەمەن قازاق­ستاننىڭ» (11 قازان 2016 جىل) كەزەكتى سا­نىندا قوستاناي قالا­سىنداعى ىشكى ىستەر مينيسترلىگىنىڭ گەنەرال-لەيتەنانتى, بۇرىن ىشكى ىستەر ءمينيسترى قىزمەتىن ابىرويمەن اتقارعان شىراقبەك قابىلباەۆ اتىنداعى اكادە­ميانىڭ مۋزەيىندە مۇحتار اۋەزوۆتىڭ كوزىن كورگەن, سول كىسىنىڭ دومبىرا-شەبەرىنە ارنايى تاپسىرىسپەن جاساتقان دومبىراسى جايلى ءنازيرا ءجا­­رىم­بەتوۆانىڭ ماقالاسىن وقىدىم. قاي جىلى ەكەنى ەسىمدە جوق, جۇبا­يى­مىز ەكەۋمىز الماتى قالاسىنداعى مۇ­قان تولەباەۆ كوشەسىندە تۇراتىن شىراق­بەك قابىلباەۆتىڭ پاتەرىندە قوناق بولۋ­دىڭ ءساتى ءتۇستى. شاكەڭنىڭ ۇلى مارات مەنىڭ ۇلكەن باجام قالي قايشىباەۆتىڭ كىشى قىزى راۋشانعا ۇيلەنگەن بولاتىن. ەكەۋ­لەرىنىڭ دە اكەلەرى ءبىرىن-ءبىرى جاقسى سىي­لايتىن, قۇرمەتتەيتىن ەسكى دوستار ەكەن, كەيىن دوستىقتارى قۇدالىققا جالعاسىپتى. سول ۇيدە وتىرعانىمدا كوزىمە ءتور­دە ءىلۋلى تۇرعان دومبىرا ءتۇستى. دوم­بىرانىڭ دۇكەندەردە ساتىلاتىن كوپ دوم­­بىرالارعا ۇقساس ەمەس ەكەنى سىرت بەي­نە­سىنەن-اق بايقالدى. ءتۇسى قوڭىر, ساعاعى ۇزىن ەمەس, ارنايى جاسالعان دومبىرا ەكەنى كورىنىپ تۇر. مەن قىزىعىپ كەتىپ قولىما الىپ تارتىپ كورىپ ەدىم, بۇراۋى بۇزىلماعان دومبىرانىڭ ءوزى سويلەپ, اندەتىپ تۇرعانداي اسەر ەتتى. جاس كەزىمنەن دومبىراعا اۋەستىگىم بولۋشى ەدى, سول دومبىرادا بىرنەشە كۇيدى شەرتتىم, حالىق اندەرىن ورىندادىم. ءبىر كەرەمەتى, دومبىرانى تارتقان سايىن تارتقىم كەلە بەرەدى (سول جىلدارى ەكى قۇدا دا, قۇداعيلار دا, مارات تا دۇنيەدەن وتكەن ەدى). دومبىراعا قىزىققانىم سونشا, راۋشاننان «اكەلەرىڭنىڭ كوزدەرىندەي كورىپ جۇرەيىن, وسى دومبىرانى ماعان سىيلاشى؟» دەپ سۇرادىم. ول: «بەرە المايمىن, جاقىندا اتانىڭ اتىندا مۋزەي اشىلماقشى, سوعان تاپسىرماقشىمىز», دەدى. مەن: «وندا تىپتەن جاقسى بولعان ەكەن», دەپ ريزالىعىمدى ءبىلدىردىم. گازەت­تەگى ماقالانى وقىعاننان كەيىن ۋادەلەرىن ورىنداپ, دومبىرا قۇندى جادىگەر رەتىن­دە تۇپكىلىكتى ورنىن تاپقانىنا, مۋزەيگە بار­عانداردىڭ بارلىعى كورىپ, دومبىرانىڭ تاريحىمەن تانىسىپ, كوپ ماعلۇمات الاتىندارىنا ىشتەي قۋانىپ قالدىم. ەگەر مەندە بولعاندا ونىڭ سىرىن كىم بىلەر ەدى؟ ءوزىم دە دومبىرانىڭ تاريحىن گازەت­تەن وقىپ ءبىلدىم عوي, كەزىندە ەشكىم ايتقان جوق ەدى, بىلسەم سۇراماس ەدىم عوي. مىرزابەك اتەنوۆ,  قارت دارىگەر, زەينەتكەر شىمكەنت