يليا يلين سپورتتان كەتەتىنىن مالىمدەدى

ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا اۋىر اتلەتيكادان ەكى دۇركىن وليمپيادا جانە ءتورت دۇركىن الەم چەمپيونى يليا يلين سپورتتىق مانسابىن اياقتاپ, ەندى بار كۇشىن ءبىلىم الۋعا جۇمسايتىنىن ايتتى. «بوس ۋاقىتتى بەلگىلى ماقساتتا پايدالانۋ كەرەك. مەنىڭ سپورتتىق مانسابىم وكىنىشتى بولسا دا, وسىمەن اياقتالدى. بۇل ەسىكتى جاۋىپ, كەلەسى ەسىكتى اشۋ كەرەك. الايدا كەلەسى كەزەڭگە ءوتۋ ءۇشىن ءبىلىم كەرەك. سوندىقتان, مەن مۆا-عا ءتۇسۋدى ءجون سانادىم. ءبىز 2 عاسىر ءومىر سۇرمەيمىز. بار جوعى 1 عاسىرعا جەتەر جەتپەس ۋاقىت پەشەنەمىزگە جازىلعان. سوندىقتان بارلىعىن ۋاقىتىندا ىستەۋ كەرەك», - دەدى الەم چەمپيونى. وسى ورايدا يليا يلين الداعى جوسپارلارىمەن ءبولىستى. «مەن اعىلشىن ءتىلىن ۇيرەنىپ جاتىرمىن. جاقىندا مۆا-عا ءتۇستىم. ازىرشە ءبىر ساباقتا عانا بولدىم. وقۋ 9 جەلتوقساندا باستالادى. اعىلشىندى كوتەرۋىم كەرەك. سەنبى, جەكسەنبى كۇندەرى تاعى ساباق وقيمىن. مەنىڭ ويىمشا, بۇل بولاشاقتا كەرەك. سەبەبى, الداعى ۋاقىتتا مەن بيزنەستىڭ نە ەكەندىگىن ءبىلۋىم كەرەك. زىلتەمىر كوتەرۋدەن باسقا دا نارسەلەردى ۇيرەنۋىم قاجەت. ياعني ءبىلىمسىز, تاجىريبەسىز ءوز ماقساتىڭا جەتە المايسىڭ», - دەدى تانىمال قازاقستاندىق سپورتشى. سونىمەن قاتار يليا يلين مينيسترلىكتەگى جۇمىسىنان كەتەتىنىن ايتتى. "مەن ادال جۇمىس ىستەدىم. بۇل اناليزدەر "سەن جۇمىس ىستەي المايسىڭ" دەپ جاتىر. ويلانا كەلە, قازىر جۇمىسىمدى قويىپ, ويىمدى جيناقتاۋ كەرەكپىن دەپ شەشتىم.الدىما ماقسات قويىپ, باعىتىمدى انىقتاپ, سودان كەيىن مەنى جۇمىسقا الۋدى سۇرايمىن. مەن ءبىر كەرەمەت بولادى دەپ كۇتىپ ەدىم. بىراق ولاي بولمادى. سوندىقتان ازىرگە ءوتىنىش جازىپ, قورىتىندى جاساۋعا اسىقپاۋ كەرەك دەپ ويلايمىن", دەدى يلين. ەستەرىڭىزگە سالا كەتەيىك, قر ۇلتتىق وليمپيادا كوميتەتى حالىقارالىق وليمپيادا كوميتەتىنەن 2008 جانە 2012 جىلدارداعى وليمپيادا ويىندارىنا قاتىسقان قازاقستاندىق سپورتشى يليا يلينگە قاتىستى جازا قولدانىلعاندىعى تۋرالى رەسمي حابارلاما العان بولاتىن. سپورتشىعا قولدانىلاتىن جازانىڭ مەرزىمىن حالىقارالىق اۋىر اتلەتيكا فەدەراتسياسى (IWF) انىقتايدى.