اقتاۋدا حالىقارالىق فورۋم باستالدى

  اقتاۋ قالاسىندا جىبەك جولى ەلدەرىنىڭ اراسىنداعى ساۋداعا جاردەمدەسۋ جانە جەڭىلدەتۋدىڭ كەدەندىك اكىمشىلىكتەرىنىڭ 7-ءشى حالىقارالىق فورۋمى ءوز جۇمىسىن باستادى, دەپ حابارلايدى قازاقپارات. فورۋمنىڭ جۇمىسىنا قارجى مينيسترلىگىنىڭ مەملەكەتتىك كىرىستەر كوميتەتى توراعاسىنىڭ ورىنباسارى عۇسمان ءامىرين, تۇركيا رەسپۋبليكاسىنىڭ كەدەن جانە ساۋدا مينيسترلىگىنىڭ ۆيتسە-ءمينيسترى رەمزي اكچىن, تۇركىتىلدەس مەملەكەتتەردىڭ ىنتىماقتاستىعى كەڭەسى باس حاتشىسىنىڭ ورىنباسارى ابزال ساپاربەك ۇلى, ازەربايجان, قىرعىزستان, قىتاي, گرۋزيانىڭ كەدەندىك قىزمەت باسشىلارىنىڭ ءبىرىنشى ورىنباسارلارى, سونداي-اق «اقتاۋ» جانە «باكۋ» تەڭىز پورتتارىنىڭ باسشىلارى قاتىسۋدا. وتىرىستى اشقان عۇسمان ءامىرين قازاقستان الەمدىك ەكونوميكالىق جانە ينتەگراتسيالىق پروتسەستەردىڭ تەڭ قۇقىلى قاتىسۋشىسى رەتىندە حالىقارالىق ساۋدانىڭ دامۋىنا, بيزنەس سالاسىنداعى باسەكەگە قابىلەتتىلىكتىڭ جوعارلاۋىنا, كەدەندىك ورگانداردىڭ اشىقتىعى مەن تيىمدىلىگىن ارتتىرۋعا باعىتتالعان بەلسەندى شارالار اتقارىپ جاتقاندىعىن اتاپ ءوتتى. فورۋمدا ماڭعىستاۋ وبلىسىنىڭ اكىمى اليك ايدارباەۆ ءسوز سويلەدى. ول قاتىسۋشىلارعا ايماقتىڭ ساۋدالىق جانە تاسىمالدىق الەۋەتى تۋرالى ايتىپ بەردى. ناقتى اقتاۋ تەڭىز پورتى مەن سالىنىپ جاتقان قۇرىق تەڭىز پورتىنىڭ قازىرگى جانە بولاشاقتاعى مۇمكىندىكتەرى تۋرالى باياندادى. جيىنعا قاتىسۋشىلار ءوز ەلدەرىنىڭ كەدەندىك اكىمشىلەندىرۋدى وڭتايلاندىرۋدىڭ ءتۇرلى مەحانيزمدەرىن قولدانۋدىڭ, وكىلەتتى ەكونوميكالىق وپەراتورلاردى مويىنداۋ جانە الدىن-الا اقپارات بەرۋ سالاسىنداعى تاجىريبەلەرىمەن ءبولىستى. وتىرىستىڭ ءبىرىنشى بولىگىن قورتىندىلاي كەلە, عۇسمان ءامىرين جىبەك جولى ەلدەرىنىڭ كەدەندىك ورگاندارى كەدەندىك پروتسەدۋرالاردى وڭتايلاندىرۋعا ماڭىزدى نازار اۋداراتىندىعىن ايتتى. بۇل كەدەندىك زاڭنامانى بىرىگەيلەندىرۋ, وتكىزۋ پۋنكتەرىن زاماناۋي تەحنيكامەن جابدىقتاۋمەن, سونداي-اق الەمدىك ساۋداعا جاردەمدەسۋ بويىنشا كەدەندىك ورگانداردىڭ بەلسەندى ءىس-قيمىلىمەن بايلانىستى. جيىننىڭ قورىتىندىسىندا اقتاۋ دەكلاراتسياسى قابىلدانادى دەپ كۇتىلۋدە.