ارمانىم – سوچيدە التىن الۋ

ازيادادا ەكى التىن العان تالانتتى فريستايلشى يۋليا گالىشەۆا ءومىر جالعان دەگەن راس ەكەن. يۋليانىڭ اكەسى ەۆگەني گالىشەۆ قىزىن ەرەكشە جاقسى كورەتىن. ءبىر ءۇيدىڭ جالعىز بالاسى بولعان سوڭ اتا-اناسى ونىڭ بەتىنەن قاقپاي, ەركەلەتىپ ءوسىردى. ەلگەزەك قىز التى جاسىندا بي ۇيىرمەسىنە با­رىپ, ونى ۇناتپاعان سوڭ سول كەزدەرى وسكەمەننەن 9 شاقىرىم جەردەگى ەندى عانا ۇيىمداستىرىلعان فريستايل سەكتسياسىنا قاتىستى. ال­عاشقى باپكەرى اننا كورنى­شەۆا توبىقتاي قىزعا ەرىنبەي-جا­لىقباي موگۋلدىڭ قىر-سىرىن ۇيرەتە باستادى. امال بار ما, ەكى جىلدان كەيىن العاشقى باپكەرى تۇر­مىسقا شىعىپ, گەرمانياعا قو­نىس اۋداردى. بىراق كەتەرىندە دا­رىندى بالالارعا ارنالعان سپورت مەكتەبىنىڭ باپكەرى ۆيكتور لە­مەشكوعا تاپسىرىپ كەتتى. اكەسى ەۆگەني الەكساندروۆيچ پەن اناسى سۆەتلانا گەننادەۆنا قىزدارىنىڭ تاۋداي تالابىنا ءسۇيسىنىپ, كەزەك-كەزەك جات­تىعۋلارعا اپارىپ ءجۇردى. 2003 جىلى رەسەيدىڭ سانكت-پەتەربۋرگ قالاسىندا كورشى مەملەكەتتىڭ كۋ­بوگى جارىسىنا يۋ. گالىشەۆا دا قاتىستى. نەبارى 11 جاسار تالاپ­تى قىز ايدى اسپانعا شىعارىپ, كۋبوك چەمپيونى اتاندى. ارادا ءۇش جىلدان كەيىن ول ەلىمىز بىرىنشىلىگىندە كۇمىس القانى يەلەنىپ, سپورت شەبەرى نورماسىن ورىن­دا­دى. فريستايلدىڭ موگۋل ءتۇرىنىڭ ەرەكشەلىكتەرى مەن قيىندىقتارى كوپ. كەدىر-بۇدىر تاۋدان تومەن قاراي قۇلدىراعاندا, بۇرىلىس­تار­دا ءسال قاتەلىك جىبەرسەڭ, قۇلا­عانىڭدى اڭعارماي دا قالاسىڭ. سوندىقتان ونەر كورسەتەر كەزدە ەرەك­شە ساق بولۋ كەرەك. جات­تىعۋلار كەزىندە مۇنداي ءساتسىز­دىكتەر تالاي رەت بولعان. 2007 جىلى نەبارى 15 جاسىندا الەم چەمپيوناتىنا قاتىسىپ, ءتاجىري­بەسىن ۇشتاي ءتۇستى. سول جولى العاشقى التىلىققا ىلىنبەسە دە قايسار قىزدىڭ بولاشاعىنان كوپ ءۇمىت كۇتكەن ەدى جەرلەستەرى. ءتىپتى التىنشى سىنىپقا دەيىن №7-ءشى مەكتەپتە وقىپ جۇرگەن كەزدىڭ وزىندە ۇستازدار يۋليانىڭ جارىس­تارىنا قاتىسىپ, وعان جانكۇيەر بولعان. سول جىلى قر چەمپيونى جانە قولا القانى يەلەنگەنى بار. ءتىل اۋزىمىز تاسقا, بۇدان كەيىن يۋليانىڭ جەڭىستى ساتتەرى جالعاسىپ, ەۋروپانىڭ ساڭلاقتا­رى­مەن تەرەزەسى تەڭ ونەر كور­سەتكەن كۇندەر باستالدى. 2008 جىلى ەۋروپانىڭ ەكى دۇركىن چەم­پيونى اتانىپ, حالىقارالىق ءدا­رەجەدەگى سپورت شەبەرى نورما­سىن ورىندادى. 2009 جىلى جاپونيادا وتكەن الەم چەمپيوناتىنا قا­تىسىپ, مەدال الا الماسا دا باپكەرلەردىڭ كوزىنە ىلىكتى. بىرلەسىپ ونەر كورسەتۋدە الەم چەمپي­ونى اتاندى. ءححى قىسقى اق وليمپيادانىڭ ۆانكۋۆەر قا­لا­سىن­دا وتكەنى بەلگىلى. العاشقى وليمپياداسى بولعان سوڭ قو­بالجىعانى راس. اتتەڭ, سول وكى­نىشتى ءساتتى ۇمىتا المايدى. ءتو­مەن قاراي قۇلدىراۋ كەزىندە ءسال قاتەلىك جىبەرىپ الدى دا, قاتاڭ تورەشىلەر 11-ءشى ورىنعا بىراق سىرعىتىپ جىبەردى. تورەشىلەر تا­راپىنان بۇدان بۇرىندارى دا قيانات شەككەن, وسى جولعى ءادى­لەتسىزدىگى نامىسىنا قاتتى ءتيدى. ءتىپتى موگۋلدى تاستايمىن دەگەن كەزىندە ارىپتەستەرى سابىرعا شا­قىرىپ, جەڭىستى كۇندەرىڭ ءالى الدا دەگەن. راس ەكەن, وتكەن جىلدىڭ 15-ءشى جەلتوقسانىندا فران­تسيا­نىڭ مەريبەل قالاسىندا فريستايلدەن الەم كۋبوگىنىڭ كەزەكتى جارىسى ءوتتى. قازاقستاننان بار­عان قايسار قىز ەۋروپالىق­تاردىڭ ءبارىن تاڭعالدىرىپ, موگۋلدا بۇ­رىنعى چەمپيونداردى شاڭ قاپ­تىرىپ, التىننان القا تاقتى. بۇل قازاق ەلىنىڭ وسى سپورت سالاسىندا تۇڭعىش التىن القاسى. مىنە, ءبىز يۋليانىڭ اناسى سۆەتلانا گالىشەۆانىڭ جۇپىنى ۇيىندە وتىرمىز. ول اتا-اناسىمەن بىرگە تۇرادى ەكەن. نەمەرەلەرىنىڭ ازيادانىڭ قوس دۇركىن چەمپيون بولعانىنا قاريا­لار قۋانىشتى, اقجارقىن قارسى الدى. – يۋليا العان بەتىنەن قايتپايتىن, وجەت ءارى قى­ڭىر مىنەزدى بولىپ ءوستى. فريستايل دەسە ىشكەن اسىن جەرگە قوياتىن. اقىرى ارمانىنا جەتىپ, چەمپيون اتاندى. ال مەنىڭ ارمانىم – جالعىز قىزىم ءۇش جىلدان كەيىن سوچيدە وتەتىن قىسقى وليمپيا ويىن­دارىندا التىننان القا تاقسا دەي­مىن. اكەسى دە يۋليانىڭ وليمپ شىڭىنا شىققانىن ارمانداپ كەتتى. قازىر يۋليامىز ال­ماتىداعى تۋريزم جانە سپورت اكادەمياسىنىڭ ءبىرىنشى كۋرس ستۋدەنتى. ءوزى كۇنى كەشە الماتىعا وقۋىن جالعاستىرۋعا كەتتى. ول جاقتا بارلىق جاعداي جاسالعان. ايتپاقشى, وبلىس اكىمى بەردىبەك ساپارباەۆقا انالىق العىسىمدى جەتكىزگىم كەلەدى. ول 7 قاڭ­تاردا ازيادادان جەڭىسپەن ورال­عان شىعىستىڭ شىمىر ۇل-قىز­دارىنا ەرەكشە قۇرمەت كورسەت­تى. اۋەجايدا دا, رەسپۋبليكا الا­ڭىندا دا مىڭداعان جان­كۇيەر, مەك­تەپ وقۋشىلارى جينالدى. اتاق­تى شاڭعىشىلار ا. پولتورانين, و. ياتسكايا, ە. كولومينا جانە مەنىڭ قىزىما قالىڭ جۇرتشى­لىق­تىڭ ال­دىندا شەتەلدىڭ ءتورت كولىگىن سالتاناتتى جاعدايدا تا­بىس­تادى. مەنىڭشە, مۇنىڭ ءتار­بيە­لىك جاعىنا نازار اۋ­دارعان ءجون. سول كەشكە جينال­عان مەكتەپ وقۋشى­لا­رى ازيا ساڭلاقتارىمەن ەس­كەرتكىش سۋرەتكە ءتۇستى. شىركىن, بىزدەر دە چەم­پيون اتا­نىپ, قازاق ەلى­نىڭ كوك­باي­راعىن الەمدىك جا­رىستاردا جەلبىرەتە بەرسەك, ابىرويعا بولەنسەك دەگەن ويعا باتتى. ەڭ باستىسى, 18-گە ەندى تول­عان قىزىمنىڭ ابىرويى اسقاقتاپ, تاۋەلسىز­دىكتىڭ 20 جىلدىعىنا تارتۋ جاساعان ەر­لىگى ءۇشىن ءدان ري­زامىن, دەپ اعىنان جارىلدى چەمپيون­نىڭ اناسى. ۆ. سميرنوۆتىڭ سوناۋ 1994 جىلعى التىن القاسى­نان كەيىن وليمپيادادا بيىك تۇعىردان كورىنە الماي ءجۇر­گەنىمىز وكىنىشتى-اق. نەسى بار, سول وكىنىشتىڭ ورنىن يۋليا قىزىمىز تولتىرار. وڭداسىن ەلۋباي, وسكەمەن.