اناسىنىڭ مەدالىن ءبىر بوتەلكە اراققا ايىرباستادى

ىشكى ىستەر ورگاندارىنىڭ حابارلارىندا وردەن, مەدالداردىڭ قولدى بولاتىنى جونىندە ءجيى ايتىلىپ جاتادى. ەتىمىز ۇيرەنىپ قالعان با, باس شايقايمىز دا قويامىز. ايتكەنمەن, مىنا ءبىر جاعدايعا باس شايقاي سالۋعا استە بولمايتىنداي. قارتتار ايلىعىنىڭ سوڭعى كۇن­دەرىندە كوكشەتاۋ قالاسىنىڭ 76 جاستاعى تۇرعىنى جەرگىلىكتى ىشكى ىستەر باسقارماسىنا شاعىم­دانىپ, «ەڭبەك ارداگەرى» مەدا­لىنىڭ جوعالعانىن حابارلاعان. پوليتسەيلەر جەدەل ىسكە كىرىسىپ, ءتيىستى امال-شارالاردى تياناقتى اتقارۋى ناتيجەسىندە, ۇرلىقشى انىق­تالىپ, قىلمىستىق كودەكستىڭ 188-باپ, 2-بولىمىمەن جاۋاپقا تارتىلدى. كۇدىكتى كىم دەيسىز عوي؟ سىلدىر­ماققا قۇمار ءجاسوسپىرىم ەمەس, سول زەينەتكەر انانىڭ 44 جاستاعى بالاسى ەكەن. تەكسەرىس بارىسىندا مەدالدىڭ وتكەن شىلدە ايىندا جوعالعانى انىق­تالعان. ەڭ سۇمدىعى, الگى «قا­راساقال» مەدالدى بار-جوعى ءبىر جارتى اراققا ايىرباستاپ جىبەرىپتى. ەندى پوليتسيا قىزمەتكەرلەرى ارزان مەدالدى الا سالعان ازاماتتى ىزدەپ اۋرەگە تۇسۋدە. بالاسى مۇنداي قادامعا بارا قويادى دەپ ويلاماعان قاريا ەندى ارىزىن قايتىپ العىسى كەلەتىن كورىنەدى. انا جۇرەگىن تۇسىنۋگە بولادى. بىراق, بۇل جەردە وكىنىش ۇعىمىنىڭ وزگەشە سيپاتى بار دەپ ويلايمىز. بىرىنشىدەن, كەلتىرىلگەن شىعىن 20 مىڭ تەڭگەگە باعالانىپتى. تۋرا ما­عىناسىندا ايتساق, بۇل مە­دال­­عا ەشقانداي باعا قويا المايسىز. مۇنىڭ استارىندا ەلىمىزدەگى بۇكىل ارداقتىلارىمىزدىڭ ۇزاق جىل­دارعى ابىرويلى ەڭبەگىنىڭ قىم­بات قورىتىندىسى, قۋانىشتى كۇن­دەرىنىڭ ۇمىتىلماس جەتەگى بار. اقمولا وبلىسى