قازاقستان تاۋەلسىزدىك العان العاشقى جىلداردا, باسقاسىن بىلاي قويعاندا, حالىقتىڭ ەڭبەكاقىسى مەن زەينەتاقىسىن بەرۋدىڭ ءوزى وڭاي بولماعانى بەلگىلى. قارجىنىڭ تاپشىلىعى سالدارىنان الەۋمەتتىك سالا كۇردەلى جاعدايعا تاپ بولعانىن بىلەمىز. ارادا شيرەك عاسىر ۋاقىت ءوتتى, قازىر بۇل سالانىڭ حال-احۋالى قالاي؟ الەۋمەتتىك سالانىڭ بۇگىنگى تىنىسىن وڭىرلەردەن كەلگەن تومەندەگى پىكىرلەردەن ايقىنداۋعا بولادى.
ەگەمەندىكتىڭ ەلەڭ-الاڭىندا اۋىلدىق جەرلەردە قيىندىق بولعانى راس. اۋىلدان قالاعا قاراي قونىس اۋدارعاندار كوپ بولدى. الايدا, ەلباسى ن.نازارباەۆتىڭ سارابدال ساياساتىنىڭ ارقاسىندا بۇل قيىندىقتار ارتتا قالدى. شالعايداعى قاروي سەلوسىندا دا وڭ وزگەرىستەر جۇزەگە استى. اۋىلدا زامانعا ساي ەڭسەلى مەكتەپ بوي كوتەرىپ, جاڭا وقۋ قۇرالدارىمەن جاراقتاندىرىلدى. بالاباقشا جۇمىس ىستەيدى.
كوپتەن كەنەۋى كەتىپ تۇرعان مادەنيەت ءۇيى جوندەلىپ, اۋىلدىقتارعا قىزمەت ەتۋدە. ساپالى بايلانىس جۇيەسى بار. ەڭ باستىسى, اۋىز سۋ ماسەلەسى وڭ شەشىلدى. قازىر تازا سۋ ءار ءۇيدىڭ اۋلاسىندا. بۇعان اۋىلدىقتار ءدان ريزا. بۇل بيۋدجەتكە 37 ميلليون تەڭگەگە ءتۇستى. ەندى يگىلىگىن جۇرت كورىپ وتىر. جاڭا دارىگەرلىك امبۋلاتوريا پايدالانۋعا بەرىلدى. ءبىر سوزبەن ايتقاندا, حالىق ەلباسىنىڭ الىس اۋىلداردى دامىتۋعا باسا نازار اۋدارىپ وتىرعانىن ايقىن سەزىنۋدە.
ءبىزدىڭ اۋدان – ەڭ شالعاي اۋدانداردىڭ ءبىرى. جەتپىس جىل بويى قاتتى جامىلعى جولى بولماعان اۋدانعا اسفالت جول كەلدى. كۇنى كەشە عانا اۋدان ورتالىعىنا گاز بەرىلدى. وسىنىڭ ءبارى تاۋەلسىزدىكتىڭ تارتۋى.
زويا بوزشينا,
ويىل اۋدانىنىڭ تۇرعىنى,
قاراوي مەكتەپ-بالاباقشاسىنىڭ كىتاپحاناشىسى
اقتوبە وبلىسى
ولگا يساەۆا,
ورال قالاسىنىڭ تۇرعىنى, الەۋمەتتىك سالا قىزمەتىنىڭ ارداگەرى
تاۋەلسىزدىكتىڭ العاشقى جىلدارىندا الەۋمەتتىك سالادا قىزمەت جاسادىم. ىستىعى مەن سۋىعىن ءوز باسىمنان وتكەرگەندىكتەن, سول ۋاقىتتاعى جاعداي مەن مەملەكەت تاراپىنان حالىققا قانداي الەۋمەتتىك كومەك بولعانى كوز الدىمدا. ەلباسىنىڭ تاپسىرماسىنا وراي, اتاۋلى الەۋمەتتىك كومەك بەلگىلەندى. باسقا بىردە-ءبىر ەلدە بالاماسى جوق, تۇرمىسى تومەن وتباسىلارعا ارنالعان وسى ءبىر قارجىلىق قولداۋ سول تۇستا ولارعا ۇلكەن كومەك بولدى. قازىر دە وسىنداي اتاۋلى الەۋمەتتىك-قارجىلىق قولداۋ بار, بىراق سول جىلدارمەن سالىستىرعاندا وتە از. سەبەبى, سوڭعى جىلدارى رەسپۋبليكامىزدا جاڭا جۇمىس ورىندارى كوبەيدى. ەگەر تاۋەلسىزدىكتىڭ العاشقى جىلدارىندا ءبىر وتباسىنىڭ بارلىق مۇشەسى جۇمىسسىز قالعان بولسا, قازىر بۇل كورىنىس كەلمەسكە كەتتى, جۇمىسسىزدار كۇرت ازايدى. باتىس قازاقستان وبلىسى گۇلنار پارمانوۆا,تاراز قالاسىنىڭ تۇرعىنى
2000 جىلى جامبىل وبلىسىندا بار-جوعى 15 مادەنيەت ءۇيى مەن كلۋب بولعان ەكەن, قازىر – 199. ال 1999 جىلى 21 عانا كىتاپحانا بولسا, بۇگىنگى تاڭدا – 287. ياعني, قازىر جامبىل ءوڭىرىنىڭ ونەرى مەن مادەنيەتى ەرەكشە وركەندەدى. 545 مادەني مەكەمە حالىققا قىزمەت كورسەتىپ وتىر. بۇل – ءتاۋەلسىزدىكتىڭ تارتۋى. تاۋەلسىزدىك تۋى جەلبىرەگەلى بەرى جامبىل وبلىسىندا 92 جاڭا ءبىلىم نىسانى ىسكە قوسىلعان. ونىڭ 71-ءى مەكتەپ, 20-سى بالاباقشا, 1-ەۋى كوللەدج. وسىنىڭ ارقاسىندا 46 توزىعى جەتكەن, 8 ءۇش اۋىسىمدى, 10 ورىن تاپشىلىعى بار, 7 ىڭعايلاستىرىلعان عيماراتتا ورنالاسقان مەكتەپتەر ماسەلەسى شەشىلدى. تاۋەلسىزدىك جىلدارى تەك تاراز قالاسىنىڭ وزىندە 11 مەكتەپ, 56 مەكتەپكە دەيىنگى مەكەمە, ەكى مەكتەپتەن تىس بالالار شىعارماشىلىعى ورتالىعى, التى دەنساۋلىق نىسانى, ءبىر ءمادەنيەت جانە التى سپورت كەشەنى پايدالانۋعا بەرىلىپتى. ارينە, بۇل جاعدايلاردىڭ ءبارى – ەلباسىنىڭ ەل بولاشاعىنا جاساپ وتىرعان ۇلكەن قولداۋى, قامقورلىعى. جامبىل وبلىسى
