تاعزىم كىتابى تانىستىرىلدى

سوعىس قاسىرەتى ەشقاشان ۇمىتىلمايدى. سوندىقتان دا «بوزداقتار» اتتى كىتاپتى شىعارۋشىلار بۇل ماقساتتارىن 1941-1945 جىلدارى مايدان دالاسىنان ورالماعان جانە ەلگە امان-ەسەن ورالعان سوعىس ارداگەرلەرى الدىنداعى پارىز دەپ سانايدى. تاعزىم ەتەدى. بىرەۋ اتاسىن, بىرەۋ اكەسىن, اعاسىن, ءىنىسىن, باۋىرلارىن ىزدەگەندەر قاراسى از ەمەس. كىتاپ بەتتەرىنەن ىزدەۋ سالعان تۋىسقاندارى جايلى جازىلعان دەرەكتەردى وقىپ, سۋرەتتەرىن كورىپ, اتتارى جوعالماعانىنا ۇرپاقتارى قۋانۋدا. كوپشىلىك تىلەگىنە ساي, وبلىستىق مادەنيەت, مۇراعاتتار جانە قۇجاتتاما باسقارماسىنىڭ مەملەكەتتىك مۇراعاتى «بوزداقتاردىڭ» 5-ءشى سوڭعى شىعارىلىمىنىڭ نۇسقاسىمەن دە تانىستىردى. العاشقى جيناق ءۇش توم بولىپ 1994-1997 جىلدار ارالىعىندا جا­رىق كورگەن-ءدى. ال 2014 جىلى 4-تومى  باسىلىپ شىقتى. بۇل كىتاپتا دا مايدانگەرلەر جايلى بارلىق مالىمەتتەر جازىلىپ, تاعزىم جولى ارى قاراي  جالعاساتىنى ايتىلعان. ەندى سوڭعى 5-ءشى تومدا الدىڭعى كىتاپتاردا ەسكەرىلمەگەن كەيبىر جايلار قايتا تولىق­تىرىلدى. جالپى, بۇل كىتاپ­تاردى قۇراستىرۋعا رەسەيدىڭ دە ىزدەستىرۋ وتريادتارى ۇلكەن ۇلەس قوسىپتى. مۇراعات باسشىسى حالەل اكىمحانوۆتىڭ ايتۋىنشا, «بوز­داقتار» كىتابىنىڭ سوڭعى تومىن جازۋدا ولكەتانۋشىلار, تاريحشىلار, ىزدەۋشىلەر بولىپ, بارلىعى ەكى جىل ەڭبەكتەنگەن كورىنەدى. – ارينە, «بوزداقتار» كىتابىنا ءمالى­مەت جيناۋ, ىزدەۋ وڭاي بولعان جوق. مىسالى, كەزىندە مايداندا قازا تاپقان, حابارسىز كەتكەن, تۇتقىنعا تۇسكەن 1384 ادامنىڭ قازىر ەسىمى بەلگىلى بولدى. جانە دە الدىڭعى تومداردا جارىق كورگەن 800-گە جۋىق مايدانگەرلەر تۋرالى قايتادان قوسىمشا اقپارات بەرىلدى. بۇل كىتاپتىڭ ماڭىزدىلىعىن بىردەن اڭعارۋعا بولادى. ويتكەنى, بۇل بارىمىزگە ورتاق تاعدىر. باتىر جاۋىنگەرلەر رۋحى الدىنداعى بورىش-مىندەتىمىز,-دەيدى ح. اكىمحانوۆ. مۇراعات قىزمەتكەرلەرى رەسەي قورعانىس مينيسترلىگىنىڭ ورتا­لىق مۇراعاتىنان, بەلارۋس, فينليانديا ارحيۆتەرىنەن پاۆ­لودارلىق جاۋىنگەرلەر تۋرالى مالىمەتتەر تاپتى. قۇجات­تاردى, سونداي-اق, حاركوۆ قوعامدىق بىرلەستىگى, شىعىس پرۋس­سيادا مەرت بولعان كەڭەس ساربازدارى ەسكەرت­كىش قورى­نىڭ «پاميات» – «ەسكەرتكىش» كوم­مەرتسيالىق ەمەس ۇيىمى, «ساكسون مەموريال­دارى» (گەرمانيا) ءبىر­لەس­تىگى, رە­سەيلىك جانە ءبىزدىڭ وبلىستىڭ ىزدەستىرۋ جاساقتارى ۇسىنىپتى. كونتسلاگەرلەردە تۇت­قىندا بول­عان, پارتيزان جا­ساعى جانە پولشالىق اسكەري قۇرامالار قۇرا­مىندا سوعىسقان پاۆلودارلىق جاۋىنگەرلەر تۋرالى بۇرىن قۇپيا بولىپ كەلگەن دەرەكتەر تابىلىپ, بۇل مالىمەتتەر كىتاپتاردا جاريالاندى. سونىمەن قاتار, جاۋدىڭ لاگەرلەرىندە تۇتقىندا بولعان, قيىر شىعىستا كۆانتۋن اسكەرلەرىن تالقانداۋعا قاتىسقان پارتيزان وتريادتارى مەن پولياك اسكەري قۇرامالارىنىڭ ساپىندا سوعىسقان 5 مىڭنان استام پاۆلودارلىق جاۋىنگەر تۋرالى انىقتالعان دەرەكتەر, سونداي-اق, بۇرىن حابارسىز كەتكەندەر قاتارىندا بولعان جانە ىزدەستىرۋ جۇمىستارى ءناتي­جەسىندە ايقىندالعان جاۋىنگەر تۋرالى مالىمەتتەر دە قوسىلدى. – «بوزداقتار» ەستەلىك كىتابى – سۇراپىل سوعىستىڭ قالدىرعان وشپەس ءىزىن ويشا سارالاۋعا, جەر­لەستەرىمىزدىڭ جاۋىنگەرلىك ەرلىگىنە قۇرمەتپەن باس يۋگە مۇمكىندىك بەرەدى. ونى سوعىس جىلدارى قازا تاپقان جاۋىنگەرلەرگە ارنالعان ماڭگىلىك ەسكەرتكىش دەۋگە بولادى, – دەيدى ح.اكىمحانوۆ. فاريدا بىقاي, «ەگەمەن قازاقستان» پاۆلودار وبلىسى