ورىندى كوتەرىلگەن ماسەلەگە وڭتايلى جاۋاپ تابىلا ما؟

ءماجىلىستىڭ التىنشى شاقىرى­لى­مىنىڭ ەلىمىزدىڭ بارلىق تۇكپىر­لەرىندەگى, ەكونوميكانىڭ بارلىق سالالارىنداعى پروبلەمالاردى كو­تەرىپ, ءتيىستى ورتالىق بيلىك ورگاندارىنا دەپۋتاتتىق ساۋالدار جولداۋدى جيىلەتىپ وتىر. ءبىز كەيىنگى جالپى وتىرىستىڭ بىرىندە جاسالعان ەكى ساۋالعا شولۋ جاساپ كورگەن ەدىك. دەپۋتات شايماردان نۇرىموۆ ءبىلىم جانە عىلىم ءمينيسترى ەرلان ساعاديەۆتىڭ اتىنا ساۋال جولداپ, مەملەكەتتىك ءتىلدىڭ تاۋەلسىزدىكتىڭ 25 جىلىنداعى دامۋىنا كوڭىلى تولمايتىنىن بىلدىرگەن. «ءتىل ادام بالاسىنىڭ نەگىزگى قاسيەتى بولعاندىقتان, ءتىل بايلىعى ەلدىڭ ەلدىگىن, جۇرتشىلىعىن, عىلىمىن, ادەبيەتىن, ونەركاسىبىن, مادەنيەتىن, قوعامدىق قۇرىلىستارى مەن سالت-ساناسىنىڭ, جاۋىنگەرلىك ءداستۇرىنىڭ – مۇراسىنىڭ قاي دارە­جەدە ەكەنىن كورسەتەتىن ءسوزسىز ءدا­لەل­دى مولشەرى», دەگەن باۋىرجان مومىش ۇلىنىڭ سوزدەرىن كەلتىرە وتىرىپ ول, باتىردىڭ عىلىمعا ارقاۋ بولۋعا ءتيىستى وسى تالابىنىڭ باياۋ جۇرۋدە ەكەنىن ايتادى. «جوعارى وقۋ ورىندارىنداعى ستۋدەنتتەردىڭ ءتيىستى پاندەر بويىنشا قولداناتىن قازاق تىلىندەگى وقۋ-ادىستەمەلىك قۇرالدارى جەتىسپەيدى», دەي كەلىپ, ول مينيسترگە ءبىلىم-عىلىم سالاسىنداعى كىتاپتاردىڭ, عىلىمي ەڭبەكتەردىڭ قازاق تىلىندە دايىندالۋى مەن جازىلۋى, سونداي-اق اۋدارمالاردىڭ ساپاسى بويىنشا ىنتالاندىرۋ شارالارىن قولعا الۋ قاجەتتىگىن ايتادى. سونىمەن قاتار, ول «بولاشاق» تۇلەكتەرىنەن «وزدەرى دايىنداعان عىلىمي جۇمىستارىن (ماگيسترلىك جانە دوكتورلىق ديسسەرتاتسيالارى) مەملەكەتتىك تىلگە اۋدارۋىن تالاپ ەتىپ, ولاردى ەلىمىزدىڭ جوو مەن كىتاپحانالارعا تاراتىلۋىن قامتاماسىز ەتۋ كەرەك», دەيدى دەپۋتات. پرەمەر-مينيستر باقىتجان ساعىنتاەۆتىڭ اتىنا جولدانعان دەپۋتات قۇدايبەرگەن ەرجاننىڭ ساۋالىندا «باتىس ەۋروپا – باتىس قىتاي» كولىك ءدالىزىنىڭ سالىنۋى بەلگىلەنگەن ۋاقىتتان كەشىگىپ جۇرگىزىلىپ جاتقان سەبەپتەرى تۋرالى ايتىلادى. «كوپ جەرلەردە وعان مەردىگەرلەردىڭ دايىن­دىق­سىز, تاجىريبەلەرىنىڭ از نەمەسە تەحنيكالىق جابدىقتارىنىڭ جەت­كىل­ىكسىز بولعاندىعى سەبەپ بولىپ وتىر», دەيدى دەپۋتات. سونىمەن قاتار, ول وڭتۇستىك قازاقستان وبلىسىن­داعى ىنتىماق ەلدى مەكەنىن بۇل جولدىڭ ورتاسىنان قيىپ وتكەنىنە نازار اۋدارتىپ, مۇنىڭ اۋىل تۇرعىندارىنىڭ قاتىناسىنا كەدەرگى كەلتىرىپ وتىرعاندىقتان, تۇرعىندار نارازىلىعىن تۋدىرۋدا ەكەنىن جەتكىزەدى. وسىنداي كەلەڭسىز جاعداي تۇركىستان قالاسىندا دا ورىن الىپ وتىر ەكەن. قالانىڭ جانىنان وتكەن جول بالالار اۋرۋحاناسىن ەلدى مەكەننەن ءبولىپ تاستاپ, تۇرعىنداردىڭ ەم-دوم الۋعا بارۋىن قيىنداتقان كورىنەدى. ساۋالىنىڭ قورىتىندىسىندا دەپۋتات ۇكىمەت باسشىسىنىڭ نازارىن وسىنداي ۇنامسىز ىستەردىڭ بولماۋىنا اۋدارۋدى, ۇلكەن جولداردىڭ ەلدى مەكەندەردى اينالىپ نەمەسە بيىك كوپىر ارقىلى ۇستىنەن ءوتۋىن قاراستىرۋدى جانە «باتىس ەۋروپا – باتىس قىتاي» كولىك ءدالىزىنىڭ بويىندا قاجەتتى ينفراقۇرىلىم نىساندارىن سالۋدى سۇرايدى. «بەلگىلى ارا قاشىقتىقتا بولۋعا ءتيىستى جانار-جاعار ماي ستانساسى, اسحانا, دارەتحانا سياقتى ورىنداردىڭ بولماۋى حالىقتى تولعاندىرۋدا», دەيدى ول. ورىندى ساۋالدار زەرتتەلىپ, ورايلى جاۋاپتار بەرىلەتىن شىعار دەگەن ۇمىتتەمىز. ازىرلەگەن جاقسىباي سامرات, «ەگەمەن قازاقستان»