اسەم ورداداعى اسەرلى كەش

الماتىداعى قازاق مەملەكەتتىك قىزدار پەداگوگيكالىق ۋنيۆەرسيتەتىندە تاۋەلسىزدىگىمىزدىڭ 25 جىلدىق مەرەيتويىنا جانە سەمەي پوليگونىنىڭ جابىلعانىنا 25 جىل تولۋىنا وراي بەلگىلى اقىن, جۋرناليست, فيلولوگيا عىلىمدارىنىڭ دوكتورى, پروفەسسور باۋىرجان جاقىپتىڭ شىعار­ماشىلى­عىنا ارنالعان «قازاق جولى» اتتى ادەبي-سازدى كەش ءوتتى. وننان استام كىتاپتىڭ اۆتورى, ۇلتتىق عىلىم اكادەمياسىنىڭ كوررەسپوندەنت-مۇشەسى, ماكەدونيا, تۇركيا, ازەربايجان ەلدەرىندە وتكەن «بۇكىل تۇركى دۇنيە­سى» اقىندار فەستيۆالىنىڭ لاۋرەاتى, «قۇرمەت» وردەنىنىڭ يەگەرى باۋىرجان جا­قىپتىڭ ەل ەگەمەندىگىنە, تۋعان جەردىڭ تا­بي­عاتىنا ارنالعان, ەلدىڭ, جەردىڭ مۇڭىن ارقالا­عان ولەڭدەرى وسى جىر كەشىنە جينالعان قاۋىمنىڭ كوڭىلىن سەرپىلتتى. قازاق دالاسىنىڭ قاسىرەتىنە اينالعان سەمەي پوليگونى تۋرالى «جان داۋاسى» پوەماسىن قىزدار ۋنيۆەرسيتەتىنىڭ ونەرلى ارۋلارى تەاترلاندىرعان قويىلىم رە­تىندە كورسەتىپ, تۋعان جەرىنىڭ ايانىشتى تاعدىرىن جىرىنا ارقاۋ ەتكەن اقىن مۇ­ڭىن ايشىقتاي ءبىلدى. ۋنيۆەرسيتەت ستۋدەنتتەرى اقىننىڭ «دەگەلەڭ تاۋىنىڭ زارى», «جاپىراقتار جىرى», «قۋراعان توعايدىڭ سوڭعى مۇڭى», «بوز دالانىڭ مۇڭى», «تارتىلعان وزەننىڭ مۇڭى», «جەلدىڭ جوقتاۋى» اتتى ولەڭدەرىن تىڭدارماندار جۇرەگىنە جەتكىزە, مانەرلەپ وقىپ بەردى.  پوەزيالىق كەشتە سونداي-اق, اقىن قۇرمەتىنە ارنالعان ارناۋ ولەڭ وقىلىپ, ءوز ولەڭدەرىنە جازىلعان «تۇعىر», «ەگەمەن ەلىم» اندەرى شىرقالدى. كەش بارىسىندا باۋىرجان جاقىپ قازاق رۋحىنىڭ تابيعاتى مەن تاعدىرىنا ورىلگەن «دومبىرا», «تامىزدىڭ 29-ى», ەلىمىزدىڭ ەگەمەندىگىنە ارنالعان «مەنىڭ قازاقستانىم!», «قولتاڭبا» سىندى كوپتەگەن ولەڭدەرىن وقىپ, جاستاردى وتان­سۇيگىشتىككە تاربيەلەيتىن جىرلارىنان شاشۋ شاشتى. جاستاردىڭ ولەڭ, پوەزيا, ماحاببات, ەل رۋحانياتى, قازاق قىزى تاقىرىپتارىنا قاتىستى قويعان سۇراقتارىنا جاۋاپ بەرگەن اقىن قىزداردىڭ قاراشاڭىراعىنا بىرنەشە كىتابىن تارتۋ ەتىپ, اق تىلەگىن ارنادى. «قىزدار ۋنيۆەرسيتەتى تاربيەنىڭ, تاعىلىمنىڭ, ءبىلىمنىڭ وشاعى. مەن ءۇشىن سانالى, پاراساتتى, ءبىلىمدى قىزدار­مەن قاۋىشۋ, پىكىرلەرىڭىزدى ءبىلىپ, ۇندەرىڭىزدى ەس­تۋ, سىرلى سۇحبات قۇرۋ ەرەكشە عانيبەت, ءۇل­كەن باقىت. بۇل قاسيەتتى شاڭىراقتىڭ ءبىز ءۇشىن ورنى ارقاشان بولەك. قاراكوز قا­رى­ن­ داستارىمنىڭ بىلىكتى دە ءبىلىمدى مامان, شاڭىراقتىڭ تۇتقاسى, كەرەگەسىنىڭ بەرىك بولۋى ءۇشىن قىزمەت ەتەتىن ۇلت تاربيەشىلەرى بولاتىنىنا سەنەمىن. ارقايسىمىز ەل تاۋەلسىزدىگىنە قىزمەت ەتسەك, الدىعا قويعان ماقساتتىڭ بارىنە جەتەمىز», – دەدى قالامگەر. تاعىلىمى مول جىر كەشىندە بىرقاتار اقىندار, اتاپ ايتقاندا, قازاقستاننىڭ ەڭبەك سىڭىرگەن قايراتكەرى رافاەل نيازبەك, حالىقارالىق «الاش» سىيلىعىنىڭ لاۋرەاتى ادىلعازى قايىربەكوۆ, جازۋشىلار وداعى باسقارما توراعاسىنىڭ ورىنباسارى جاناربەك ءاشىمجان قاتىسىپ, باۋىرجان جاقىپ شىعارماشىلىعىنا قاتىستى لەبىزدەرىن ءبىلدىرىپ, ولەڭ وقىدى. ميرا بايبەك, «ەگەمەن قازاقستان» الماتى