«ارىستانداي ايباتتى, جولبارىستاي قايراتتى, قىرانداي كۇشتى قاناتى, مەن جاستارعا سەنەمىن!». ماعجان اتامىز ايتقان بۇل ءسوز قانشا زامان اۋىسسا دا ءمانى مەن ماڭىزىن ەش جويماق ەمەس. ءار داۋىردە جاستارعا سەنىم ارتىپ, سولاردىڭ جولىنا ۇلكەن ۇمىتپەن قاراعان. كەلەشەكتى كەمەل, بولاشاقتى باياندى ەتەدى دەپ جاۋاپكەرشىلىك ارتقان. اعا ۇرپاقتىڭ جاستارعا بار قامقورلىعىن اياماي, قاجەتتى ءبىلىمىن جيناپ, بىلىكتىلىگىن ارتتىرۋدا جولباسشى بولۋىنىڭ سىرى دا وسىندا جاتىر. بۇگىن دە تاۋەلسىز قازاقستاندى وركەنيەتتىڭ كوشىنەن قالدىرمايتىن, ۇلتتى ۇشپاققا شىعارار جاستارعا داڭعىل جول سالىنىپ جاتىر. ەلباسىنىڭ ءوزى تىكەلەي باستاماشى بولىپ جاستاردىڭ «بولاشاق» باعدارلاماسىمەن شەت مەملەكەتتەردە ءبىلىم الىپ, وزگەنىڭ وزىق تاجىريبەلەرىمەن تانىسۋىنا مۇمكىندىك جاساۋى دا سوندىقتان.
قىزىلوردا وبلىسىندا بولاشاقتىڭ كىلتى سانالاتىن جاستاردىڭ «ماڭگىلىك ەل مۇراتى – تاۋەلسىزدىك» تاقىرىبىندا ءحىى فورۋمى ءوتتى. وعان تالاپتى دا تالانتتى جاستار جينالدى. فورۋم بارىسىندا 4 باعىتتان تۇراتىن سەكتسيالىق جۇمىستار ۇيىمداستىرىلىپ, جاستار ەركىن پىكىر الماسۋعا مۇمكىندىك الدى. سونىمەن قاتار, وبلىستاعى مەملەكەتتىك جاستار ساياساتىن جۇزەگە اسىرۋدىڭ 2020 جىلعا دەيىنگى ستراتەگياسىنىڭ جوباسى تالقىلاندى. ەل تاۋەلسىزدىگىنىڭ 25 جىلدىعىن دارىپتەگەن جاستار فورۋمىنىڭ جۇمىسى تابىستى ءوتتى دەۋگە بولادى.
فورۋمنىڭ العاشقى كۇنىندە «مەملەكەتتىك جاستار ساياساتىن جۇزەگە اسىرۋداعى مەملەكەتتىك مەكەمەلەردىڭ جانە جاستار ۇيىمدارىنىڭ ءوزارا ءىس-قيمىلى», «ۇيىمداستىرىلماعان جاستارمەن جۇمىس جاساۋدىڭ جاڭا تاسىلدەرى», «جاستار ساياساتىنا تالداۋ جانە مونيتورينگ جۇرگىزۋ», «مەملەكەتتىك جاستار ساياساتى سالاسىندا جاڭا جوبالاردى جۇزەگە اسىرۋ تەتىكتەرى» سەكىلدى تاقىرىپتاردا ەركىن فورماتتاعى پىكىر الماسۋلار ۇيىمداستىرىلدى. بىرقاتار ماماندار سالا توڭىرەگىندەگى ويىمەن ءبولىسىپ, ءبىلىم جانە عىلىم مينيسترلىگى جاستار ساياساتى دەپارتامەنتىنىڭ باس ساراپشىسى ەرنۇر بيحوجاەۆ جاستار ساياساتى – ەل ەرتەڭىن ايقىندايتىن باستى باعىت ەكەنىن اتاپ ءوتتى.
– جاستار – بولاشاققا اپاراتىن التىن كوپىر. ءاربىر وسكەلەڭ ۇرپاق جەكە قابىلەتىنە جانە كاسىبي بىلىمىنە ساي قوعامدا ءوز ورنىن تابۋى قاجەت. ءبىزدىڭ الەۋمەتتىك-ەكونوميكالىق دامۋ جولىنداعى قارقىنىمىز, جاستاردىڭ قوعامدىق-ساياسي ومىردەگى ۇستانىمىنا, ەرتەڭگى كۇنگە دەگەن سەنىمى مەن بەلسەندىلىگىنە تىكەلەي بايلانىستى. ەندىگى كەزەكتە ءبىز جاستاردىڭ اقپاراتتىق-ساياسي مادەنيەتىن كوتەرۋگە كوڭىل اۋدارۋعا ءتيىسپىز. سونداي-اق, قازىر الەۋمەتتىك-ەكونوميكالىق جاعدايدى جاقسارتۋعا, بولاشاق ۇرپاقتىڭ قالىپتاسۋى مەن جان-جاقتى دامۋىنا تەك ارنايى جاستار باعدارلامالارى عانا ەمەس, ەلىمىزدە ىسكە اسىرىلىپ جاتقان ءبىلىم بەرۋدىڭ, دەنساۋلىق ساقتاۋدىڭ, ۇدەمەلى يندۋستريالىق-يننوۆاتسيالىق دا-
مۋدىڭ اۋقىمدى مەملەكەتتىك باعدارلامالارى باعىتتالعان. ولاردىڭ قاتارىندا «جۇمىسپەن قامتۋدىڭ جول كارتاسى-2020», «بيزنەستىڭ جول كارتاسى-2020», «قولجەتىمدى باسپانا-2020» باعدارلامالارى بار. ەلباسى تاپسىرماسىنا سايكەس, اۋىل جاستارىنا ارنالعان «ديپلوممەن – اۋىلعا!» جوباسى دا جەمىسىن بەرۋدە. «مەملەكەتتىك جاستار ساياساتى جاستارعا ەلىمىزدىڭ تولىققاندى ازاماتى بولۋعا مۇمكىندىك بەرۋى ءتيىس» دەگەن بولاتىن ەلباسى نۇرسۇلتان نازارباەۆ. قازىر ول ءىس جۇزىندە جۇزەگە اسىرىلىپ, جاستار ساياساتى ەل ەرتەڭىن ايقىندايتىن باستى باعىت ەكەنىن دالەلدەۋدە, – دەدى ە.بيحوجاەۆ.
«قازاقستان جاستار كونگرەسى» زتب توراعاسى ايدىن ءسابيتوۆ الەۋمەتتىك جوبالار مارگينال جاستارمەن جۇمىس جۇرگىزۋ, ولاردى جۇمىسقا ورنالاستىرۋ سەكىلدى ماسەلەلەردى قامتۋى ءتيىس ەكەنىن ايتتى. جاستار ماسەلەسىنە كەلگەندە, مارگينال جانە NEET ساناتىنداعى جاستاردى قوعامعا بەيىمدەۋدى باستى نازارعا الۋ كەرەكتىگىن تىلگە تيەك ەتىپ, ۇيىمداستىرىلماعان جاستارمەن جۇمىس جاساۋدىڭ جاڭا ءتاسىلدەرىن ۇسىندى.
فورۋمنىڭ نەگىزگى جۇمىسى كەلەسى كۇنى قارقىن الدى.
اۋدانداردان كەلگەن ءبىر توپ فورۋم دەلەگاتتارى «بولاشاق» ۋنيۆەرسيتەتىندە باس قوسىپ, سەكتسيا وتىرىسى جالعاسىن تاپتى. ءارى قاراي شارا ا.توقماعامبەتوۆ اتىنداعى قالالىق مادەنيەت ۇيىندەگى پلەنارلىق وتىرىسقا ۇلاسىپ, وبلىس اكىمىنىڭ ورىنباسارى رۋسلان رۇستەموۆ جالىندى جاستارمەن كەزدەستى.
– ءبىز – «اعادان – اقىل, ىنىدەن – ىزەت» دەپ, كەيىنگى تولقىنعا سەنىم ارتاتىن حالىقپىز. سىر ءوڭىرىندە جاستار ماسەلەسى ءبىر ءسات تە نازاردان تىس قالعان ەمەس. بۇگىندە قالاداعى جانە اۋداندارداعى جاستار رەسۋرستىق ورتالىعىندا ولارمەن جۇمىس جاسايتىن ماماندار ناتيجەلى قىزمەت اتقارۋدا. 20 مىڭنان استام جاس «ديپلوممەن – اۋىلعا!», «جاستار تاجىريبەسى», «جاسىل ەل» مەملەكەتتىك باعدارلا-مالارىنىڭ قاتىسۋشىسى اتانعان. حالىقارالىق «بولاشاق» باعدارلاماسى اياسىندا 200-گە جۋىق جاس ءبىلىم الدى. 80-گە جۋىق باعدارلاما تۇلەگى ءوڭىر دامۋىنا ەلەۋلى ۇلەس قوسىپ كەلەدى. «جۇمىسپەن قامتۋدىڭ جول كارتاسى-2020» باعدارلاماسى اياسىندا دا 50-دەن استام جوبا جۇزەگە اسۋدا. جاستارعا ايرىقشا كوڭىل ءبولگەن مەملەكەت ساياسي جانە ەكونوميكالىق تابىسقا جەتە الاتىنى ءسوزسىز. سوندىقتان, ەلىمىزدە جاستاردى جالپى قوعامدىق ۇدەرىستەرگە قوسۋ ماقساتىندا ىنتالاندىرۋ شارالارى ىسكە اسىرىلىپ, ولاردىڭ ءوزىن ءوزى جۇزەگە اسىرۋى ءۇشىن مەملەكەتتىك دەڭگەيدە جاعداي جاسالۋدا. ءبىزدىڭ ماقساتىمىز – جاستارعا جاعداي جاساپ, قاجەتتى قولداۋ كورسەتۋ. الداعى فورۋم جۇمىسىنا ساتتىلىك تىلەيمىن, – دەدى رۋسلان رۇستەم ۇلى.
كەلەسى ءسوز العان «جاستار رەسۋرستىق ورتالىعى» كمم ديرەكتورى جاسۇلان الدابەرگەنوۆ وبلىستاعى جاستار ساياساتىنىڭ دامۋ قارقىنى جايلى تارقاتىپ ايتتى. ونىڭ ايتۋىنشا, ورتالىق 2020 جىلعا دەيىنگى جۇمىس مودەلىنىڭ تۇجىرىمداماسىن دايىنداپ, سونىڭ اياسىندا جۇمىس جۇرگىزىپ كەلەدى. سونىمەن بىرگە, ورتالىق بۇگىندە جاستاردىڭ تىڭ يدەيالارىن جۇزەگە اسىرۋىنا ىقپال ەتەتىندەي جابدىقتالعان. مۇندا پىكىر الماسۋ, جاس تىلشىلەر, ەرىكتىلەر كلۋبى, «جايدارمان» ۇيىرمەلەرى جۇمىس ىستەيدى جانە اتالعان ۇيىرمەلەرگە بۇگىندە 300-گە جۋىق جاس قىزىعۋشىلىق تانىتىپ, مۇشە رەتىندە تىركەلگەن.
پلەنارلىق وتىرىس سوڭىندا وبلىستىڭ بەلسەندى جاستارىنىڭ ءبىرى, تاۋەلسىزدىك قۇرداسى راحمەتۋللا جاپپاربەرگەنوۆ فورۋم جاستارىنىڭ ۇندەۋىمەن تانىستىرىپ, جاستاردى يگى ءىستەردىڭ ۇيىتقىسى بولۋعا شاقىردى. ال «جاس وتان» جق وبلىستىق فيليالىنىڭ توراعاسى ابىلايحان سابانباەۆ بيىلعى جىلدىڭ 1 جەلتوقسانىندا استانا قالاسىندا وتەتىن رەسپۋبليكالىق جاستار فورۋمىنا قاتىساتىن بەلسەندى 30 جاس دەلەگاتتى حابارلادى.
ەكى كۇنگە سوزىلعان اۋقىمدى شارادا بەلسەندى جاستار وسىلايشا ايماقتاعى جاستار ساياساتىنىڭ وڭ وزگەرىستەرىنە كۋا بولىپ, تاجىريبە الماستى. ناقتى ماسەلەلەرگە توقتالىپ, ۇسىنىستارىمەن ءبولىستى.
فورۋم اياسىندا وبلىس اكىمى قىرىمبەك كوشەرباەۆ جاستار ۇيىمدارىنىڭ كوشباسشىلارىمەن كەزدەستى. ايماق باسشىسى الدىمەن ەلباسىمىزدىڭ جاستارعا دەگەن قامقورلىعىنا توقتالدى. سونداي-اق, ول ەل ەرتەڭى بۇگىنگى جاس ەكەندىگىنە باسا نازار اۋدارىپ, كەلەر زاماننىڭ وڭاي بولمايتىندىعىن, قيىندىقپەن كۇرەسە ءبىلۋ كەرەكتىگىن جەتكىزدى.
– ءبىزدىڭ ماقساتىمىز – بەلسەندىلەردى كورسەتە وتىرىپ, جاستاردىڭ ناقتى ماسەلەلەرىن تالقىلاپ, ولاردى شەشۋ جولدارىن ايقىنداۋ. بۇگىنگى زامان, بولاشاق بىلىمدىگە تيەسىلى. سوندىقتان, ءاربىر جاستىڭ ءبىلىم الۋى مەن جۇمىسپەن قامتىلۋى ءۇشىن كۇش بىرىكتىرە جۇمىس جاساۋىمىز كەرەك. اسىرەسە, سىزدەرگە ارتىلار جاۋاپكەرشىلىك جوعارى, – دەدى ايماق باسشىسى.
قىرىمبەك ەلەۋ ۇلى بۇل ورايدا الەمنىڭ ءىلىم-ءبىلىمى دامىعان ەلدەرىن اڭگىمەلەپ, وركەنيەتتىڭ وزىق ۇلگىسىنە قادام باسقان تۇلعالاردىڭ ومىرىنەن مىسالدار كەلتىردى. ايتالىق, الەمنىڭ باي كاسىپكەرلەرىنىڭ ءبىرى, كانادالىق عالىم يلون ماسكتىڭ باعىندىرعان بيىگى بۇگىندە اڭىزعا اينالىپ وتىر. بىراق, شىندىق – بولاشاقتا مۇناي-گاز ونىمدەرىنە سۇرانىس ازايادى, ەلەكتر قۋاتى جاپپاي كۇننەن, جەلدەن وندىرىلەدى. سول ۋاقىتتا ەكونوميكاسى «قارا التىنعا» تاۋەلدى قازاق ەلى قالاي كۇن كورەدى؟ ارينە, بۇل تىعىرىقتان تەك ءبىلىمنىڭ كۇشىمەن شىعا الامىز.
قىرىمبەك كوشەرباەۆ جيىن بارىسىندا بۇگىنگى قازاق جاستارى اراسىندا قالىپتاسقان كۇرمەۋلى ماسەلەلەردى ورتاعا سالدى.
وبلىستىق ىشكى ساياسات باسقارماسىنىڭ مالىمەتىنشە, قىزىلوردا وبلىسىندا نە وقۋدا جوق, نە جۇمىستا جوق جاستاردىڭ سانى 20 مىڭنىڭ ءۇستىندە. وركەنيەتتى ەكونوميكالىق ىقپالداستىق جانە دامۋ ۇيىمىنا مۇشە ەلدەر مۇنداي جاستاردى NEET ساناتىنداعىلار دەپ اتايدى ەكەن. سونىمەن, NEET-تىكتەرگە قايتىپ قول ۇشىن سوزامىز؟ الدە, «كۇل بولماسا, ءبۇل بولسىن» دەپ جۇرە بەرەمىز بە؟
قىزىلوردا وبلىسىندا قازىرگى تاڭدا 15 باعىتتان تۇراتىن مالىمەتتەر بازاسى جاساقتالۋدا. بازاعا مەكتەپ بىتىرۋشىلەر تۋرالى تولىق اقپارات جيناقتالادى. ياعني, كىمنىڭ, قايدا, نە ىستەپ جۇرگەنى انىقتالىپ, قاجەتتى كومەك كورسەتىلۋى كەرەك. كومەك دەگەندە, قابىلدانعان باعدارلامالار مەن قولعا الىنعان جوبالارعا تارتىلادى. ماسەلەن, بيىل «سەرپىن» جوباسى بويىنشا جوعارى وقۋ ورىندارىنا ءتۇسۋ ءۇشىن 4 مىڭعا جۋىق, كاسىپتىك-تەحنيكالىق كوللەدجدەرگە 1050 گرانت ءبولىندى. بۇل – ۇبت-دان تومەن بالل جيناعان جانە قاتىسپاعان تۇلەكتەرگە جاسالاتىن جاقسىلىق. بىزدەگى تاعى ءبىر جاعىمدى جاڭالىق – سوڭعى جىلدارى قىزىلوردالىق جۇزدەگەن تۇلەك رەسەيدىڭ ماڭدايالدى وقۋ ورىندارىندا تەگىن وقىپ جاتىر. تەگىن بولعاندا بار قارجى رەسەيدىڭ ەسەبىنەن, مۇنداي ءمۇمكىندىككە وزگە ايماقتار اراسىندا ءبىرىنشى قول جەتكىزىپ وتىرمىز.
كەڭەستىك كەزەڭدە ستۋدەنتتەر قۇرىلىس وتريادتارىنا جازىلىپ, ەڭبەك ەتەتىن. جاستاردى ەڭبەككە باۋلىپ, ءوز بەتىمەن ءومىر سۇرۋگە تاربيەلەۋدىڭ توتە جولى ەدى بۇل. قىزىلوردا وبلىسىندا ءجىبى ۇزىلگەن ءداستۇر قايتا جاندانۋدا دەسەك, ارتىق ايتقاندىق بولماس. ناقتىلاساق, وسى جازدا جۇزدەگەن جاس ۋاقىتىن قۇر وتكىزبەي, قۇرىلىس نىساندارىندا ەڭبەك ەتتى.
قىزىلوردا وبلىسىندا ايماق باسشىسىنىڭ باستاماسىمەن قۇرىلعان جاستار رەسۋرستىق ورتالىعى بار. قازىرگى تاڭدا مۇنداي ورتالىقتى بارلىق
اۋداندا ۇيىمداستىرۋ جۇمىستارى جۇرۋدە. قىرىمبەك ەلەۋ ۇلى جۇزدەسۋدە اۋدانداردا جاستار ورتالىعىن اشۋدى جىل اياعىنا دەيىن ءبىتىرۋدى تاپسىردى. قارجى قاجەت بولسا, تەز ارادا شەشىپ بەرۋگە كومەكتەسەتىنىن ايتتى. بۇل ورتالىقتىڭ باستى ەرەكشەلىگى سول – قوعامنان تىس قالعان جاستارمەن جۇمىس جاسايدى. ورتالىق جەتەكشىسى جاسۇلان الدابەرگەنوۆتىڭ ايتۋىنشا, جىل باسىنان بەرى ۇجىم 22 بوس جۇمىس ورنى جارمەڭكەسىن وتكىزىپ, 33 مىڭ جاسقا كەڭەس بەرگەن. الداعى ۋاقىتتا جاستار رەسۋرستىق ورتالىعىندا كوۆوركينگ, پروديۋسەرلىك, سپورتپەن شۇعىلداناتىن, ۆيدەو-ويىن, پسيحولوگيالىق بولمەلەر جۇمىس جاساماق.
جيىن سوڭىندا جاستار تاراپىنان ايماق باسشىسىنا ءتۇرلى ۇسىنىس-تىلەكتەر ايتىلدى. ءوز كەزەگىندە قىرىمبەك ەلەۋ ۇلى جاستاردىڭ پىكىرى ەسكەرىلەتىنىن جەتكىزىپ, ولاردىڭ بولاشاعىنا اق جول تىلەدى. قۋانارىمىز, بۇگىندە سىر ەلىنىڭ جاستارعا جاسار قامقورلىعىن باسقا وبلىستار وزدەرىندە جۇزەگە اسىرۋعا ىقىلاس تانىتىپ وتىر. ايتالىق, جۇزدەسۋگە قاتىسقان «جاس وتان» جاستار قاناتىنىڭ» توراعاسى شاحماردان بايمانوۆ ءوز سوزىندە ەڭبەك رەسۋرستارى بالانسىن ءازىرلەۋ جانە مارگينال جاستارمەن جۇمىس جاساۋ تاجىريبەسىن قازاقستان بويىنشا ىسكە قوسۋعا بولاتىندىعىن جەتكىزدى.
ەرجان بايتىلەس,
«ەگەمەن قازاقستان»
قىزىلوردا
دەلەگاتتار پىكىرى
شاحماردان بايمانوۆ, «نۇر وتان» پارتياسى «جاس وتان» جق توراعاسى: – ەڭ الدىمەن, ۇيىمداستىرۋشىلارعا العىس بىلدىرەمىن. فورۋم كوڭىلىمنەن شىقتى. مۇندا ءبىز وبلىستاعى مەملەكەتتىك جاستار ساياساتىن جۇزەگە اسىرۋدىڭ 2020 جىلعا دەيىنگى ستراتەگياسىنىڭ جوباسىن تالقىلادىق. سونىمەن قاتار, ءوڭىر دامۋى ءۇشىن ماڭىزدى ستراتەگيالىق قۇجاتتىڭ تاۋەلسىزدىكتىڭ 25 جىلدىعىنا وراي قابىل-داناتىنىنا قۋانىشتىمىن. وبلىستاعى NEET ساناتىنداعى جاستارمەن جۇمىس ىستەۋ ۇدەرىسىنە دە جوعارى باعا بەرۋگە بولادى. سەبەبى, وبلىس كولەمىندەگى جۇمىسسىز, NEET ساناتىنا جاتاتىن جاستاردىڭ بازاسى قالىپتاسقان جانە ولارمەن جەكە-جەكە تۇراقتى جۇمىس جاساۋ قولعا الىنعان. ايدىن ءسابيتوۆ, «قازاقستان جاستار كونگرەسى» زتب توراعاسى: – وسىنداي فورۋمداردا جاڭا تەحنيكا مەن تەحنولوگيانى مەڭگەرگەن جاستاردىڭ ورتامىزدا كوپ ەكەنىن, ولاردىڭ وزگەرىستەردەن قورىقپاي, ومىرشەڭ, سەرپىندى جوبالارىن ۇسىنۋدان تارتىنبايتىنىن كورىپ, قۋانامىن. سەبەبى, وسىنداي كرەاتيۆتى جاستار باردا ەلىمىزدىڭ كەلەشەگى كەمەل بولارى ءسوزسىز. جاندوس تۇسماعامبەتوۆ, «سامۇرىق يننوۆاتسيالىق يدەيالاردى دامىتۋ ورتالىعى» قوعامدىق قورىنىڭ ديرەكتورى: – بەلسەندى جاستار فورۋمى جىل سايىن ءداستۇرلى ءتۇردە ۇيىمداستىرىلىپ كەلەدى. جەلىسى ۇزىلمەگەن يگى شارا بيىل دا جالعاسىن تاپتى. وسى شارا ارقىلى جاستارعا قاتىستى ءتۇيىندى ماسەلەلەرمەن تانىسۋعا بولادى. وڭىرىمىزدە جاستار ساياساتىنا بايلانىستى اتقارىلىپ جاتقان شارالار تالقى تارازىسىنا سالىنىپ, جاستاردىڭ جۇمىسقا ورنالىسۋى, ومىردەن ءوز ورنىن تابۋى سەكىلدى ماسەلەلەر قوزعالادى. جالپى, فورۋمنىڭ جاستارعا بەرەرى كوپ دەپ ەسەپتەيمىن. جومارت كەنجەباەۆ, «جاس وتان» جق وبلىستىق فيليالى توراعاسىنىڭ ورىنباسارى: – بۇگىنگى كۇنى ەلىمىزدە كوپتەگەن جاستار ۇيىمدارى بەلسەندى جۇمىس اتقارىپ كەلەدى. ماسەلەن, «نۇر وتان» پارتياسىنىڭ جانىنان قۇرىلعان «جاس وتان» جق قوعامدىق-ساياسي جۇمىستاردىڭ كوشباسشىسى بولىپ, جاستاردىڭ بەلسەندىلىگىن ارتتىرۋعا ات سالىسسا, «جاسىل ەل» ەڭبەك جاساعى تازالىق, كوگالداندىرۋ جۇمىس-تارىنا جاردەم ەتە وتىرىپ, تابيعاتتى قورعاۋعا ۇلكەن ۇلەس قوسۋدا. ال قازاقستان ستۋدەنتتەر اليانسى, قازاقستان جاستار كونگرەسى ستۋدەنت جاستاردىڭ الەۋمەتتىك-ەكونوميكالىق, قۇقىقتىق جانە تۇرمىستىق ماسەلەلەرىن شەشۋدە باستاماشىل بولىپ وتىر. فورۋمدا جاستار وسى اتالعان ۇيىمداردىڭ جۇمىسىمەن تانىسۋعا مۇمكىندىك الا الادى. سونىمەن قاتار, باسقوسۋ بارىسىنداعى ۇسىنىستار ىشىندە جاستار ۇيىمدارىنا ارناپ عيمارات سالۋ ماسەلەسىن قۇپتار ەدىم.
