ۇرپاقتى ۇلتتىق ونەرگە باۋلىعان مۋزىكا مەكتەبى

ۇلت ۇلانىنا بابالار ۇلگىسىمەن سازدى اۋەندى سانالارىنا ءسىڭىرۋ ءۇشىن ەلوردادا اشىلعان العاشقى مۋزىكا مەكتەبى تاۋەلسىزدىك جەمىسى دەسەك بولادى. ەلدىككە دەيىن ەلوردادا مۇنداي ءبىلىم ورداسى بولماعان ەكەن. حالىقتىق ءداستۇردى جالعاستىرۋ ماقساتىندا وسى ءبىر يگىلىكتى شارانى تاۋەلسىزدىكتىڭ العاشقى كۇندەرى سول تۇستاعى ءبىلىم ءمينيسترىنىڭ ورىنباسارى ش.بەركىمباەۆا اقمولا قالالىق اتقارۋ كوميتەتىنىڭ توراعاسى ا.بولەكباەۆ, وزگە دە ازاماتتار كوپتەن بەرى سونداي ءبىر ونەر ۇياسى قاجەت دەپ جۇرگەندە, تاۋەلسىزدىكتىڭ تاڭى اتىپ, سول جىلى وسى مەكتەپ شاڭىراق كوتەرگەن ەكەن. مەكتەپتىڭ ىرگە بەكىتىپ, قاناتىن كەڭەيتۋىنە العاشقى ديرەكتورى وسپان سۇلەيمەنوۆتىڭ دە ەڭبەگى زور دەپ بىلەمىز. جاقىندا وسى ونەر مەكتەبىنىڭ اتاۋلى كۇنىنە وراي ۇلكەن شارا ءوتتى. وعان مەكتەپتىڭ تۇلەكتەرى, ۇستازدار قاۋىمى, اتا-انالار, قالالىق ءماسليحات دەپۋتاتتارى, وزگە دە ازاماتتار قاتىسىپ, اق تىلەكتەرىن ءبىلدىردى. اسىرەسە, ءبىلىم مەكەمەسىنىڭ تۇلەكتەرى مەن قازىرگى شاكىرتتەرىنەن قۇرالعان «رۋح», «تۇمار» قىلقوبىزشىلار ءانسامبلى, «ناز» جەتىگەنشىلەر ءانسامبلى, «مەيىر», «ەركە» ەسترادالىق ۆوكال انسامبلدەرى, «بالاۋسا» فولكلورلىق توبى, باسقا دا شاعىن ونەر ۇجىمدارى ءان اۋەلەتىپ, كۇي كۇمبىرلەتىپ, مىڭ بۇرالعان بيلەرىن ۇسىندى. ۇلاعاتتى ۇستازدار مەن ونەرلى جاستارعا قالالىق ءبىلىم باسقارماسىنىڭ سىي-سياپاتى جاسالدى. ەڭ باستىسى, 115 مۇعالىمنەن 800-دەن اسا وقۋشى ءبىلىم الىپ جاتقان بۇل مەكتەپتىڭ تۇلەكتەرى قازىردىڭ وزىندە ءوز وتانىمىز عانا ەمەس, سونىمەن قاتار, الىس-جاقىن 50 مەملەكەتكە جول تارتىپ, ۇلتىمىزدىڭ رۋحى مىقتى قۇندىلىقتارىن وزگەلەرگە تانىستىرىپ, ناسيحاتتاپ جۇرگەنى كوڭىلگە قۋانىش ۇيالاتادى. شيرەك عاسىر ۇرپاققا قىزمەت ەتىپ كەلە جاتقان ونەر مەكتەبىنە ءان مەن كۇيدى تەڭ دامىتقان قازاقتىڭ ايتۋلى كومپوزيتورى كەنجەبەك كۇمىسبەكوۆتىڭ اتىن بەرۋ ماسەلەسى كوپتەن بەرى كوتەرىلىپ كەلگەن ەدى. ونەر ادامدارى مەن اتا-انالار ءتيىستى ورىندارعا وتىنىشتەرىن تالاي رەت جەتكىزگەن-ءتىن. ادەمى ديدارلاسۋ ساتىندە قالالىق ءماسليحاتتىڭ دەپۋتاتى سايات باتپەنوۆ جۇرتتىڭ ۇسىنىسىن دەپۋتاتتار قاۋىمى قولداپ وتىرعانىن, الداعى ۋاقىتتا شەشىم قابىلداۋ نيەتتەرى بار ەكەنىن تىلگە تيەك ەتىپ, قاۋمالاعان ۇلكەن-كىشىنى ءبىر قۋانتىپ تاستادى. سونىمەن, ەلورداداعى ىرگەلى ءبىلىم ورداسى الداعى ۋاقىتتا دا جاس ۇرپاققا ۇلتتىق ونەردى ۇيرەتۋمەن قاتار, ءتالىمدى تاربيە بەرۋدى جالعاستىرا بەرۋدى ماقسات ەتىپ وتىر. سۇلەيمەن مامەت, «ەگەمەن قازاقستان»