قازاقستان مەن ەستونيا ترانزيتتىك-كولىك سالاسىندا ءوزارا ءىس-قيمىل ورناتۋدى جوسپارلاۋدا

تالليندە ەكونوميكالىق جانە عىلىمي-تەحنيكالىق ىنتىماقتاستىق جونىندەگى قازاقستان-ەستونيا ۇكىمەتارالىق كوميسسيانىڭ (ۇاك) 5-ءشى وتىرىسى ءوتتى, - دەپ حابارلايدى egemen.kz پرەمەر-ءمينيستردىڭ رەسمي سايتىنا سىلتەمە جاساپ. ۇاك-ءتىڭ قازاقستاندىق بولىگىن قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى رومان ۆاسيلەنكو, ەستوندىق بولىگىن ەستونيا رەسپۋبليكاسى سىرتقى ىستەر مينيسترلىگىنىڭ ۆيتسە-كانتسلەرى ۆياينو رەينارت باسقاردى. تاراپتار ينۆەستيتسيالىق جانە ترانزيتتىك-كولىك سالالارىنداعى, اگروونەركاسىپ سالاسىنداعى, اۋىل شارۋاشىلىعى ونىمدەرىن وڭدەۋ, قۇرىلىس جانە تۋريزمدەگى ءوزارا ءىس-قيمىل بولاشاعىن تالقىلادى. اقپاراتتىق تەحنولوگيالاردى ەنگىزۋ, ءبىلىم جانە عىلىم, دەنساۋلىق ساقتاۋ سالالارىنداعى ىنتىماقتاستىقتىڭ ەداۋىر دامۋ الەۋەتى اتاپ ءوتىلدى. ۆ. رەينارت ءوز سوزىندە قازاقستان ەستونيا ءۇشىن وڭىردەگى ماڭىزدى ساۋدا-ەكونوميكالىق ارىپتەس بولىپ تابىلاتىنىن مالىمدەدى. ەكونوميكالىق قارىم-قاتىناستاردى تالقىلاۋ شەڭبەرىندە نەگىزگى تاقىرىپ رەتىندە ترانزيتتىك-كولىك سالاسىندا ءوزارا ءىس-قيمىل ورناتۋ ۇسىنىلدى. ەستوندىق تاراپ «جىبەك جولى ەكونوميكالىق بەلدەۋى» تۇجىرىمداماسى اياسىندا بىرلەسكەن جوبالاردى ىسكە اسىرۋ ءۇشىن ءوز ەلىنىڭ پورت جانە تەمىرجول قۋاتتىلىقتارىن پايدالانۋ مۇمكىندىكتەرىمەن تانىستىرىپ ءوتتى. ءوز كەزەگىندە, ر. ۆاسيلەنكو ەستونيامەن قارىم-قاتىناستى جان-جاقتى دامىتۋ مىندەتىن ەۋروپالىق باعىتتاعى ماڭىزدى مىندەتتەردىڭ قاتارىنا جاتقىزاتىنىمىزدى اتاپ ءوتتى. ەستونيا قازاقستان مەن ەو اراسىنداعى, اسىرەسە ەكونوميكالىق سالادا قوسىمشا بايلانىستىرۋشى بۋىن بولا الادى. قازاقستاندىق ديپلوماتتىڭ ايتۋى بويىنشا, ەۋرازيالىق كەڭىستىكتە جاڭا ترانزيتتىك-كولىك دالىزدەرىنىڭ, ماگيسترالدى باعدارلاردىڭ اشىلۋى وسى ماقساتقا ىقپال ەتۋى مۇمكىن. تاراپتار ءبىلىم جانە عىلىم سالاسىنداعى ىنتىماقتاستىق, سونداي-اق ەكى ەلدىڭ جوعارعى وقۋ ورىندارىنىڭ ءوزارا ءىس-قيمىلى تۋرالى كەلىسىمدەردى ىسكە اسىرۋداعى ءوزارا جەتىستىكتەرىن اتاپ ءوتتى. ودان باسقا, قازاقستان مەن ەستونيانىڭ بىرلەسكەن جوبالارعا, اسىرەسە ءىت-تەحنولوگيالاردى ەنگىزۋ سالاسىنداعى باعدارلامالارعا قاتىساتىن جوعارعى وقۋ ورىندارىنىڭ ستۋدەنتتەرى مەن وقىتۋشىلارىنىڭ سانىن ودان ءارى ۇلعايتۋ ورىندىلىعى دا اتاپ ءوتىلدى. ءتۋريزمدى دامىتۋ مۇمكىندىكتەرىن تالقىلاي وتىرا, ر. ۆاسيلەنكو ەكونوميكانىڭ وسى سالاسى ءۇشىن ەكسپو-2017 حالىقارالىق مامانداندىرىلعان كورمەسىنىڭ ماڭىزدىلىعىن اتاپ ءوتىپ, قازاقستاندا ازىرلەنگەن, قازاقستاننىڭ الەۋمەتتىك-ەكونوميكالىق جانە تۋريستىك الەۋەتىمەن تانىستىراتىن «قازاقستان – ۇلى دالا ەلى» اتتى قوسىمشامەن تانىستىردى. وتىرىس قورىتىندىسى بويىنشا, ەكىجاقتى ىنتىماقتاستىقتىڭ بولاشاق باعىتتارىن كورسەتەتىن حاتتاماعا قول قويىلدى.