«شاحتەر» تومەنگى توپقا تۇسپەيدى

فۋتبولدان پرەمەر-ليگا كوماندالارى اراسىنداعى قازاقستان چەمپيوناتىنىڭ جالاۋ تۇسىرۋىنە ءبىر تۋر قالدى. 29 قازان كۇنى بولاتىن بۇل ماتچتاردا جۇلدەلەردىڭ تاعدىرى شەشىلىپ قانا قويماي, جوعارى توپپەن قوش ايتىساتىن كوماندالار دا انىقتالماق. ءبىر ەسەپتەن مۇنىڭ ءوزى بيىلعى بىرىنشىلىكتىڭ تارتىستى ءھام قىزعىلىقتى ءوتىپ جاتقانىن كورسەتسە كەرەك. وسىدان ەكى-ءۇش جىل بۇرىن بىرەۋ قاراعاندىنىڭ «شاحتەرى» ءۇشىن بيىل پرەمەر-ليگادا قالۋدىڭ ءوزى مۇڭعا اينالادى دەسە, سەنبەگەن دە بولار ەدىك. وكىنىشكە قاراي, ەلىمىزدىڭ ەكى دۇركىن چەمپيونى بۇل ماۋسىمدا اسا كۇردەلى جاعدايدى باستان وتكەردى. ەڭ باستىسى, قار­جىلىق قيىنشىلىققا تاپ بولعان كەنشىلەر كومانداسىنىڭ قۇرامىندا شەبەر ويىنشىلار تۇراقتاماي, ولاردىڭ ورنىن ورتاڭقول فۋتبولشىلار باستى. ارينە, مۇنداي جاعدايدىڭ جاساقتىڭ ويىن ورنەگىنە كەرى اسەرىن تيگىزگەنى انىق ەدى. ابىروي بولعاندا, سەنبى كۇنى «شاحتەر» تالدىقورعاننىڭ «جەتىس­ۋىن» قابىلداپ, 4:1 ەسەبى­مەن ۇتتى. كەزدەسۋدە قاقپا قۇل­پىن كەنشىلەردىڭ جارتىلاي قورعاۋ­شىسى سوكە اشتى. ءبىرىنشى تايم سوڭىندا قۇراما ويىنشىسى بايجانوۆ ەسەپتى 2:0-گە جەتكىزدى. ويىننىڭ ەكىنشى بولىگىندە ۋببينك پەن تاعى بايجانوۆ مەرگەن­دىكتەرىمەن كوزگە ءتۇستى. ال قوناقتار جاعىنان جالعىز گولدى كەزدەسۋدىڭ سوڭعى مينۋتىندا ازوۆسكي سوقتى. وسى جەڭىستەن كەيىن عانا كەنشىلەردىڭ  باسىنداعى قاۋىپ بۇلتى سەيىلىپ, ۇجىم جوعارى توپتا اۋپىرىممەن قالدى. بۇل تۋردا ەكىنشى «التىلىقتىڭ» كوشباسشىسى «توبىل» سىرت الاڭدا «تارازدان» 1:2 ەسەبىمەن جەڭىلگەنىنە قاراماستان, ءوزىنىڭ 7-ورنىندا نىق تۇر. ولاردىڭ 31 ويىننان كەيىن 41 ۇپايى بار. ورالدا «اقجايىقتان» 1:3 ەسەبى­مەن ۇتىلعان «اتىراۋ» «شاحتەردى» العا جىبەرىپ, 9-ورىنعا تۇراقتادى. بۇل ەكەۋىنىڭ ەنشىسىندە 36 ۇپايدان بار. ال كوش سوڭىنداعى «اقجايىق», «تاراز» جانە «جەتىسۋ» كومان­دالارىنىڭ تاعدىرى 29 قازاندا وتەتىن سوڭعى تۋردا شەشىلمەك. العاشقى ەكەۋىنىڭ قورجىنىندا 32 ۇپايدان بولسا, سوڭعىسىنىڭ 31 ۇپايى بار. بۇل كۇنى «اقجايىق» پەن «جەتىسۋ» تالدىقورعان قالاسىندا ءوزارا تايتالاسقا تۇسسە, «تاراز» ءوز الاڭىندا قاراعاندىلىقتاردان قايتسە دە باسىم تۇسۋگە بار كۇشىن سالادى. قايرات ءابىلدينوۆ, «ەگەمەن قازاقستان» قاراعاندى