قازاقستاننىڭ ەڭبەك سىڭىرگەن ءارتىسى حابيبا ەلەبەكوۆا قايتىس بولدى

قازاقستاننىڭ ەڭبەك سىڭىرگەن ءارتىسى حابيبا قاراقبايقىزى ەلەبەكوۆا 100 جاسىندا دۇنيە سالدى. ەلەبەكوۆا حابيبا قاراقبايقىزى, قازاقستاننىڭ ەڭبەك سىڭىرگەن ءارتيسى, «مادەنيەت ۇزدىگى» توسبەلگىسىنىڭ يەگەرى. 1916 ج. قاراعاندى وبلىسى قارقارالى اۋدانى تومار اۋىلىندا  دۇنيەگە كەلگەن. 1934-35 ج ج. قارقارالى حالىق تەاترىندا قىزمەت ىستەگەن. 1935-37 ج ج. م. اۋەزوۆ اتىنداعى دراما تەاتر  جانىنداعى ەكى جىلدىق ستۋديانى بىتىرگەن. 1935 ج. بەرى م. اۋەزوۆ تەاترىندا ۇزىلىسسىز قىزمەت ەتەدى. ساحناعا ۇلتتىق تەاتردىڭ ىرگەتاسىن قالاعان, اتاقتى «سامورودوك سارى التىن» بۋىنىنىڭ ءىزىن باسا كەلگەن ح. ەلەبەكوۆانى بۇگىن دە سول بۋىننىڭ  سوڭعى تۇياعى دەۋگە بولادى. بەلگىلى  اكتريسا 1935 جىلعى العاشقى قادامى – قازاقتىڭ العاشقى كاسىبي تەاتر رەجيسسەرى ج. ءشانيننىڭ ءوزى جازىپ, ءوزى قويعان «ارقالىق باتىر» تاريحي دراماسىنداعى» قاراكوزدەن باستاپ,  قارا شاڭىراق تەاتردا ۇلتتىق قۇنارى مىقتى كوپتەگەن رول جاسادى.

100 جاساعان اكتريسا حابيبا اپاي

عاسىرلىق عيبرات

ساحناداعى رولدەرى: ۇلتتىق كلاسسيكا مەن زاماناۋي دراماتۋرگيادا: «ارقالىق باتىر» تاريحي دراماسىندا قاراكوز, م. اۋەزوۆتىڭ «قارا قىپشاق قوبىلاندىسىندا» كۇنىكەي, «ابايىندا» قانىكەي, ۇلجان, ب.ءمايليننىڭ «مايدانىندا» مامىق, ع. مۇسىرەپوۆتىڭ «قوزى كورپەش-بايان سۇلۋىندا» ماقپال, ش. قۇسايىنوۆتىڭ «مارابايىندا» ءمارياش, «امانگەلدىدە» اقجان, ق. امانجولوۆتىڭ «دوسىمنىڭ ۇيلەنۋىندە» ايعانىم, ا. تاسىمبەكوۆ پەن ق.ىسقاقتىڭ «كەبەنەك كيگەن ارۋلارىندا» تۇتقىن, ا. سۇلەيمەنوۆتىڭ «جەتىنشى پالاتاسىندا» كەمپىر, يران-عايىپتىڭ» «ەستايدىڭ قورلانىندا» ايناش ت.ب. الەمدىك دراماتۋرگيادا: گ. لوركانىڭ «بەرناردا البانىڭ ۇيىندە» پونسيا, وستروۆسكيدىڭ «نايزاعايىندا» كەزبە ايەل, «تالانتتار مەن تابىنۋشىلارىندا» د. اندرەەۆنا, گوگولدىڭ «رەۆيزورىندا» پوشلەپكينا, «ۆەتنام جۇلدىزىندا» تحان, م. مەتەرلينكتىڭ «سوقىرلارىندا» سوقىر ايەل ت.ب. ح. ەلەبەكوۆا ءبىراز كوركەم جانە دەرەكتى فيلمدەرگە ءتۇستى. ولاردىڭ ىشىندە ايگىلى رەجيسسەر س. قوجىقوۆتىڭ «ەگەر ءبىزدىڭ ارقايسىمىز…» (1961), سونداي-اق, اكتريسا تۇسكەن ەڭ سوڭعى فيلم د. جولجاقسىنوۆتىڭ «ءبىرجان سالىن» (2009) اتاۋعا بولادى. ح. ەلەبەكوۆا ءوزىنىڭ ءومىر-ونەر سەرىگى ج. ەلەبەكوۆ جانە حح عاسىرداعى قازاق ونەرى تۋرالى «ءۇنى كەتپەس قۇلاقتان» (1981) كىتابىن جازدى, بۇل ەڭبەگى تولىقتىرىلىپ «ءان-امانات» (1984) «قايران, جۇسەكەم» (1998) دەگەن اتاۋلارمەن قايتا باسىلدى. ۇلتتىق ونەر تاريحىن جاقسى بىلەتىن اكتريسا ءبىراز ءاننىڭ, مىسالى, ابايدىڭ «سەگىز اياعى», ت.ب. ءوز تۇپنۇسقاسىندا جەتۋىنە ۇلكەن ەڭبەك ءسىڭىردى. قۇيماقۇلاق دەۋگە بولاتىن حابيبا اپا كوپ جىرلاردى, مىسالى, ماعجان جۇماباەۆتىڭ جىرلارىن تۇگەلدەي دەرلىك جاتقا  وقيتىن ونەرى  بار. قازاقستاننىڭ ەڭبەك سىڭىرگەن ءارتيسى (1976), قر مادەنيەت مينيسترلىگىنىڭ  «مادەنيەت ۇزدىگى» توسبەلگىسىمەن ماراپاتتالدى (2012). «حابيبا ەلەبەكوۆا» اتتى كىتاپ (جوبا اۆتورى ءا. بوپەجانوۆا) «ايگىلى ادامدار» سەرياسىمەن «ونەر» باسپاسىندا جارىق كوردى (2012).