"پاتەردى جالعا بەرۋشى وندا تۇراتىن ادامدى تىركەۋگە مىندەتتى"

ءماجىلىس دەپۋتاتتارى باسپانادا تىركەۋسىز 30 كۇنگە دەيىن تۇرۋ مۇمكىندىگىن ۇسىنۋدا. بۇل تۋرالى بۇگىن سەناتتا قازاقستان رەسپۋبليكاسىندا ءدىني ەكسترەميزم مەن تەرروريزمگە قارسى ءىس-قيمىل جونىندەگى 2013 - 2017 جىلدارعا ارنالعان مەملەكەتتىك باعدارلامانى جۇزەگە اسىرۋ ماسەلەلەرى بويىنشا دەپۋتاتتار مەن مۇددەلى مەملەكەتتىك ورگانداردىڭ كەزدەسۋىندە قر پارلامەنتى ءماجىلىسىنىڭ دەپۋتاتى ماۋلەن اشىمباەۆ ءمالىم ەتتى. «جالپى, قازاقستان ازاماتتارىنا ءىىم 10 كۇندى ۇسىنىپ, كەيىننەن تىركەۋگە تۇرۋ قاجەتتىگىن ەسكەرگەن ەدى. بىراق تا ءتۇرلى جاعدايلاردىڭ بولۋىن قاراستىرا وتىرىپ, ياعني قوناققا, جۇمىسىمەن بارعاندا 10 كۇن جەتپەۋى مۇمكىن, وسى رەتتە بۇل مەرزىمدى 30 كۇنگە دەيىن ارتتىرۋدى ۇسىنۋدامىز. ەگەر دە ادام جۇمىس بابىمەن, تۋىستارىنا ساپارلاپ كەلسە, باسقا قالادا تىركەۋسىز جۇرۋىنە 30 كۇنگە دەيىن مەرزىم قامتىلۋى ءتيىس. وسىدان كەيىن تىركەۋگە تۇرۋ قاجەت بولادى. ىشكى ىستەر مينيسترلىگىنىڭ ۇسىنىسى بويىنشا ەگەر دە ادام تىركەلمەسە, ول ءوزى جەكەلەي, سونداي-اق پاتەردىڭ يەسى دە جاۋاپتى بولادى. ياعني, بارلىق پاتەر يەلەرىن تۋىسقاندارى كەلگەن جاعدايدا تىركەۋگە تۇرعىزۋ مىندەتتەلگەن بولاتىن, ەگەر دە تىركەۋ جاسالماسا, وندا ايىپپۇل قاراستىرىلعان. بۇل نورما تەرروريزممەن جانە ەكسترەميزممەن كۇرەسكە قاتىسى جوق ەكەنىن, سونىمەن قاتار قوعامدا جاعىمسىز رەزونانس تۋدىرىپ وتىرعانىن ەسكەرە كەلە, ءماجىلىس تەك تىركەۋدى عانا رەتكە كەلتىرۋدى جانە پاتەرلەرىن جالعا بەرەتىن مەنشىك يەلەرىنىڭ جاۋاپكەرشىلىگىن بەكىتۋدى ۇسىنادى. ەگەر دە پاتەردى جالعا بەرسە, ول وسى تۇرعىندى تىركەۋگە مىندەتتى. وسى ورايدا 10 كۇن ۋاقىت بەرىلەدى»,-دەپ ءتۇسىندىردى م. اشىمباەۆ. ونىڭ سوزىنە قاراعاندا, بۇل تۇرعىداعى شارالار ارقىلى پاتەرلەردى جالعا بەرۋ باعىتى سەكىلدى ەڭ ۇلكەن سەگمەنتتى رەتكە كەلتىرۋگە بولادى. ەستەرىڭىزگە سالا كەتەيىك, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزمگە جانە تەرروريزمگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءماجىلىستىڭ قاراۋىندا جاتىر. بۇگىندە وسى زاڭ جوباسى بويىنشا قىزۋ تالقىلاۋلار جۇرگىزىلۋدە.